କିଭଳି ସିବିଆଇ ଘେରକୁ ଆସିଲେ ପୂର୍ବତନ ଅର୍ଥମନ୍ତ୍ରୀ? ଆଇଏନଏକ୍ସ ମିଡିଆ କେସରେ କାହିଁକି ଉଠିଲା ପି ଚିଦାମ୍ବରମଙ୍କ ନାଁ? ସଂକ୍ଷେପରେ ଜାଣନ୍ତୁ ପୂରା ଘଟଣା
କନକ ବ୍ୟୁରୋ: ପୂର୍ବତନ ଅର୍ଥମନ୍ତ୍ରୀ ପି.ଚିଦାମ୍ବରମଙ୍କ ପାଇଁ ବଢିଲା ଅଡୁଆ । ୨ ଘଂଟା ମଧ୍ୟରେ ହାଜର ହେବାକୁ ରାତି ଅଧରେ ଚିଦାମ୍ୱରମଙ୍କ ଘରେ ନୋଟିସ୍ ଲଟକାଇଲା ସିବିଆଇ । ହେଲେ ନୋଟିସ୍ ମାରିବାର ୨ ଘଂଟା ପରେ ବି ଏହି ପୂର୍ବତନ ଅର୍ଥମନ୍ତ୍ରୀଙ୍କ ଦେଖା ମିଳି ନଥିିଲା । ଆଜି ସକାଳୁ ସକାଳୁ ସିବିଆଇର ଏକ ଟିମ୍ ପୁଣି ଚିଦାମ୍ବରମଙ୍କ ଦିଲ୍ଲୀସ୍ଥିତ ବାସଭବନ ଉପରେ ଚଢ଼ଉ କରିଛନ୍ତି । ତେବେ ଚିଦାମ୍ବରମଙ୍କ ଟେର୍ ପାଇନାହାଁନ୍ତି ସିବିଆଇର ଏହି ଟିମ୍ । ଆଇଏନଏକ୍ସ ମିଡ଼ିଆ ମାମଲାରେ ଅଭିଯୁକ୍ତ ଅଛନ୍ତି ଚିଦାମ୍ବରମ । ସିବିଆଇ ଟିମ୍ ଚିଦାମ୍ବରମଙ୍କ ଘରେ ପହଂଚି ଯାଂଚ କରିିବା ବେଳେ ସେ ଅନୁପସ୍ଥିତ ଥିଲେ । ସେହିପରି ଇଡି ମଧ୍ୟ ଖୋଳତାଡ କରିବା ବେଳେ ସେ ଘରୁ କେଉଁଆଡେ ଚାଲିଯାଇଛନ୍ତି । ତାଙ୍କର ମୋବାଇଲ୍ ମଧ୍ୟ ଅଫ୍ ରହିଛି । ଗତବର୍ଷ ତାଙ୍କ ପୁଅ କାର୍ତି ଚିଦାମ୍ବରମ୍ଙ୍କୁ ଗିରଫ କରାଯାଇଥିଲା । ସେ ଏବେ ଜାମିନରେ ବାହାରେ ଅଛନ୍ତି । ଅନ୍ୟପଟେ ଆଇଏନଏକ୍ସ ମିଡ଼ିଆ ମାମଲାରେ ଦିଲ୍ଲୀ ହାଇକୋର୍ଟ ଚିଦାମ୍ବରମଙ୍କ ଆଗୁଆ ଜାମିନ ଆବେଦନକୁ ଖାରଜ କରିଦେଇଛନ୍ତି । ହାଇକୋର୍ଟରୁ ଆଗୁଆ ଜାମିନ ଆବେଦନ ଖାରଜ ହେବା ପରେ ଇଡ଼ି ଓ ସିବିଆଇ ଶୀଘ୍ର ଚିଦାମ୍ବରମଙ୍କୁ ଗିରଫ କରିବାକୁ ଚାହୁଁଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଏହି ମାମଲା ଚିଦାମ୍ବରମଙ୍କ ବିରୋଧରେ ଆଇଏନଏକ୍ସ ମିଡ଼ିଆକୁ ଫରେନ ଇନଭେଷ୍ଟମେଂଟ ପ୍ରୋମୋସନ ବୋର୍ଡ଼ରେ ଅବୈଧ ରୂପେ ସ୍ୱୀକୃତି ଦେବା ପାଇଁ ୩୦୫ କୋଟି ଟଙ୍କାର ଲାଂଚ ନେଇଥିବା ଅଭିଯୋଗ ରହିଛି । ଏହି ମାମଲାରେ ଏ ପର୍ଯ୍ୟନ୍ତ ଚିଦାମ୍ବରମଙ୍କୁ କୋର୍ଟରୁ ପ୍ରାୟ ୨୪ ଥର ଗିରଫଦାରୀରୁ ଅନ୍ତରୀଣ ଆଶ୍ୱସ୍ତି ମିଳି ସାରିଛି । ୨୦୦୭ରେ ଚିଦାମ୍ବରମ ଅର୍ଥମନ୍ତ୍ରୀ ଥିବା ବେଳେ ଏହି ମାମଲା ସାମ୍ନାକୁ ଆସିଥିଲା ।
ସେହିଭଳି ଇନ୍ଦ୍ରାଣୀ ମୁଖାର୍ଜି ଏବଂ ତାଙ୍କ ସ୍ୱାମୀ ପିଟର ମୁଖାର୍ଜି, ଯିଏକି ୨୦୦୭ରେ ଆଇଏନଏକ୍ସ ମିଡିଆର ସହ ସଂପାଦକ ଥିଲେ, ଉଭଭଙ୍କ ଉପରେ ବି ଏହି ପୂରା ଘୋଟାଲାରେ ସଂପୃକ୍ତି ଥିବା ଅଭିଯୋଗ ରହିଛି । କାର୍ତ୍ତି ଚିଦାମ୍ବରମଙ୍କ ଉପରେ ମଧ୍ୟ ଏହି ଷଡଯନ୍ତ୍ରରେ ସାମିଲ ଥିବା ଅଭିଯୋଗ ରହିଛି । ୨୦୧୮ରେ ଇନ୍ଦ୍ରାଣୀ ମୁଖାର୍ଜି ସିବିଆଇକୁ ଦେଇଥିବା ନିଜ ବୟାନରେ ଏସଂପର୍କରେ କହିଥିଲେ । ସେ କହିଥିଲେ କି, ସେ ଏଥିପାଇଁ କାର୍ତ୍ତି ଙ୍କ ସହ ଡିଲ କରିଥିଲେ । ଯେଉଁ କାରଣରୁ କାର୍ତ୍ତିଙ୍କୁ ଗତବର୍ଷ ଫେବ୍ରୁଆରୀରେ ଗିରଫ ମଧ୍ୟ କରାଯାଇଥିଲା ମାତ୍ର ମାର୍ଚ୍ଚରେ ତାଙ୍କୁ ଜାମିନ ମିଳିଯାଇଥିଲା ।
ତେବେ କାର୍ତ୍ତି ଏବଂ ତାଙ୍କ ବାପା ପି.ଚାଦାମ୍ବରମଙ୍କୁ ଇଡି ଏସଂପର୍କରେ ଅନେକ ଥର ପଚରାଉଚରା ମଧ୍ୟ କରିସାରିଲାଣି ।
ସେପଟେ ପ୍ରବର୍ତ୍ତନ ନିର୍ଦ୍ଦେଶାଳୟ ପକ୍ଷରୁ କାର୍ତ୍ତି ଚିଦାମ୍ବରମଙ୍କ ସହ ଜଡିତ ୫୪ କୋଟିର ସଂପତିକୁ ବି ଆଟାଚ କରାଯାଇଛି । ଏଥି ସହିତ ହିଁ ପିଟର ଏବଂ ଇନ୍ଦ୍ରାଣୀଙ୍କ ସଂପତିକୁ ବି ଆଟାଚ କରାଯାଇଛି । ତେବେ ଏବେ ନଜର ପକାନ୍ତୁ ଏହି ଚର୍ଚ୍ଚିତ ମାମଲାରେ ଏଯାବତ୍ କଣ କଣ ସବୁ ଘଟିଛି..
• ୧୫ ମଇ ୨୦୧୭: ସିବିଆଇ ଏହି ମାମଲାରେ ଏଫଆଇଆର ଦାଖଲ କରିଥିଲା, ଯେଉଁଥିରେ ଆଇଏନଏକ୍ସ ମିଡିଆ ପାଇଁ ଏଫଆଇପିବି ମଂଜୁରୀରେ ଅନିୟମିତତା ନେଇ ଅଭିଯୋଗ ରହିଥିଲା । ୨୦୦୭ରେ ୩୦୫ କୋଟିର ବିଦେଶୀ ଫଣ୍ଡ ମିଡିଆ ଗ୍ରୁପକୁ ମିଳିଥିଲା, ଯେତେବେଳେ କାର୍ତ୍ତିଙ୍କ ବାପା ପି.ଚିଦାମ୍ବରମ ଅର୍ଥମନ୍ତ୍ରୀ ଥିଲେ ।
• ୧୬ ଜୁନ ୨୦୧୭: କାର୍ତ୍ତିଙ୍କ ବିରୋଧରେ ଏଫଆରଆରଓ ତରଫରୁ ଲୁକ୍ ଆଉଟ୍ ନୋଟିସ୍ ଜାରି କରାଯାଇଥିଲା ।
• ୧୦ ଅଗଷ୍ଟ ୨୦୧୭: ମାଡ୍ରାସ ହାଇକୋର୍ଟ କାର୍ତ୍ତି ଏବଂ ଅନ୍ୟ ୪ଜଣ ବ୍ୟକ୍ତିଙ୍କ ବିରୋଧରେ ଜାରି ହୋଇଥିବା ଲୁକ୍ ଆଉଟ ନୋଟିସ ଉପରେ ଏବେ ୱାରେଂଟ ଜାରି ହୋଇନାହିଁ ବୋଲି କହି ରୋକ୍ ଲଗାଇଦେଇଥିଲେ ।
• ୧୪ ଅଗଷ୍ଟ ୨୦୧୭: ସୁପ୍ରିମକୋର୍ଟ ତରଫରୁ ମାଡ୍ରାସ ହାଇକୋର୍ଟଙ୍କ ନିଷ୍ପତି ଉପରେ ରୋକ ଲଗାଇ କେନ୍ଦ୍ରକୁ ଲୁକ ଆଉଟ ନୋଟିସ ଜାରି କରିବାକୁ ମଂଜୁରୀ ଦେଇଥିଲେ ।
• ୧୮ ଅଗଷ୍ଟ ୨୦୧୭: ସୁପ୍ରିମକୋର୍ଟ କାର୍ତ୍ତି ଚିଦାମ୍ବରମଙ୍କୁ ୨୩ ଅଗଷ୍ଟ ସୁଦ୍ଧା ସିବିଆଇ ନିକଟରେ ହାଜର ହେବାକୁ ନିର୍ଦ୍ଦେଶ ଦେଇଥିଲେ ।
• ୧୧ ସେପ୍ଟେମ୍ବର ୨୦୧୭: ସିବିଆଇ ଯାଂଚ ପରେ ସୁପ୍ରିମକୋର୍ଟକୁ ବନ୍ଦ ଲଫାପାରେ ବିଦେଶରେ ଥିବା କାର୍ତ୍ତିଙ୍କ ସମ୍ବାବିତ ଦେଣନେଣ ସହ ଜଡିତ ସୂଚନା ଦେଇଥିଲେ ।
• ୨୨ ସେପ୍ଟେମ୍ବର ୨୦୧୭: ସିବିଆଇ କୋର୍ଟରୁ କାର୍ତ୍ତିଙ୍କ ବିଦେଶ ଯାତ୍ରା ଉପରେ ପ୍ରତିବନ୍ଧକ ଲଗାଇବାକୁ ନିବେଦନ କରିଥିଲା କାହିଁକି ନା ଏଜେନ୍ସକୁ ସନ୍ଦେହ ରହିଥିଲା କି ସେ ବିଦେଶରେ ନିଜ ବ୍ୟାଙ୍କ ଖାତା ବନ୍ଦ କରିପାରନ୍ତି ।
• ୯ ଅକ୍ଟୋବର ୨୦୧୭: କାର୍ତ୍ତି କୋର୍ଟରୁ ଝିଅର ପାଠାପଢା ନେଇ ବ୍ରିଟେନ ଯିବାକୁ ଅନୁମତି ମାଗିଥିଲେ ଏବଂ କହିଥିଲେ କି ଏହି ସମୟରେ ସେ କୌଣସି ବି ବ୍ୟାଙ୍କ ଯିବେ ନାହିଁ ବୋଲି । ଏଥି ସହିତ ହିଁ ପି. ଚିଦାମ୍ବରମ ସୁପ୍ରିମକର୍ଟରେ କହିଥିଲେ କି କେନ୍ଦ୍ରରେ ସତାଧାରୀ ବିଜେପି ସରକାର ତାଙ୍କୁ ଏବଂ ତାଙ୍କ ପୁଅ କାର୍ତ୍ତିଙ୍କ ବିରୋଧରେ ରାଜନୈତିକ ପ୍ରତିଶୋଧ ନେବା ପାଇଁ ଏଭଳି କରୁଛନ୍ତି ।
• ୨୦ ନଭେମ୍ବର ୨୦୧୭: ସୁପ୍ରିମକୋର୍ଟ କାର୍ତ୍ତିଙ୍କୁ ଏଥିପାଇଁ ଅନୁମତି ଦେଇଥିଲେ ।
• ୮ ଡିସେମ୍ବର ୨୦୧୭: କାର୍ତ୍ତି ଏୟାରସେଲ-ମେକ୍ସିସ ଡିଲରେ ସିବିଆଇ ତରଫରୁ ଜାରି ସମନକୁ ସୁପ୍ରିମକୋର୍ଟରେ ଚ୍ୟାଲେଂଜ ଦେଇଥିଲେ ।
• ୩୧ ଜାନୁଆରୀ ୨୦୧୮: ସୁପ୍ରିମକୋର୍ଟ କାର୍ତ୍ତିଙ୍କ ବିରୋଧରେ ଲୁକ୍ ଆଉଟ ନୋଟିସ ଉପରେ ରୋକ ଲଗାଇଥିବା ମାଡ୍ରାସ ହାଇକୋର୍ଟର ନିଷ୍ପତିକୁ ଫେରାଇ ନେଇଥିଲେ ।
• ୧୬ ଫେବ୍ରୁଆରୀ ୨୦୧୮: କାର୍ତ୍ତିଙ୍କ ସିଏ ଏସ.ଭାସ୍କର ରମଣକୁ ଅବୈଧ ତରିକାରେ ଟଙ୍କା ରୋଜଗାର କରିବାରେ ସହାୟତା କରିବା ଅଭିଯୋଗରେ ଗିରଫ କରାଯାଇଥିଲା ।
• ୨୮ ଫେବ୍ରୁଆରୀ ୨୦୧୮: ଚେନ୍ନାଇ ଏୟାରପୋର୍ଟରୁ କାର୍ତ୍ତିଙ୍କୁ ଗିରଫ କରାଯାଇଥିଲା ଏବଂ ଦିଲ୍ଲୀ ଅଣାଯାଇଥିଲା ।
• ୨୩ ମାର୍ଚ୍ଚ ୨୦୧୮:କାର୍ତ୍ତିଙ୍କୁ ୨୩ ଦିନ ଯାଏଁ ଜେଲରେ ରହିବା ପରେ ଜାମିନ ମିଳିଥିଲା ।
• ୨୫ ଜୁଲାଇ ୨୦୧୮: ହାଇକୋର୍ଟ ପି ଚିଦାମ୍ବରମଙ୍କ ଗିରଫଦାରୀରୁ ବଂଚିବା ପାଇଁ ଅଗ୍ରୀମ ଜାମିନ ଆବେଦନକୁ ମଂଜୁରୀ ମିଳିଥିଲା ।
• ୧୧ ଅକ୍ଟୋବର ୨୦୧୮: ଆଇଏନକ୍ସ ମିଡିଆର ମନି ଲଣ୍ଡ୍ରିଂ କେସରେ ଇଡିରେ କାର୍ତ୍ତିଙ୍କ ୫୪ କୋଟି ସଂପତି ଆଟାଚ କରିନେଇଥିଲା । ଯେଉଁଥିରେ କାର୍ତ୍ତିଙ୍କ ଭାରତ, ବ୍ରିଟେନ ଏବଂ ସ୍ପେନ ଥିବା ସଂପତି ସାମିଲ ରହିଛି ।
• ୧୧ ଜୁଲାଇ ୨୦୧୯:ଇନ୍ଦ୍ରାଣୀ ମୁଖାର୍ଜିଙ୍କୁ କୋର୍ଟ ସର୍ତ୍ତ ସହିତ ମାମଲାର ସାକ୍ଷ୍ୟ ରୂପେ ଗ୍ରହଣ କରିଥିଲା ।
• ୧ ଅଗଷ୍ଟ ୨୦୧୯: ଇଡି କାର୍ତ୍ତିଙ୍କୁ ଦିଲ୍ଲୀର ଜୋରବାଗ ସ୍ଥିତ ବାସଭବନକୁ ଖାଲି କରିବାକୁ କହିଥିଲା, ଯାହାକୁ ଏଜେନ୍ସି ପୂର୍ବରୁ ହିଁ ଆଟାଚ କରିସାରିଛି ।
• ୨୦ ଅଗଷ୍ଟ ୨୦୧୯: ଦିଲ୍ଲୀ ହାଇକୋର୍ଟ ପି ଚିଦାମ୍ବରମଙ୍କ ଅଗ୍ରୀମ ଜାମିନ ଆବେଦନକୁ ଖାରଜ କରିଦେଇଛନ୍ତି । ଯାହା ପରେ ସିବିଆଇ ତାଙ୍କୁ ଗିରଫ କରିବାକୁ ପହଂଚି ଥିଲେ କିନ୍ତୁ ଚିଦାମ୍ବରମ ନିଜ ଘରେ ଅନୁପସ୍ଥିତ ଥିଲେ ଆଉ ତାଙ୍କ ଫୋନ ସୁଇଚ ଅପ ରହିଛି ।