କନକ ବ୍ୟୁରୋ : ପେନସନ୍ ଇବା ପାଇଁ ଅନଶନ । ପେନସନ୍ ପାଇଁ ଅନଶନରେ କୌଣସି ସାଧାରଣ ନାଗରିକ ବସିନାହାନ୍ତି, ବସିଛନ୍ତି ଜଣେ ପୂର୍ବତନ ବିଧାୟକ ତଥା ଶାସକ ଦଳର ପୂର୍ବତନ ମୁଖ୍ୟ ସଚେତକ । ସେ ହେଲେ ୭୫ ବର୍ଷ ବୟସ୍କ ଅଜୟ କୁମାର ଜେନା । ଶ୍ରୀ ଜେନା ବିଜୁ ପଟ୍ଟନାୟକଙ୍କ ଜନତା ଦଳ ସରକାରରେ ଶାସକ ଦଳ ମୁଖ୍ୟ ସଚେତକ ଥିବାବେଳେ ବ୍ରହ୍ମଗିରି ଅଂଚଳରୁ ଦୁଇ ଥର ବିଧାୟକ ରୂପେ ନିର୍ବାଚିତ ହୋଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଅଭିଯୋଗ ଅନୁଯାୟୀ, ଅଜୟଙ୍କ ସ୍ତ୍ରୀ ଅଶ୍ରୁକଣା ପ୍ରଧାନ ୧୦ ବର୍ଷ ତଳୁ ସରକାରୀ ହାଇସ୍କୁଲର ପ୍ରଧାନଶିକ୍ଷକ ପଦବିରୁ ଅବସର ନେଲେଣି । ହେଲେ ଏପର୍ଯ୍ୟନ୍ତ ଅଶ୍ରୁକଣାଙ୍କ ଫାଇନାଲ୍ ପେନସନରୁ କାଟି ନିଆଯାଇଥିବା ଅର୍ଥକୁ ଫେରସ୍ତ କରୁନାହାନ୍ତି ସରକାର । ଏ ନେଇ ସେ ପ୍ରଶାସନିକ ନ୍ୟାୟାଧିକରଣ ବା ସ୍ୟାଟର ଦ୍ୱାରସ୍ଥ ହେଲା ପରେ ସ୍ୟାଟ୍ ବକେୟା ୬୫ ହଜାର ଟଙ୍କା ଫେରାଇ ଦେବାକୁ ସ୍କୁଲ ଓ ଗଣଶିକ୍ଷା ବିଭାଗକୁ ନିର୍ଦ୍ଦେଶ ଦେଇଥିଲେ । ହେଲେ ଏପର୍ଯ୍ୟନ୍ତ ତାଙ୍କୁ ବକେୟା ଅର୍ଥ ମିଳିଲା ନାହିଁ ।
କୋର୍ଟ ଅବମାନ ମାମଲା ରୁଜୁ କଲା ପରେ ଓ ସ୍ୟାଟ୍ ନିର୍ଦ୍ଦେଶ ଦେବା ସତ୍ୱେ ଏହାକୁ ଖାତିର କରୁନି ସ୍କୁଲ ଓ ଗଣଶିକ୍ଷା ବିଭାଗ । ବାଧ୍ୟ ହୋଇ ସେ ସଚିବାଳୟରେ ସ୍କୁଲ ଓ ଗଣଶିକ୍ଷା ବିଭାଗ ସଚିବ ରଂଜନା ଚୋପ୍ରାଙ୍କ ଦପ୍ତର ଆଗରେ ଆଜିଠାରୁ ଅନଶନରେ ବସିଛନ୍ତି । ଅନ୍ୟପଟରେ ରୋଗଗ୍ରସ୍ତ ଅଶ୍ରୁକଣା ମଧ୍ୟ ବକେୟା ଅର୍ଥ ନ ପାଇ ଚିନ୍ତାରେ ଅଛନ୍ତି । ଜଣେ ପୂର୍ବତନ ସଚେତକ ଯେତେବେଳେ ପ୍ରଶାସନିକ ନାଲିଫିତାରେ ନ୍ୟାୟ ପାଇପାରୁନାହାନ୍ତି, ସେତେବେଳେ ସାଧାରଣ ନାଗରିକଙ୍କର ଅବସ୍ଥା ଯେ କ’ଣ ହେଉଥିବା ତାହା ସ୍ପଷ୍ଟ ହୋଇଯାଉଛି ।