କନକ ବ୍ୟୁରୋ : ଅର୍ଥନୈତିକ କ୍ଷେତ୍ରରେ ଭାରତ ବିଶ୍ୱର ଷଷ୍ଠ ସର୍ବବୃହତ ଦେଶ । ବିଶ୍ୱବ୍ୟାଙ୍କ ପକ୍ଷରୁ ପ୍ରକାଶ ପାଇଥିବା ସର୍ଭେ ରିପୋର୍ଟରୁ ଏହା ଜଣାପଡିଛି । ୨୦୧୭ ଭିତରେ ଭାରତ ବିଶ୍ୱର ଷଷ୍ଠ ଅର୍ଥନୈତିକ ବିକାଶଶୀଳ ଦେଶ ଭାବେ ଉଭା ହୋଇଛି । ଏ କ୍ଷେତ୍ରରେ ଭାରତ ଫ୍ରାନ୍ସକୁ ପଛରେ ପକାଇଛି । ଷଷ୍ଠ ସ୍ଥାନରେ ଭାରତ ଥିବାବେଳେ ସପ୍ତମ ସ୍ଥାନରେ ରହିଛି ଫ୍ରାନ୍ସ । ୨୦୧୭ରେ ଭାରତର ସଫଳ ଘରୋଇ ଉତ୍ପାଦ ଜିଡିପି ୨.୫୯୭ ଟ୍ରିଲିଅନ ଡଲାରରେ ପହଞ୍ଚିଥିବା ବେଳେ ଫ୍ରାନ୍ସର ଜିଡିପି ହାର ରହିଛି ୨.୫୮୨ ଟ୍ରିଲିଅନ ଡଲାର ।

ବିଶ୍ୱ ବ୍ୟାଙ୍କର ରିପୋର୍ଟ ଅନୁଯାୟୀ, ଭାରତରେ କିଛି ମାସ ପର୍ଯ୍ୟନ୍ତ ମାନ୍ଦାବସ୍ଥା ଦେଖାଦେବା ପରେ ଜୁଲାଇ ୨୦୧୭ ପରଠାରୁ ଦେଶର ଅର୍ଥବ୍ୟବସ୍ଥା ସୁଦୃଢ ହେଉଥିବା ଦେଖିବାକୁ ମିଳିଛି ବୋଲି ରିପୋର୍ଟରେ ଦର୍ଶାଯାଇଛି । ଭାରତର ଜନସଂଖ୍ୟା ପାଖାପଖି ୧୪୩ କୋଟି ହୋଇଥିବାବେଳେ ଫ୍ରାନ୍ସର ଜନସଂଖ୍ୟା ୬୭ କୋଟି ରହିଛି । ତେବେ ଏଥିରେ କୁହାଯାଉଛି ଯେ ୧୩୪ କୋଟି ଜନସଂଖ୍ୟାବହୁଳ ଭାରତ ବିଶ୍ୱର ସବୁଠୁ ଅଧିକ ଜନସଂଖା ବିଶିଷ୍ଟ ଦେଶ ହେବାକୁ ଯାଉଛି । ଏକ ଦଶନ୍ଧି ଭିତରେ ଭାରତ ତାର ଘରୋଇ ଉତ୍ପାଦକୁ ଦୁଇ ଗୁଣା କରିବାରେ ସଫଳ ହୋଇଛି । ତେବେ ଏ କ୍ଷେତ୍ରରେ ଚୀନ ପଛରେ ପଡିଥିଲେ ସୁଦ୍ଧା ଏସିଆରେ ଏକ ମହତ୍ୱପୂର୍ଣ୍ଣ ଅର୍ଥନୈତିକ ଦେଶ ଭାବେ ଆଗକୁ ବଢିବାର ଆଶା କରାଯାଉଛି ।