କନକ ବ୍ୟୁରୋ : ଏକାସଙ୍ଗେ ଆତଙ୍କବାଦ ଓ ଆଲୋଚନା ସମ୍ଭବ ନୁହଁ ଦର୍ଶାଇ ଭାରତ-ପାକ୍ ବୈଦେଶିକ ମନ୍ତ୍ରୀସ୍ତରୀୟ ବାର୍ତା ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛି ଭାରତ  । ସେପଟେ ପ୍ରକାଶ ପାଇଛି ଆମେରିକାର ଆତଙ୍କ ପ୍ରଭାବିତ ଦେଶର ସୂଚୀ ଆଉ ଆତଙ୍କବାଦ ଦ୍ୱାରା ସର୍ବାଧିକ ପ୍ରଭାବିତ ହେଉଥିବା ଦେଶ ତାଲିକାର ୩ୟ ସ୍ଥାନରେ ଭାରତର ନାଁ ରହିଛି  । ଏଥିରୁ ପୁଣି ପ୍ରମାଣିତ ହୋଇଛି ଆତଙ୍କବାଦକୁ ନେଇ ପାକିସ୍ତାନର ପ୍ରକୃତ ନୀତି  ।

ଆତଙ୍କ ପ୍ରଭାବିତ ଦେଶ ତାଲିକାର ୩ୟ ସ୍ଥାନରେ ଭାରତ । ପାକିସ୍ତାନର ମୁଖା ଖୋଲିଲା ଆମେରିକାର ତଥ୍ୟ । ଏକାସଙ୍ଗେ ଆତଙ୍କବାଦ ଓ ଆଲୋଚନା ସମ୍ଭବ ନୁହଁ ଦର୍ଶାଇ ଭାରତ-ପାକ୍ ବୈଦେଶିକ ମନ୍ତ୍ରୀସ୍ତରୀୟ ବାର୍ତା ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛି ଭାରତ  । ଆଉ ସେପଟେ ପ୍ରକାଶିତ ହୋଇଛି ଆମେରିକାର ଆତଙ୍କ ପ୍ରଭାବିତ ରାଷ୍ଟ୍ର ତାଲିକା  । ସୂଚୀର ୩ୟ ସ୍ଥାନରେ ଭାରତ ରହିବା ପାକିସ୍ତାନ ଆଡ଼କୁ ଉଠାଇଛି ଆଙ୍ଗୁଳି  । ସେହିପରି ଦେଶରେ ମାଓ ହିଂସା ବଢ଼ିଥିବା ନେଇ ବି ଆମେରିକା ବିଦେଶ ମନ୍ତ୍ରାଳୟ ଦେଇଛି ତଥ୍ୟ  ।

ଦେଖନ୍ତୁ କ’ଣ କହୁଛି ଆମେରିକା ବିଦେଶ ମନ୍ତ୍ରାଳୟର ତଥ୍ୟ ?

୧. ଇରାକ୍ ଓ ଆଫଗାନିସ୍ଥାନ ପରେ ଭାରତ ହେଉଛି ୩ୟ ସର୍ବାଧିକ ଆତଙ୍କ ପ୍ରଭାବିତ ଦେଶ  ।

୨. ୨୦୧୭ରେ ଜାମ୍ମୁ କାଶ୍ମୀରରେ ଆତଙ୍କବାଦ ଘଟଣାରେ ୨୪ ପ୍ରତିଶତ ବୃଦ୍ଧି ଘଟିଛି  ।

୩. ୨୦୧୭ରେ ହୋଇଥିବା ୮୬୦ ଆତଙ୍କୀ ହମଲାର ୨୫ ପ୍ରତିଶତ କେବଳ କାଶ୍ମୀରରେ ଘଟିଛି  ।

୪. ଭାରତରେ ଆତଙ୍କବାଦ ଜନିତ ମୃତ୍ୟୁ ସଂଖ୍ୟାରେ ୮୯ ପ୍ରତିଶତ ବୃଦ୍ଧି ଘଟିଛି  ।

୫. ମାଓ ସଙ୍ଗଠନ ହେଉଛି ବିଶ୍ୱର ୪ର୍ଥ ସବୁଠୁ ବିପଜ୍ଜନକ ଆତଙ୍କବାଦୀ ସଙ୍ଗଠନ  ।

୬. ଭାରତରେ ହେଉଥିବା ହିଂସାର ୫୩ ପ୍ରତିଶତ କେବଳ ମାଓ ସଙ୍ଗଠନ ଦ୍ୱାରା ହୋଇଥାଏ  ।

୭. ୨୦୧୬ରୁ ୨୦୧୭ ମଧ୍ୟରେ ଭାରତରେ ମାଓ ହିଂସାରେ ହ୍ରାସ ଘଟିଛି  ।

କାଶ୍ମୀର ଘାଟିରେ ବଢ଼ିଚାଲିଛି ଆତଙ୍କବାଦ ଆଉ ଏହାର ମୁହଁତୋଡ଼ ଜବାବ୍ ଦେଉଛି ଭାରତ  । ଏହି କ୍ରମରେ କାଶ୍ମୀର ଘାଟିରେ ଅପରେସନ୍ ଅଲଆଉଟକୁ ଜୋରଦାର୍ କରାଯାଇଛି  । କାଶ୍ମୀର ବାନ୍ଦିପୋରା ସେକ୍ଟରରେ ଶୁକ୍ରବାର ୫ଜଣ ଲସ୍କର୍ ଆତଙ୍କୀ ନିପାତ୍ ହୋଇଥିବା ବେଳେ ତଲାସି ଜାରି ରଖିଛି ସେନା  । ଅଶାନ୍ତ କାଶ୍ମୀରରେ ରକ୍ତର ଖେଳ ଚାଲିଥିବା ବେଳେ ଭାରତ-ପାକିସ୍ତାନ ବୈଦେଶିକ ମନ୍ତ୍ରୀସ୍ତରୀୟ ବାର୍ତ୍ତା ସମ୍ଭବ ନୁହଁ ବୋଲି ଭାରତ ସ୍ପଷ୍ଟ ଜଣାଇଦେଇଛି  । କାଶ୍ମୀରରେ ଆତଙ୍କବାଦ, ସୀମାରେ ଅସ୍ତ୍ରବିରତିର ବାରମ୍ବାର ଉଲ୍ଲଂଘନ ଓ ଅନୁପ୍ରବେଶ ଉଦ୍ୟମ ପାକିସ୍ତାନର ଅସଲ ଆଦର୍ଶକୁ ପଦାରେ ପକାଇଛି  ।