କନକ ବ୍ୟୁରୋ : ଆଜି ସକାଳୁ ପଶ୍ଚିମ ଇରାନର କେରମାନଶାହା ପ୍ରଦେଶରେ ୫. ୯ ତୀବ୍ର ଭୂମିକମ୍ପ ସଂଘଠିତ ହେବାରୁ ୨ ଜଣ ଲୋକଙ୍କର ମୃତ୍ୟୁ ଘଟିବା ସହ ଅନ୍ୟ ୧୦୦ ଜଣ ଆହତ ହୋଇଛନ୍ତି ବୋଲି ଇରାନର ସରକାରୀ ସମ୍ବାଦ ସରବରାହ ଏଜେନ୍ସି ‘ଇର୍ନା’ର ଖବରକୁ ଉଦ୍ଧାର କରି କେରମାନଶାହା ପ୍ରଦେଶର ଜେନେରାଲ୍ ଡାଇରେକ୍ଟୋରେଟ୍ କହିଛି। ତାଜେହାବାଦ ସହର ଠାରୁ ୬ ମାଇଲ୍ ଏବଂ ଜବାନରୁଦ୍ ସହର ଠାରୁ ୧୯ ମାଇଲ୍ ଦୂରରେ ଥିଲା ଏହି ଭୂମିକମ୍ପର କେନ୍ଦ୍ରସ୍ଥଳ। ଭୂଗର୍ଭର ୬ ମାଇଲ୍ ବା ୧୦ କିଲୋମିଟର୍ ଅଭ୍ୟନ୍ତରରେ ଭୂମିକମ୍ପ ସଂଘଠିତ ହୋଇଥିଲା। ରାଷ୍ଟ୍ରାୟତ ପ୍ରେସ୍ ଟିଭିକୁ ଇରାନର ଏମର୍ଜେନ୍ସି ଆଣ୍ଡ୍ ନେଚୁରାଲ୍ ଡିଜାଷ୍ଟର୍ ଏଜେନ୍ସି କହିଛି ଯେ ସମ୍ପୃକ୍ତ ଅଞ୍ଚଳକୁ ୫ଟି ଉଦ୍ଧାରକାରୀ ଦଳଙ୍କୁ ପଠାଯାଇଛି।

 

ଇରାନସ୍ଥିତ ଇଂରାଜୀ ଭାଷା ଟେଲିଭିଜନ୍ କେନ୍ଦ୍ର ପ୍ରେସ୍ ଟିଭି ଟୁଇଟ୍ କରି କହିଛି ଯେ ଯଦିବା ହଠାତ୍ ମୃତ୍ୟୁସଂଖ୍ୟା ଜଣାପଡ଼ି ନାହିଁ ତଥାପି ଲୋକମାନଙ୍କୁ ଡାକ୍ତରଖାନାକୁ ନିଆଯାଇଛି । ରାଜଧାନୀ ବାଗଦାଗବାସୀ ମଧ୍ୟ କମ୍ପନ ଅନୁଭବ କରିଥିବା କଥା ଗଣମାଧ୍ୟମକୁ କହିଛନ୍ତି। ଇରାନ୍ ସୀମାନ୍ତ ଠାରୁ ୩୪୨ କିଲୋମିଟର୍ ଦୂରେ ବାଗଦାଗ ଅବସ୍ଥିତ। ଭୂମିକମ୍ପର ତୀବ୍ରତା ୬. ୧ ଥିଲା ବୋଲି ପ୍ରଥମେ ଯୁକ୍ତରାଷ୍ଟ୍ର ଆମେରିକା ଜିଓଲୋଜିକାଲ୍ ସର୍ଭେ କହିଥିଲା। ତେବେ ଏହି ଭୂକମ୍ପ ହେବାପରେ ଲୋକମାନଙ୍କ ମନରେ ଭୟର ବାତାବରଣ ଲାଗି ରହିଛି । ତେବେ ଏହି ଭୂକମ୍ପ ଅଧିକ କ୍ଷତି ଘଟାଇବା ନାହିଁ ବୋଲି ସ୍ଥାନୀୟ ସରକାର କହିଛନ୍ତି । ମିଳିଥିବା ସୂଚନା ଅନୁସାରେ ସେଠାରେ ଅନେକ କୋଠାବାଡି ଭାଙ୍ଗିଯାଇଛି । ତେବେ ପ୍ରକୃତରେ କେତେ କେତେ ପରିମାଣରେ କ୍ଷତି ହୋଇଛି ତାହାର ସୂଚନା ମିଳିନାହିଁ ।