ମୋଦିଙ୍କ ଚୀନ ଗସ୍ତକୁ କୂଟନୈତିକ ସଫଳତା ! ଲଦାଖର ଲାଇନ ଅଫ ଆକଚୁଆଲ କଂଟ୍ରୋଲରେ ହାତ ମିଳାଇଲେ ଭାରତ ଓ ଚୀନ ସେନା

61

କନକ ବ୍ୟୁରୋ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଚୀନ ଗସ୍ତରୁ ମିଳିଲା ଫାଇଦା । ଚୀନର ଉହାନରେ ରାଷ୍ଟ୍ରପତି ସି-ଜିନପିଙ୍ଗଙ୍କ ସହ ଅନୌପଚାରିକ ସମ୍ମିଳନୀର ଦିନର ପରେ ମିଳିଛି କୂଟନୈତିକ ସଫଳତା । ଲଦାଖର ଏଲଏସି ଅର୍ଥାତ ଲାଇନ ଅଫ ଆକଚୁଆଲ କଂଟ୍ରୋଲରେ ଭାରତ ଓ ଚୀନ ସେନା ମଧ୍ୟରେ ହୋଇଛି କଥାବାର୍ତା । ସୀମାରେ ଶାନ୍ତି ବଜାୟ ରଖିବାକୁ ଦୁଇ ଦେଶର ସେନା ଅଧିକାରୀ ବିସ୍ତୃତ ଆଲୋଚନା କରିଛନ୍ତି । ନିୟମକୁ ସମ୍ମାନ ଦେଇ ପରସ୍ପର ଭିତରେ ବିଶ୍ୱାସ ବୃଦ୍ଧି କରିବାକୁ ରାଜି ହୋଇଛନ୍ତି ।

ଏପରିକି ଉଭୟ ପରସ୍ପରର ଅଧିକ ବିଶ୍ୱାସଭାଜନ ହେବାପାଇଁ ଉଭୟ ପକ୍ଷର ସେନା ଆଗକୁ ଏଭଳି ଅଧିକରୁ ଅଧିକ ଆଲୋଚନା ପାଇଁ ସମ୍ମତି ପ୍ରକାଶ କରିଛନ୍ତି । ପ୍ରଧାନମନ୍ତ୍ରୀ ମୋଦିଙ୍କ ଚୀନ ଗସ୍ତ ପରେ ପ୍ରଥମଥର ଲାଗି ଦୁଇ ଦେଶର ସେନା ମଧ୍ୟରେ ଏଭଳି ସୌହାର୍ଦ୍ଦ୍ୟପୂର୍ଣ୍ଣ ଚର୍ଚ୍ଚା ଆଲୋଚନା ହୋଇଛି । ଗତ ସପ୍ତାହରେ ପ୍ରଧାନମନ୍ତ୍ରୀ ମୋଦିଙ୍କ ଚୀନ ଗସ୍ତ ସମୟରେ ଏଥିପାଇଁ ଚୀନ ରାଷ୍ଟ୍ରମୁଖ୍ୟଙ୍କ ସହ ସହମତି ହୋଇଥିଲା ।

ସର୍ବ ପ୍ରଥମେ ଜାଣି ରଖନ୍ତୁ ଏହାର ୮ ମାସ ତଳର ଚିତ୍ର କଣ ଥିଲା ? ଯେତେବେଳେ ଭୁଟାନର ଡୋକଲାମ ଅଂଚଳରେ ମୁହାଁମୁହିଁ ହୋଇଥିଲେ ଭାରତ ଓ ଚୀନ ସେନା । ପ୍ରାୟ ୭୩ଦିନ ଧରି ସୀମାରେ ଏଭଳି ଅଶାନ୍ତିର ଚିତ୍ର ଦୁଇ ଦେଶର ସଂପର୍କକୁ ତିକ୍ତ କରିଦେଇଥିଲା । ଯଦିଓ ଏହାପରେ କୂଟନୈତିକ ଆଲୋଚନା ମାଧ୍ୟମରେ ପରିସ୍ଥିତି ଶାନ୍ତ ହୋଇଥିଲା ଓ ମୁହାଁମୁହିଁ ସ୍ଥିତିରୁ ଓହରିଥିଲେ ଦୁଇ ଦେଶର ସେନା । ହେଲେ ସେବେଠାରୁ ଲାଇନ ଅଫ ଆକଚୁଆଲ କଂଟ୍ରୋଲରେ ଦୁଇ ସେନା ମଧ୍ୟରେ ତିକ୍ତାତା ଲାଗିରହିଥିଲା । ଆଉ ଶେଷରେ ଏହି ବିବାଦରେ ପୂର୍ଣ୍ଣଛେଦ ଟାଣିଛନ୍ତି ମୋଦି ଓ ଜିନପିଙ୍ଗ ।

ବିଶ୍ୱ ଅର୍ଥନୀତିର ଇଂଜିନିୟର ସାଜିଥିବା ଏସିଆର ଦୁଇ ବୃହତ ଶକ୍ତି ପରସ୍ପର ସହ ହାତ ମିଳାଇ ବିଶ୍ୱ ଶାନ୍ତି ପ୍ରତିଷ୍ଠା ପାଇଁ ଏକମତ ହୋଇଛନ୍ତି । ଯେଉଁଥିପାଇଁ ପ୍ରଥମେ ନିଜ ନିଜ ଭିତରେ ଥିବା ଶତ୍ରୁତାକୁ ଦୂର କରିବା ଜରୁରୀ ଥିଲା । ଆଉ ସେନା ଭିତରେ ଶାନ୍ତି କଥାବାର୍ତା ଆରମ୍ଭ କରି ମୂଳଦୁଆ ପକାଇଛନ୍ତି ନୂଆଦିଲ୍ଲୀ ଓ ବେଜିଂ ।