ବିବାଦୀୟ ଡୋକଲାମ ସୀମାରୁ କେମିତି ହଟିଲେ ସୈନ୍ୟ ? ସାମ୍ନାକୁ ଆସିଲା ପରଦା ପଛର କାହାଣୀ
କନକ ବ୍ୟୁରୋ : ୭୨ଦିନର ବଳ କଷାକଷି ପରେ ବିବାଦୀୟ ଡୋକଲାମ ସୀମାରୁ କେମିତି ହଟିଲେ ଭାରତ ଓ ଚୀନ ସୈନ୍ୟ । ସେ ନେଇ ସାମ୍ନାକୁ ଆସିଛି ରୋଚକ ତଥ୍ୟ । ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ ବିବାଦୀୟ କ୍ଷେତ୍ରରୁ ସେନା ହଟାଇବାକୁ ଦୁଇ ଦେଶର ପ୍ରଥମ କୂଟନୈତିକ ସ୍ତରୀୟ ଆଲୋଚନାରେ ପଡିଥିଲା ମୂଳଦୁଆ । କୁହାଯାଉଛି ଜି-ଟ୍ୱେଂଟି ଶିଖର ସମ୍ମିଳନୀ ଅବସରରେ ହମବର୍ଗରେ ପ୍ରଧାନମନ୍ତ୍ରୀ ମୋଦି ଓ ଚୀନ ପ୍ରଧାନମନ୍ତ୍ରୀ ସି ଜିନପିଙ୍ଗଙ୍କ ମଧ୍ୟରେ ଆଲୋଚନା ପରେ ଏନଏସଏ ସ୍ତରୀୟ ବୈଠକ ପାଇଁ ସହମତି ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଏହାପରେ ଡୋକଲାମରେ ଦୁଇ ଦେଶର ସେନା ମୁହାଁମୁହିଁ ଅବସ୍ଥାରେ ଥିବାବେଳେ ଜୁଲାଇ ୨୭ତାରିଖରେ ଆଲୋଚନା ଟେବୁଲରେ ବସିଥିଲେ ଭାରତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ଓ ଚୀନ ଷ୍ଟେଟ କାଉନସିଲର ୟାଙ୍ଗ ଜିଏଚି । ପ୍ରଥମରୁ ଖୁବ କଡା ଆଭିମୁଖ୍ୟ ରଖିଥିଲେ ଉଭୟପକ୍ଷ । ଦେଖନ୍ତୁ ଦୁହିଁଙ୍କ ଭିତରେ କିଭଳି ଥିଲା ବାର୍ତାଳାପ ।
ଏନଏସଏ ଅଜିତ ଡୋଭାଲଙ୍କୁ ଚୀନ ଷ୍ଟେଟ କାଉନସିଲର ୟାଙ୍ଗ ଜିଏଚି କଡା ଗଳାରେ ପଚାରିଥିଲେ ବିବାଦୀୟ ଡୋକଲାମ ଅଂଚଳ କ’ଣ ତୁମର? ଅର୍ଥାତ ଯେଉଁ କ୍ଷେତ୍ରକୁ ନେଇ ଏତେ ବିବାଦ ତାହା ଭାରତର କି ବୋଲି ପଚାରିଥିଲେ ଚୀନ ପ୍ରତିପକ୍ଷ । ଡୋଭାଲ ରୋକଠୋକ ଶୁଣାଇ ଦେଇଥିଲେ କ’ଣ ପ୍ରତ୍ୟେକ ବିବାଦୀୟ ଅଂଚଳ ଆପେ ଆପେ ଚୀନର ବନିଯାଏ? ବିବାଦୀୟ ଡୋକଲମ ଅଂଚଳ ଭୁଟାନର ଏବଂ ଭୁଟାନ ସହ ଚୁକ୍ତି ଅନୁଯାୟୀ ଏହାର ସୁରକ୍ଷା ଭାରତର ଦାୟିତ୍ୱ ବୋଲି ଉତ୍ତର ଦେଇଥିଲେ ଅଜିତ ଡୋଭାଲ ।
ଦୁଇ ପକ୍ଷଙ୍କ ଏହି କୂଟନୈତିକ ଆଲୋଚନା ବେଶ୍ କଡାକଡି ଭାବେ ଆରମ୍ଭ ହୋଇଥିଲେ ମଧ୍ୟ କୁହାଯାଉଛି ଭାରତର ଯୁକ୍ତି ଆଗରେ ନରମ ପଡିଥିଲା ଚୀନ । କାରଣ ଡୋକଲାମ ସୀମାରେ ଚୀନର ରାସ୍ତା ନିର୍ମାଣ ବେଜିଂ ପାଇଁ ନିତ୍ୟାନ୍ତ ଜରୁରୀ । ଆଉ ଏଥିପାଇଁ ଡୋକଲାମ ବଦଳରେ ୫ଶହ ବର୍ଗ କିଲୋମିଟରର ଅନ୍ୟ ଏକ ଜାଗା ଦେବା ପାଇଁ ଭୁଟାନକୁ ପ୍ରସ୍ତାବ ଦେଇଥିଲା ଚୀନ ।
ଏହି ପ୍ରସଙ୍ଗ ଉଠାଇ ଚୀନ ପ୍ରତିପକ୍ଷଙ୍କୁ ଘେରିଥିଲେ ଏନଏସଏ ଡୋଭାଲ । ଆଉ ଶେଷରେ କୂଟନୈତିକ ସ୍ତରରେ ଭାରତର ବିଜୟ ହେଲା ଓ ବିନା କୌଣସି ସର୍ତରେ ସେନା ହଟାଇବା ସହ ସ୍ଥିତାବସ୍ଥା ବଜାୟ ରଖିବାକୁ ରାଜି ହୋଇଥିଲା ଚୀନ । ଯେଉଁଥିପାଇଁ ଭାରତୀୟ ବୈଦେଶିକ ମନ୍ତ୍ରାଳୟ ମଧ୍ୟ ଡୋକଲାମ ସୀମାରୁ ସେନା ହଟାଇବା ନେଇ ପ୍ରେସ ରିଲିଜ ଜାରି କରିଥିଲା ।