ନିମ୍ନମାନର ଅସ୍ତ୍ରଶସ୍ତ୍ରକୁ ନେଇ ଭାରତୀୟ ସେନା ଖପ୍ପା । ସେନା ପ୍ରତିରକ୍ଷା ମନ୍ତ୍ରାଳୟ ସହ ଆଲୋଚନା ।
ନିମ୍ନମାନର ଯୁଦ୍ଧାସ୍ତ୍ର ବ୍ୟବହାର କାରଣରୁ ଅନେକ ଦୁର୍ଘଟଣା ଘଟୁଛି ।
କନକ ବ୍ୟୁରୋ: ଅସ୍ତ୍ରଶସ୍ତ୍ରକୁ ନେଇ ଚିନ୍ତାରେ ଭାରତୀୟ ସେନା । ନିମ୍ନମାନର ଯୁଦ୍ଧାସ୍ତ୍ର ବ୍ୟବହାର କାରଣରୁ ଅନେକ ଦୁର୍ଘଟଣା ଘଟୁଛି । ଯାହାକୁ ନେଇ ଭାରତୀୟ ସେନାର ଚିନ୍ତା ବଢିଛି । ବଡ କଥା ହେଉଛି ଏହି ସବୁ ଅସ୍ତ୍ରଶସ୍ତ୍ରକୁ ଅର୍ଡିନାନ୍ସ ଫ୍ୟାକ୍ଟ୍ରି ବୋର୍ଡ ପ୍ରସ୍ତୁତ କରିଥାଏ । ଏହି ବୋର୍ଡ ଭାରତ ସରକାରଙ୍କ ଅଧିନରେ କାମ କରୁଛି । ସେନାରେ ଥିବା ଟ୍ୟାଙ୍କ, ତୋପ ଓ ଏୟାର ଡିଫେନ୍ସ ଗନ୍ ଭଳି ଯୁଦ୍ଧ ଉପକରଣ ଯୋଗାଣ କରିଥାଏ । ତେବେ ନିମ୍ନମାନର ଯୁଦ୍ଧାସ୍ତ୍ର ବାବଦରେ ସେନା ପ୍ରତିରକ୍ଷା ମନ୍ତ୍ରାଳୟ ସହ ଆଲୋଚନା କରିଛି ।
Kanak News is now on WhatsApp
Join and get latest news updates delivered to you via WhatsApp
ମାନ କମୁଥିବାରୁ ଦୁର୍ଘଟଣା ଘଟୁଛି ଏବଂ ଅନେକ ଯବାନଙ୍କ ଜୀବନ ମଧ୍ୟ ଚାଲିଯାଉଛି ବୋଲି ସେନା ପକ୍ଷରୁ କୁହାଯାଇଛି । ଏସବୁ ପରେ ସେନାର ନିଜସ୍ୱ ଗୋଳାବାରୁଦ ଉପରେ ଭରସା କମୁଥିବାର ଦେଖିବାକୁ ମିଳିଛି । ବର୍ଷକୁ ପାଖାପାଖି ୧୯ହଜାର କୋଟି ଟଙ୍କାର କାରବାର ହେଉଥିବା ଏହି ବୋର୍ଡର ସାରା ଦେଶରେ ପ୍ରାୟ ୪୧ଟି କାରଖାନା ରହିଛି । ଭାରତୀୟ ସେନାରେ ଥିବା ୧୨ଲକ୍ଷ ସୈନିକଙ୍କ ପାଇଁ ଆବଶ୍ୟକୀୟ ଅସ୍ତ୍ରଶସ୍ତ୍ର ଦେବାର ଏହା ପ୍ରମୁଖ ଭୂମିକା ଗ୍ରହଣ କରିଥାଏ । ତେବେ ଏହାର ମାନ ଏବେ କମିଯାଉଥିବା ସେନା ପକ୍ଷରୁ କୁହାଯାଉଛି । ୧୦୫ଏମଏମ ଇଣ୍ଡଇଆନ ଫିଲ୍ଡ ଗନ୍, ୧୦୫ଏମଏମ ଲାଇଟ ଫିଲ୍ଡ ଗନ୍, ଆଦି ଗନରେ ଅଧିକ ଦୁର୍ଘଟଣା ଘଟୁଛି । ସେହିପରି ଟି-୭୨, ଟି-୯୦ ଓ ଅର୍ଜୁନ ଟ୍ୟାଙ୍କର ନିୟମିତ ଦୁର୍ଘଟଣା ଘଟୁଥିବା ନେଇ ସେନା ପକ୍ଷରୁ ପ୍ରତିରକ୍ଷା ମନ୍ତ୍ରାଳୟକୁ କୁହାଯାଇଛି ।