ଭାରତ ହେବ ବିଶ୍ୱର ତୃତୀୟ ବୃହତ ଆର୍ଥିକ ଶକ୍ତି
କନକ ବ୍ୟୁରୋ : ଭାରତର ଡିଜିପି ଅଭିବୃଦ୍ଧି ଦରକୁ ନେଇ ଚର୍ଚ୍ଚା ଚାଲିଥିବା ବେଳେ ଆଗାମୀ ୧୦ ବର୍ଷ ଭିତରେ ଭାରତ ବିଶ୍ୱର ତୃତୀୟ ଆର୍ଥିକ ମହାଶକ୍ତି ହେବ ବୋଲି ଆକଳନ କରିଛି ଏଚଏସବିସି । ବିଶ୍ୱ ଅର୍ଥନୀତି ଉପରେ କାର୍ଯ୍ୟ କରୁଥିବା ଆନ୍ତର୍ଜାତୀକ ବିତ୍ତୀୟ ସଂସ୍ଥା ଏଚଏସବିସି (ହଙ୍ଗକଙ୍ଗ ଆଣ୍ଡ ସାଂଘାଇ ବ୍ୟାଙ୍କିଙ୍ଗ କର୍ପୋରେସନ ଲିମିଟେଡ ) ତାର ରିପୋର୍ଟରେ ଭାରତର ଅର୍ଥନୀତି ଆଗାମୀ ୧୦ ବର୍ଷ ଭିତରେ ଦୃତ ଅଭିବୃଦ୍ଧି କରିବ ବୋଲି ଭବିଷ୍ୟବାଣୀ କରିଛି ।
Kanak News is now on WhatsApp
Join and get latest news updates delivered to you via WhatsApp
ଅନେକ ଅର୍ଥଶାସ୍ତ୍ରୀ ଭାରତର ଅର୍ଥନୀତିକୁ ନେଇ ନାନା ମତ ପ୍ରକାଶ କରୁଥିବା ବେଳେ ଏଚଏସବିସି ତାର ରିପୋର୍ଟରେ କହିଛି ଭାରତର ବଜାର ଏବେ ଯେଉଁ ବିକାଶସ୍ତରରେ ଗତି କରୁଛି ତାହା ଆଗାମୀ ଦଶକରେ ଦୃତ ଅଭିବୃଦ୍ଧିର ଶୀଖରସ୍ତରକୁ ଛୁଇଁବ । ଏପରିକି ଜର୍ମାନ ଓ ଜାପାନକୁ ପଛରେ ପକାଇଦେଇ ଭାରତ ବିଶ୍ୱ ଅର୍ଥନୀତିରେ ତୃତୀୟ ସ୍ଥାନ ଦଖଲ କରିବ । ଏବେ ଆମେରିକା ଏକ ନମ୍ବର ଆର୍ଥିକ ମହାଶକ୍ତି ଥିବାବେଳେ ଦ୍ୱିତୀୟରେ ଚାଇନା ଏବଂ ତୃତୀୟରେ ଜାପାନ ରହିଛନ୍ତି । ବିଶ୍ୱର ଅର୍ଥନୀତି ହାରକୁ ଦେଖିଲେ ଅଭିବୃଦ୍ଧି ହାର ବିଶ୍ୱସ୍ତରରେ ୩ ପ୍ରତିଶତ ହାରରେ ଗତି କରୁଥିବା ବେଳେ ଭାରତର ଅଭିବୃଦ୍ଧି ହାର ଗତବର୍ଷ ୭.୧ ପ୍ରତିଶତ ଥିଲା । ତେବେ ନରେନ୍ଦ୍ର ମୋଦିଙ୍କ ସରକାର ବିମୁଦ୍ରାୟନ ଏବଂ ଜିଏସଟି ଲାଗୁ କରିବା ପରେ ଗତ ତ୍ରୈମାସିକ ଅଭିବୃଦ୍ଧି ହାର କମିଯାଇ ୫.୭ ପ୍ରତିଶତ ରହିଥିଲା । ତେବେ ଏହି ଆକଳନକୁ ନେଇ ଏଚଏସବିସି ତାର ରିପୋର୍ଟରେ କହିଛି ୨୦୧୭-୧୮ ଏବଂ ୨୦୧୮-୧୯ ରେ ଭାରତ ତାର ଅର୍ଥନୀତିର ପୂର୍ବ ଟ୍ରାକକୁ ପୁଣି ଫେରିଆସିବ ।
ଏ ବର୍ଷ ଶେଷକୁ ଭାରତର ଅଭିବୃଦ୍ଧି ହାର ୬.୫ ପ୍ରତିଶତ ରହିବ ବୋଲି ଅନୁମାନ କରିଛି ଏଚଏସବିସି । ଆକଳନ ଅନୁସାରେ ଭାରତର ଅଭିବୃଦ୍ଧି ୨୦୧୮-୧୯ରେ ୭.୦ ପ୍ରତିଶତ ଏବଂ ୨୦୧୯-୨୦ରେ ୭.୬ ପ୍ରତିଶତକୁ ଛୁଇଁବ । ଭାରତରେ ସାମାଜିକ ପୁଂଜି ପର୍ଯ୍ୟାପ୍ତ ମାତ୍ରାରେ ଥିବାରୁ ଭାରତର ଦ୍ରୁତ ଅଭିବୃଦ୍ଧି ଘଟିବ ବୋଲି ଯୁକ୍ତି ରଖିଛି ଏଚଏସବିସି । ଏପରିକି ପୂର୍ବରୁ ଆନ୍ତର୍ଜାତୀକ ବିତ୍ତିୟ ସଂସ୍ଥା ମୋର୍ଗାନ ଷ୍ଟେନଲି ମଧ୍ୟ ତାର ରିପୋର୍ଟ ଅନୁସାରେ ଭାରତ ଆଗାମୀ ଦଶକରେ ଦ୍ରୁତ ଅଭିବୃଦ୍ଧି ହାସଲ କରି ବିଶ୍ୱରେ ତୃତୀୟ ଆର୍ଥିକ ମହାଶକ୍ତି ହେବ ବୋଲି ଭବିଷ୍ୟବାଣୀ କରିଥିଲା । ଭାରତର ସମୁଦାୟ ମୋଟ ଘରୋଇ ଉତ୍ପାଦନ ବା ଜିଡିପି ୬ ଟ୍ରିଲିୟନ ଡଲାର ଆଗାମୀ ଦଶକରେ ହେବ ବୋଲି କହିଥିଲା ମୋର୍ଗାନ ଷ୍ଟେନଲି ରିପୋର୍ଟ ।