ଡ଼େବ୍ୟୁ ଟେଷ୍ଟରେ ଫେଲ ମାରିଲା ଆଫଗାନିସ୍ତାନ! ଇନିଂସ ଓ ୨୬୨ ରନରେ ବିଜୟ ହାସଲ କଲା ଟିମ୍ ଇଣ୍ଡିଆ । ଗୋଟିଏ ଦିନରେ ଆଫଗାନୀ ଟିମକୁ ଦୁଇଥର ଅଲଆଉଟ କଲା ଭାରତ
ଡ଼େବ୍ୟୁ ଟେଷ୍ଟ ମ୍ୟାଚରେ ଫେଲ ମାରିଲା ଆଫଗାନିସ୍ତାନ । ବାଙ୍ଗାଲୋର ଟେଷ୍ଟରେ ଆଫଗାନିସ୍ତାନ ବିପକ୍ଷରେ ଏକ ବଡ଼ ବିଜୟ ହାସଲ କରିଛି ଭାରତ । ଇନିଂସ ଓ ୨୬୨ ରନର ବଡ଼ ବ୍ୟବଧାନରେ ଆଫଗାନିସ୍ତାନକୁ ପରାସ୍ତ କରିଛି ଟିମ୍ ଇଣ୍ଡିଆ । ଆଫଗାନିସ୍ତାନର ପର୍ଦାପଣ ମ୍ୟାଚର ଖୁସିକୁ ୨୬୨ ରନରେ ହରାଇ ଭାରତ ଦୁଃଖରେ ପରିଣତ କରି ଦେଇଛି । ସବୁଠୁ ବଡ଼ କଥା ହେଲା, ମାତ୍ର ଦୁଇ ଦିନ ମଧ୍ୟରେ ଏହି ଟେଷ୍ଟ ମ୍ୟାଚଟି ସମାପ୍ତ ହୋଇଛି । ଆଉ ଗୋଟିଏ ଦିନରେ ଆଫଗାନିସ୍ତାନକୁ ଦୁଇ ଥର ଅଲଆଉଟ କରି ଇତିହାସ ରଚିଛି ଭାରତ । ୧୪୧ ବର୍ଷ ଟେଷ୍ଟ ମ୍ୟାଚ ଇତିହାସରେ ଚତୁର୍ଥ ଥର ପାଇଁ ଏଭଳି ଦେଖିବାକୁ ମିଳିଛି ଯେତେବେଳେ କୌଣସି ଟିମ ଗୋଟିଏ ଦିନ ମଧ୍ୟରେ ଦୁଇ ଥର ଅଲଆଉଟ ହୋଇଛି । ଏହା ପୂର୍ବରୁ ଭାରତ ଓ ଜିମ୍ବାୱେ ନାଁରେ ଏହି ରେକର୍ଡ ରହିଛି ।
Kanak News is now on WhatsApp
Join and get latest news updates delivered to you via WhatsApp
ବାଙ୍ଗାଲୋର ଟେଷ୍ଟ ମ୍ୟାଚରେ ଭାରତ ଟସ୍ ଜିତି ପ୍ରଥମେ ବ୍ୟାଟିଂ କରିବା ସହ ପ୍ରଥମ ଇନିଂସରେ ୪୭୪ ରନର ବିଶାଳ ସ୍କୋର ଛିଡ଼ା କରିଥିଲା । ଜବାବରେ ଆଫଗାନିସ୍ତାନ ପ୍ରଥମ ଇନିଂସରେ ମାତ୍ର ୧୦୯ ରନରେ ଅଲଆଉଟ ହୋଇଥିଲା । ଆଫଗାନିସ୍ତାନର ବ୍ୟାଟିଂ ମେରୁଦଣ୍ଡକୁ ଭାରତର ଷ୍ଟାର ସ୍ପିନର ଅଶ୍ୱିନ ଭାଙ୍ଗି ଦେଇଥିଲେ । ପ୍ରଥମ ଇନିଂସରେ ୪ଟି ୱିକେଟ ନେଇ ସ୍ପିନ ଯାଦୁଗରୀ ଦେଖାଇଥିଲେ ଅଶ୍ୱିନ । ପ୍ରଥମ ଇନିଂସରେ ୧୦୯ ରନରେ ଅଲଆଉଟ ହେବା ପରେ ଆଫଗାନିସ୍ତାନକୁ ଫଲୋଅନ ଦେଇଥିଲେ ଭାରତର ଅଧିନାୟକ ଆଜିଙ୍କ୍ୟ ରାହାଣେ । ଦ୍ୱିତୀୟ ଇନିଂସରେ ମଧ୍ୟ ଆଫିଗାନିସ୍ତାନର ବିପର୍ଯ୍ୟୟ ଦେଖିବାକୁ ମିଳିଥିଲା । ଭାରତର ଯାଦୁଗରୀ ସ୍ପିନର ରବିନ୍ଦ୍ର ଜାଡ଼େଜାଙ୍କ ଆଗରେ ସରେଣ୍ଡର କରିଥିଲେ ଆଫଗାନ ବ୍ୟାଟସମ୍ୟାନ । ଦ୍ୱିତୀୟ ଇନିଂସରେ ୪ଟି ୱିକେଟ ନେବା ସହ ଜାଡ଼େଜା ଆଫଗାନ ବ୍ୟାଟ୍ସମ୍ୟାନଙ୍କ ପାଇଁ ଘାତକ ସାଜିଥିଲେ । ମାତ୍ର ୧୦୩ ରନରେ ଆଫଗାନର ସମସ୍ତ ବ୍ୟାଟ୍ସମ୍ୟାନ ପ୍ୟାଭିଲିୟନ ଫେରିଥିଲେ ।
ଏହା ପୂର୍ବରୁ ଟସ୍ ଜିତି ଭାରତ ପ୍ରଥମେ ବ୍ୟାଟିଂ କରିଥିଲା । ପ୍ରଥମ ଇନିଂସରେ ଭାରତ ଧୂଆଁଧାର ବ୍ୟାଟିଂ କରିବା ସହ ୪୭୪ ରନର ବିଶାଳ ସ୍କୋର ଛିଡ଼ା କରିଥିଲା । ଟିମ ଇଣ୍ଡିଆର ପ୍ରଥମ ଇନିଂସରେ ଶିଖର ଧୱନ ୧୦୭ ରନ କରିଥିବା ବେଳେ ମୁରଲୀ ବିଜୟ ମଧ୍ୟ ନିଜର ୧୨ ତମ ଶତକ ପୂରଣ କରିଥିଲେ । ସେହିଭଳି ରାହୁଲ ଓ ପାଣ୍ଡ୍ୟାଙ୍କ ଅର୍ଦ୍ଧଶତକ ବଳରେ ଭାରତ ଆଫଗାନିସ୍ତାନ ଆଗରେ ରନର ପାହାଡ଼ ଛିଡ଼ା କରିଥିଲା । ଆଫଗାନିସ୍ତାନର ଯାଦୁଗରୀ ସ୍ପିନର ରସିଦ ଖାନଙ୍କୁ ନିର୍ଦ୍ଧୁମ ପିଟିଥିଲେ ଭାରତୀୟ ବ୍ୟାଟ୍ସମ୍ୟାନ । ଭାରତର ପ୍ରଥମ ଇିନଂସ ଚାଲୁଥିବା ବେଳେ ଲାଗୁଥିଲା ସତେ ଯେପରି ଟେଷ୍ଟ ମ୍ୟାଚ ହେଉନାହିଁ ଦିନିକିଆ ମ୍ୟାଚ ଚାଲିଛି । ଏହାପୂର୍ବରୁ ଭାରତ ୨୦୦୭ରେ ବାଂଲାଦେଶ ବିପକ୍ଷରେ ଇନିଂସ ଓ ୨୩୯ ରନରେ ବିଜୟ ହାସଲ କରିଥିଲା । ସେହିଭଳି ୨୦୧୭ ମସିହାରେ ଇନିଂସ ଓ ୨୩୯ ରନ ବ୍ୟବଧାନରେ ଶ୍ରୀଲଙ୍କାକୁ ମାତ୍ ଦେଇଥିଲା ଭାରତ । ତେଣୁ ଆଫିଗାନିସ୍ତାନ ବିପକ୍ଷରେ ଇନିଂସ ଓ ୨୬୨ ରନ ବିଜୟ ଭାରତ ପାଇଁ ସବୁଠୁ ବଡ଼ ବିଜୟ ।