ପେଟ୍ରୋଲ ପମ୍ପରେ ବାପା ଭଳି କାମ କରୁଛନ୍ତି, ଘର ଭିତରେ ମାଆର ସ୍ନେହ ଦେଉଛନ୍ତି । ସ୍ୱାମୀ ଛାଡିଦେବା ପରେ ଏବେ ଏକାଏକା ଲଢେଇ କରି ପୁଅ ସହ ଦୁଇ ଅନାଥ ପିଲାଙ୍କ ପେଟରେ ଦାନା ଦେଉଛନ୍ତି ସୁନିତା…
କନକ ବ୍ୟୁରୋ: ସେ କାହାରି ବୋଝ ହେବେନି । ଝିଅଟିଏ ବୋଲି କାହା ସାହାରା ବି ନେବେନି । ନିଜ ଗୋଡରେ ନିଜେ ଛିଡା ହେବେ, ସ୍ୱାବଲମ୍ବୀ ହୋଇ ପରିବାର ଚଳାଇବେ । ଏମିତି କିଛି ଚିନ୍ତାଧାରା ନେଇ ଘରୁ ଗୋଡ କାଢିଛନ୍ତି ସୁନିତା । ପେଟ୍ରୋଲ ପମ୍ପରେ ପେଟ୍ରୋଲ ଦେଇ ପରିବାର ପ୍ରତିପୋଷଣ କରିବା ସହ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛନ୍ତି ଅନୁଗୁଳ ବେନ୍ତପୁର ଗାଁର ସୁନିତା ପାଲ ।
Kanak News is now on WhatsApp
Join and get latest news updates delivered to you via WhatsApp
ମହିଳା ଦିବସରେ ସୁନିତାଙ୍କ ଏହି କାହାଣୀ ସମସ୍ତଙ୍କୁ ପ୍ରେରଣା ଦେବ ନିଶ୍ଚୟ ହେଲେ ଏହି କାହାଣୀ ପଛରେ ଲୁଚି ରହିଛି ଲୁହକୋହର ବତୁରା ବେଦନା । ତେଲ ଟାଙ୍କିରେ ତେଲ ଦେଉଥିବା ସୁନିତାଙ୍କ ଛାତି ଭିତରେ ଛପି ରହିଛି ଗୋଟେ ତରଳ ହୃଦୟ, ଗୋଟେ ମାଆର ମନ, ମାଆର ମମତା । ଯେଉଁ ମମତା ପାଇଁ ସେ ଆଜି ରାସ୍ତାକୁ ଓହ୍ଲାଇଛନ୍ତି । ପୁଅର ଖିଲିଖିଲି ହସ ଆଉ ମାଆ ମାଆ ଡାକ ପାଇଁ ସବୁ ସଙ୍ଘର୍ଷକୁ ସୀମାପାର କରିବାକୁ ଶକ୍ତି ପାଇଛନ୍ତି ।
୨୦୧୧ ମସିହାରେ ନିଜ ଘର ପାଖର ଯୁବକ ବିଶ୍ୱଜିତଙ୍କୁ ପ୍ରେମ ବିବାହ କରିଥିଲେ ସୁନିତା । ଭିନ୍ନ ଜାତି ହୋଇଥିବାରୁ ତାଙ୍କ ବିବାହକୁ ସ୍ୱୀକୃତି ଦେଇନଥିଲେ ପୁଅ ଘର ଲୋକେ । ତେଣୁ ଦୁହେଁ ଅନୁଗୁଳରେ ଭଡାରେ ରହିଥିଲେ । ତେବେ କିଛି ଦିନ ଗଲା ପରେ ସ୍ୱାମୀ ନିର୍ଯାତନା ଦେବା ସହ ପୁଅ ଓ ସ୍ତ୍ରୀକୁ ଛାଡି କୁଆଡେ ପଳାଇ ଯାଇଥିଲେ । ସେବେଠାରୁ ପୁଅର ସବୁ ଅଳି ଅର୍ଦଳି ବୁଝିବା ସହ ବାହାରେ ବାପ ଭଳି କାମ କରି ଘରେ ମାଆର ସ୍ନେହ ଦେଉଛନ୍ତି ସୁନିତା ।
ଜୀବନରେ ଏତେ ଜଞ୍ଜାଳ ସହି ବି କେବେ ନିଜ ପରିବାରକୁ ଅବହେଳା କରି ନାହାନ୍ତି ସୁନିତା । ସାତ ବର୍ଷର ପୁଅ ସହ ନିଜ ମାଆର ସବୁ ଦାୟିତ୍ୱ ନେଇଛନ୍ତି । ସବୁଠାରୁ ବଡ କଥା ହେଲା ଏତେ ଅଭାବ ଅନଟନରେ ଥାଇ ବି ଦୁଇ ଅନାଥ ଛୁଆଙ୍କ ମାଆ ସାଜିଛନ୍ତି ସୁନିତା । ପେଟ୍ରୋଲ ପମ୍ପରେ ଯାହା ରୋଜଗାର କରନ୍ତି ସେତିକିରେ ଚୁଲି ଜଳେ, ତେଲ ଲୁଣର ସଂସାର ଚଳିଯାଏ…
ତେବେ ସୁନିତାଙ୍କ ଏ ଦୁଃଖ ଦେଖି ପେଟ୍ରୋଲ ପମ୍ପର ମାଲିକ ତାଙ୍କୁ ଏହି କାମ ଦେଇଥିଲେ । ସକାଳ ୮ରୁ ସନ୍ଧ୍ୟା ୫ଟା ଯାଏଁ କାମ କରୁଥିବା ସୁନିତା ପେଟ୍ରୋଲ ପମ୍ପରେ ବି ସ୍ୱାମୀଙ୍କ ଫେରିବା ବାଟକୁ ଚାହିଁ ରହିଛନ୍ତି । କାଳେ କେତେବେଳେ ସ୍ୱାମୀଙ୍କ ସହ ଭେଟ ହୋଇଯିବ ଆଉ ତାଙ୍କୁ ନ୍ୟାୟ ମିଳିଯିବ । ଏଇ ଅପେକ୍ଷାରେ ଅଛନ୍ତି ସୁନୀତା…