ବଣ ପାହାଡ ଘେରା ଗାଁର ବୈଜ୍ଞାନିକ: ଆଦିବାସୀ ଇଲାକାରୁ ଇସ୍ରୋକୁ ଯାତ୍ରା, ଚର୍ଚ୍ଚାରେ ସଂଘର୍ଷର ଚକ୍ରବ୍ୟୁହ ଭେଦି ଥିବା ଓଡିଆ ପୁଅ ଅଭିମନ୍ୟୁ
କନକ ବ୍ୟୁରୋ: ଆଦିବାସୀ ଇଲାକାରୁ ଇସ୍ରୋକୁ ଯାତ୍ରା । ସିମ୍ବାଲି ଗାଁରୁ ଶ୍ରୀହରିକୋଟାର ବୈଜ୍ଞାନିକ । ବଣ ପାହାଡ ଘେରା ଏହି ନିପଟ ମଫସଲି ଗାଁରୁ କେହି ଜଣେ ଇସ୍ରୋକୁ ଯିବ ଆଉ ବୈଜ୍ଞାନିକ ହେବ ଏ କଥା କାହାକୁ ବିଶ୍ୱାସ ହେଉନଥିବ । ହେଲେ ବଣ ଭିତରେ ଫୁଟିଥିବା ବଣମଲ୍ଲୀ ବଣରେ ମଉଳି ନଯାଇ ତାର ବାସ୍ନା ସାରା ଦୁନିଆକୁ ଖେଳିଯିବା ପରେ ଏବେ ଚର୍ଚ୍ଚାର ପରିସରକୁ ଆସିଛନ୍ତି କନ୍ଧମାଳର ଅଭିମନ୍ୟୁ ।
Kanak News is now on WhatsApp
Join and get latest news updates delivered to you via WhatsApp
କନ୍ଧମାଳ ଜିଲ୍ଲା ଚକାପଦା ବ୍ଲକ ସିମ୍ବାଲି ଗାଁର ଚାଷୀ ପରିବାରରେ ଜନ୍ମ ହୋଇଥିବା ଅଭିମନ୍ୟୁ ମଲ୍ଲିକ ବର୍ତ୍ତମାନ ଶ୍ରୀହରିକୋଟା ସ୍ଥିତ ଇସ୍ରୋରେ ବୈଜ୍ଞାନିକ ଭାବେ ଅବସ୍ଥାପିତ ହୋଇଛନ୍ତି । ତେବେ ଅଭିମନ୍ୟୁଙ୍କ ଏ ସଫଳତା ପଛରେ ରହିଛି ଅନେକ ସଙ୍ଘର୍ଷର କାହାଣୀ । ଗାଁ ସ୍କୁଲରେ ପଞ୍ଚମ ଯାଏଁ ପଢିବା ପରେ ଅଭିମନ୍ୟୁ ଖଜୁରିଆପଡା ବ୍ଲକ ରଣପାଟୁଳୀ ଉଚ୍ଚ ବିଦ୍ୟାଳୟରେ ନାମ ଲେଖାଇଥିଲେ । ମାତ୍ର ଷଷ୍ଠ ଶ୍ରେଣୀରେ ଭଲ ମାର୍କ ନରହିବା ପରେ ଅଭିମନ୍ୟୁ ନିଜ ଜୀବନର ଲକ୍ଷ୍ୟ ସ୍ଥିର କରିଥିଲେ ଆଉ ସଫଳତା ପାଇଥିଲେ ।
ତେବେ ପିଲା ବେଳେ ହଳଦୀ ଚାଷ କରି ପାଠ ପଢିଥିବା ଅଭିମନ୍ୟୁ ଦୃଢ ଇଚ୍ଛାଶକ୍ତି, ନିଷ୍ଠା ଓ ଅଦମ୍ୟ ଉଦ୍ୟମ ବଳରେ ଆଜି ଏ ସ୍ଥାନରେ ପହଞ୍ଚିଥିବା କହିଛନ୍ତି । ଘରର ଆର୍ଥିକ ସ୍ଥିତି ଭଲ ନଥିବାରୁ ଅଭିମନ୍ୟୁ ପାଠ ପଢା ବେଳେ ଛୋଟ ଚାକିରି କରି ଏମଟେକ ପାସ କରିଥିଲେ ଆଉ ଶ୍ରୀହରିକୋଟା ସ୍ପେସ୍ ସେଣ୍ଟରକୁ ମନୋନୀତ ହୋଇଥିଲେ ।
ତେବେ ଜୀବନରେ ଚାକିରି ପାଇଁ ନୁହେଁ ବରଂ କିଛି ଜାଣିବା ପାଇଁ ପାଠ ପଢିବା ଦରକାର ବୋଲି ଅଭିମନ୍ୟୁ କହିଛନ୍ତି । ଆଦିବାସୀ ଇଲାକାରୁ ଇସ୍ରୋ ବୈଜ୍ଞାନିକ ହୋଇଥିବା ଅଭିମନ୍ୟୁଙ୍କ ପାଇଁ କେବଳ କନ୍ଧମାଳ ନୁହେଁ ବରଂ ସାରା ଓଡିଶା ଗର୍ବ କରୁଛି ।