ସର୍ଜିକାଲ ଷ୍ଟ୍ରାଇକର ସବୁଠୁ ବଡ଼ ସତ ! ସେନାର ଜାଲରେ ଫସିଲେ ପାକିସ୍ତାନୀ ଯବାନ
କନକ ବ୍ୟୁରୋ : ପାକ୍ ଅଧିକୃତ କାଶ୍ମୀରରେ ସର୍ଜିକାଲ୍ ହମଲା ପରେ ନଜର ଆସିଛି ଭାରତର ପରିବର୍ତିତ ରଣନୀତି । ପୂର୍ବରୁ ରକ୍ଷଣାତ୍ମକ ଆଭିମୁଖ୍ୟ ଦେଖାଉଥିବା ସେନା ଦରକାର ପଡ଼ିଲେ ଆକ୍ରମଣାତ୍ମକ ନୀତି ଆପଣାଇବ ଓ 
ପାକିସ୍ତାନକୁ କଡ଼ା ଜବାବ ଦେବ ଏହା ପୁଣିଥରେ ସ୍ପଷ୍ଟ ହୋଇଛି । ବୀର ଯବାନଙ୍କ ବଳିଦାନର ୪୮ ଘଂଟା ନପୁରୁଣୁ ସେନା ଏହାର ବଦଲା ନେବା ପରିବର୍ତିତ ରଣନୀତି ଆଡ଼କୁ ଈଶାରା ଦେଇଛି । ପିଓକେର ବଲୁଚ୍ ୟୁନିଟ୍ ୧୨ ଡିଭିଜନ୍ ପୋଷ୍ଟରେ ଭାରତୀୟ ଯବାନ୍ ସର୍ଜିକାଲ ହମଲା କରିବା ପାକିସ୍ତାନର ଚିନ୍ତା ବଢ଼ାଇଥିବା ବେଳେ ଏହା ସେନାର ମନୋବଳକୁ ବୃଦ୍ଧି କରିଛି ।
Kanak News is now on WhatsApp
Join and get latest news updates delivered to you via WhatsApp
ଅସ୍ତ୍ରଶସ୍ତ୍ରରେ ସୁସଜ୍ଜିତ ଭାରତୀୟ କମାଣ୍ଡୋ ଯେତେବେଳେ ପ୍ରବେଶ କରୁଥିଲେ ପିଓକେ ଭିତରକୁ ଏହାର ସାମାନ୍ୟ ଆଭାସ୍ ବି ପାଇନଥିଲା ପାକିସ୍ତାନ । ଭାରତୀୟ କମାଣ୍ଡୋ ଖଂଜିଥିବା ଆଇଇଡି ବା ମାରାତ୍ମକ ବିସ୍ଫୋରକ ଧମାକା କରିବା ପରେ ଚେତା ଆସିଥିଲା ପାକ୍ ଯବାନଙ୍କର । ତେବେ ଆତ୍ମରକ୍ଷା ଓ ପ୍ରତି ଆକ୍ରମଣର ଅଡୁଆ ଜାଲରେ ନିଜେ ହିଁ ଛନ୍ଦି ହୋଇଥିଲା ପାକିସ୍ତାନ ଓ ସର୍ଜିକାଲ ହମଲା ହୋଇଥିଲା ସଫଳ ।
ଭାରତ ବିରୁଦ୍ଧରେ ପାକିସ୍ତାନ ଛଦ୍ମଯୁଦ୍ଧର ସେନା ଉଚିତ ଜବାବ ଦେଉଥିବା ବେଳେ କୂଟନୈତିକ ସ୍ତରରେ ମଧ୍ୟ ତାକୁ ବାସନ୍ଦ କରିବା ଜାରି ରହିଛି । ଅନ୍ତର୍ଜାତୀୟ ସ୍ତରରେ ପାକିସ୍ତାନକୁ ଆତଙ୍କୀ ରାଷ୍ଟ୍ରର ଘୋଷଣା କରିବା ସହ ପାକ୍ ପ୍ରାୟୋଜିତ ଆତଙ୍କରେ ପୂର୍ଣ୍ଣଚ୍ଛେଦ ପକାଇବାକୁ ଭାରତ ପ୍ରତିବଦ୍ଧ । ଏଭଳି ସ୍ଥିତିରେ ଭାରତୀୟ ସେନାର ଆକ୍ରମଣାତ୍ମକ ଆଭିମୁଖ୍ୟ ପାକିସ୍ତାନ ପାଇଁ ଚିନ୍ତାର କାରଣ ପାଲଟିଛି । ସେହିପରି ଜମ୍ମୁ କାଶ୍ମୀରରେ ଅପରେସନ୍ ଅଲଆଉଟ୍ ଆତଙ୍କବାଦୀଙ୍କ ନିଦ ହଜାଇଛି । ଏବେ ସର୍ଜିକାଲ ହମଲା ପରେ ସେନା ପାକିସ୍ତାନ ଦମନରେ ପଛକୁ ହଟିବନାହିଁ ପୁଣି ସ୍ପଷ୍ଟ ହୋଇଛି ।