ଯୁବଦେଶ ଭାରତ : ଶିକ୍ଷା ଠାରୁ ବେରୋଜଗାରୀ ଏକ ଆହ୍ୱାନ
କନକ ବ୍ୟୁରୋ: ଅଗଷ୍ଟ ୧୨ରେ ଆନ୍ତର୍ଜାତୀୟ ସ୍ତରରେ ପାଳିତ ହେଉଛି ଯୁବ ଦିବସ । ସମଗ୍ର ଯୁବସମାଜ ପାଇଁ ଏହି ଦିନଟିକୁ ଉତ୍ସର୍ଗୀକୃତ କରାଯାଇଥିବା ବେଳେ ଏହିଦିନ ବିଭିନ୍ନ ସଭାସମିତିର ଆୟୋଜନ ମଧ୍ୟ କରାଯାଇଥାଏ । ୧୯୯୯ ମସିହା ଠାରୁ ଏହି ଦିବସଟିକୁ ପାଳନ କରାଯାଉଛି । ତେବେ ଚଳିତ ବର୍ଷ ଥିମ ରହିଛି ‘ୟୁଥ୍ ବିଲ୍ଡିଂ ପିସ’ ବା ଯୁବସମାଜ ଦ୍ୱାରା ଶାନ୍ତି ପ୍ରତିଷ୍ଠା ।
Kanak News is now on WhatsApp
Join and get latest news updates delivered to you via WhatsApp
୧୭ ଡିସେମ୍ବର ୧୯୯୯ରେ ଜାତିସଂଘ ପକ୍ଷରୁ ପ୍ରତିବର୍ଷ ଅଗଷ୍ଟ ୧୨କୁ ଆନ୍ତର୍ଜାତୀୟ ଯୁବଦିବସ ଭାବେ ପାଳନ କରିବାକୁ ଘୋଷଣା କରାଯାଇଥିଲା । ସେବେଠାରୁ ଏହି ଦିବସ ପାଳନ କରାଯାଉଛି । ଯୁବସମାଜ ପ୍ରତି ବିଶ୍ୱସ୍ତରରେ ଦୃଷ୍ଟି ନିକ୍ଷେପ କରିବା ଏହିଦିନର ମୂଳ ଉଦ୍ଦେଶ୍ୟ । ଚଳିତ ବର୍ଷ ଯୁବସମାଜ ଦ୍ୱାରା ଶାନ୍ତିି ପ୍ରତିଷ୍ଠାକୁ ଗୁରୁତ୍ୱ ଦିଆଯାଇଛି । ଏନେଇ ଯୁବକମାନଙ୍କୁ ଆହ୍ୱାନ ଦିଆଯାଇଛି ।
ଅନ୍ୟପଟେ ଭାରତରେ ଜାତୀୟ ଯୁବଦିବସର ତାରିଖ ଭିନ୍ନ । ଅଗଷ୍ଟ ୧୨ ତାରିଖରେ ଆନ୍ତର୍ଜାତୀୟ ଯୁବଦିବସ ପାଳନ ଭଳି ଜାନୁଆରୀ ୧୨ ତାରିଖରେ ଦେଶରେ ଜାତୀୟ ଯୁବଦିବସ ପାଳନ କରାଯାଉଛି । ସ୍ୱାମୀ ବିବେକାନନ୍ଦଙ୍କ ଜନ୍ମଦିବସକୁ ଜାତୀୟ ଯୁବଦିବସ ଭାବେ ପାଳନ କରିବା ନେଇ ୧୯୮୪ରେ ଭାରତ ସରକାର ଘୋଷଣା କରିବା ପରେ ୧୯୮୫ ଠାରୁ ଏହାକୁ ପାଳନ କରାଯାଉଛି । ଦେଶ ଜନସଂଖ୍ୟାରେ ୧୩ରୁ ୩୫ବର୍ଷ ବୟସ୍କଙ୍କ ସଂଖ୍ୟା ପ୍ରାୟ ୪୦ ପ୍ରତିଶତ । ତେଣୁ ଦେଶ ଗଠନରେ ଯୁବସମାଜର ଭୁମିକା ଗୁରୁତ୍ୱପୂର୍ଣ୍ଣ ।
ତେବେ ଭାରତରେ ଯୁବସମାଜ ଆଗରେ କିଛି ପ୍ରମୁଖ ଆହ୍ୱାନ ରହିଛି । ଗୁଣାତ୍ମକ ଶିକ୍ଷା ପ୍ରଦାନ ଓ ଏହାର ଉପଯୋଗ ଉପରେ ଗୁରୁତ୍ୱାରୋପ କରାଯାଇପାରେ । କାରଣ ଦେଶର ଅନେକ ସ୍ଥାନରେ ଗୁଣାତ୍ମକ ଶିକ୍ଷା ପ୍ରଦାନ କରାଯାଇପାରୁନାହିଁ । ଉତ୍ତମ ଶିକ୍ଷା ହିଁ ଏକ ରାଷ୍ଟ୍ର ନିର୍ମାଣର ଗୁରୁତ୍ୱପୂର୍ଣ୍ଣ ଅଙ୍ଗ ।
ସେହିଭଳି ଏକ ଆନ୍ତର୍ଜାତୀୟ ରିପୋର୍ଟ ଅନୁସାରେ ଭାରତରେ ବେକାରୀ ସମସ୍ୟା ବଢ଼ିଛି । ୧୫ରୁ ୨୪ ବର୍ଷ ବୟସ ମଧ୍ୟରେ ଭାରତର ପ୍ରାୟ ୯ ପ୍ରତିଶତ ଯୁବକ ଓ ୧୧ ପ୍ରତିଶତ ଯୁବତୀ ବେରୋଜଗାର ବୋଲି ଉକ୍ତ ରିପୋର୍ଟରେ ଦର୍ଶାଯାଇଛି । ୨୦୦-୧୦ର ତଥ୍ୟ ଅନୁଯାୟୀ, ଭାରତରେ ୯.୭ପ୍ରତିଶତ ପୁରୁଷ ଓ ୧୮.୭ ପ୍ରତିଶତ ମହିଳା ବେରୋଜଗାର ଅଟନ୍ତି । ତେବେ ବେରୋଜଗାର କ୍ଷେତ୍ରରେ ଶିକ୍ଷିତ ଯୁବକଯୁବତୀଙ୍କ ସଂଖ୍ୟା ଅଧିକ ବୋଲି ଏକ ସର୍ଭେ ରିପୋର୍ଟରେ ଦର୍ଶାଯାଇଛି । ଏଦିଗରେ ସଂରକ୍ଷଣ କୋଟା ଏକ ପ୍ରମୁଖ କାରଣ ବୋଲି ମଧ୍ୟ କୁହାଯାଇପାରେ । ତେବେ ଶିକ୍ଷିତ ଓ ରୋଜଗାରକ୍ଷମ ହେବା ବର୍ତ୍ତମାନର ଯୁବସମାଜ ପାଇଁ ଏକ ବଡ ଚ୍ୟାଲେଞ୍ଜ ।