ପିଲାଠୁ ବୁଢ଼ା ଏକାଠି ହେଲେ । ଯେଉଁଠି ଜୁଇ ଜଳେ , ସେଇଠି ଦୀପ ଜାଳିଲେ । ଦୀପାବଳିର ନିଆରା ଉଦାହରଣ ସୃଷ୍ଟି କଲେ ଡିଙ୍ଗର ଗ୍ରାମବାସୀ ।
କନକ ବ୍ୟୁରୋ: ଦୀପାବଳି କହିଲେ ଆଜିର ସମାଜ ଆତସବାଜିର ଉତ୍ସବ ବୋଲି ମନେ କରନ୍ତି । ଆଉ ବିଭିନ୍ନ ସ୍ଥାନରେ ଦାମୀ ଦାମୀ ବାଣ ଫୁଟାଇବା ପାଇଁ ସତେ ଯେମିତି ପ୍ରତିଯୋଗିତା ଲାଗିଥିବା ଦେଖିବାକୁ ମିଳେ । ହେଲେ ଯେଉଁଠି ଜୁଇ ଜଳେ ସେଠି ଦୀପାବଳିର ଆୟୋଜନ ହେଉଥିବା କେବେ ଦେଖିଛନ୍ତି କି? ତେବେ ଏଭଳି କିଛି ନିଆରା ଦୀପାବଳି ଉତ୍ସବ ପାଳନର ପରାମ୍ପରା ଦେଖିବାକୁ ମିଳିଛି ଖୋର୍ଦ୍ଧା ଜିଲ୍ଲା ବେଗୁନିଆ ଅନ୍ତର୍ଗତ ଡିଙ୍ଗର ଗାଁରେ ।
Kanak News is now on WhatsApp
Join and get latest news updates delivered to you via WhatsApp
ଛିଣ୍ଡା ମଶିଣା, ଭଙ୍ଗା ହାଣ୍ଡି, ଦରପୋଡ଼ା କାଠ, ଖଣ୍ଡିଆ ଲୁଗା ସାଙ୍ଗକୁ ବାଉଁଶର ଶୁନଶାନ୍ ଇଲାକା ହେଉଛି ଶ୍ମଶାନ । ସଂଜବେଳେ ସେଇ ବାଟ ଦେଇ ଚାଲିଗଲା ବେଳେ ଡରଲାଗେ । କିନ୍ତୁ ଗାଁର ସମସ୍ତଙ୍କର ବଡ଼ ଆବେଗିକ ସଂପର୍କ ଥାଏ ଏଇ ମଶାଣି ସହିତ। ଜୀବନଯାତ୍ରାର ଅନ୍ତିମ ସୋପାନ ଏଇ ମଣାଣି ଭୂଇଁରେ। ଦିକିଦିକି ଜଳୁଥିବା ଜୁଇଟିଏ ଦେଖିଲେ ଆପେ ହାତ ଯୋଡ଼ିହୋଇଆସେ । ସେଇ ମଶାଣିରେ ଦୀପାବଳୀ ଉତ୍ସବ ପାଳନର ଏକ ଅନନ୍ୟ ପରମ୍ପରାର ବାର୍ତ୍ତା ଦେଇଛନ୍ତି ଡିଙ୍ଗର ଗ୍ରାମବାସୀ ।
ଦୀପାବଳୀରେ ପୟାଶ୍ରାଦ୍ଧ ଓ ପୂର୍ବ ପୁରୁଷଙ୍କୁ ଆବାହନ କରି କାଉଁରିଆ ଜାଳି ବଡ଼ ବଡ଼ୁଆଙ୍କୁ ଆଲୁଅ ଦେଖାଇବାର ପରମ୍ପରା ଅନେକ ସ୍ଥାନରେ ଅଛି ହେଲେ ଡଙ୍ଗର ଗ୍ରାମବାସୀ ଏହାକୁ ଅଭିନବ ଉପାୟରେ ପାଳୁଛନ୍ତି । ଗତ ତିନିବର୍ଷ ହେବ ମଶାଣି ପରିସରରେ ବିଭିନ୍ନ ବୃକ୍ଷଲତା ଲଗାଇବାର ଏକ ସୁନ୍ଦର ଉଦ୍ୟମ ଆରମ୍ଭ କରିଥିଲେ ସ୍ଥାନୀୟ ଯୁବକ ବିଶ୍ୱନାଥ ମାର୍ଥା, ବିମ୍ବାଧର ମହାରଣା ଓ ସାଥୀମାନେ । ଏ ବର୍ଷ କିନ୍ତୁ ଗ୍ରାମବାସୀମାନେ ଏକାଠି ହୋଇ ଦୀପାବଳୀ ସନ୍ଧ୍ୟାରେ ଏହି ଶ୍ମଶାନରେ ପିତୃପୁରୁଷ ଓ ଦେଶର ସହିଦ ଯବାନମାନଙ୍କ ଉଦ୍ଦେଶ୍ୟରେ ସାମୂହିକ ଦୀପ ଦାନ କରିଥିଲେ।
କେଉଁ କେଉଁ ମଶାଣିରେ ସିମେଣ୍ଟର ଚାରିଟା ଖୁଣ୍ଟ ଉପରେ ଛାତଟିଏ ପକାଇ ବର୍ଷାରେ ମୁଣ୍ଡ ଗୁଞ୍ଜିବା ପାଇଁ ବ୍ୟବସ୍ଥା ହୋଇଛି । ଆଉ କେଉଁଠି ମଶାଣିକୁ ସୁନ୍ଦର କରିବା ପାଇଁ ସ୍ଥାନୀୟ ଲୋକେ ଫୁଲଗଛ ଲଗାଉଛନ୍ତି । କିନ୍ତୁ ଡିଙ୍ଗର ଗ୍ରାମବାସୀ ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ଦୀପାବଳିରେ ଏକ ଭାଇଚାରାର ବାର୍ତ୍ତା ଦେଇଛନ୍ତି । ସମାଜସେବୀ ଲଳିତ ମୋହନ ନାଗଙ୍କ ସଂଯୋଜନାରେ ଆୟୋଜିତ ଏହି କାର୍ଯ୍ୟକ୍ରମରେ ଶିକ୍ଷାବିତ୍ ରାଜକିଶୋର ପାଣିଗ୍ରାହୀ, ପ୍ରଧ୍ୟାପକ ରବୀନ୍ଦ୍ରନାଥ ପାଣିଗ୍ରାହୀ ଓ ସ୍ଥାନୀୟ ସରପଞ୍ଚ ଶିବ ପ୍ରସାଦ ଦାଶ ପ୍ରମୁଖ ବହୁ ଗଣ୍ୟମାନ୍ୟ ବ୍ୟକ୍ତି ଏଥିରେ ଯୋଗଦେଇଥିଲେ । ସୁବଠାରୁ ବଡ଼ କଥା ହେଲା, କୌଣସି ସରକାରୀ ବା ରାଜନୈତିକ ନେତାଙ୍କ ସାହାଯ୍ୟ ନ ନେଇ ସମ୍ପୂର୍ଣ୍ଣ ନିଜସ୍ୱ ଉଦ୍ୟମରେ ଗ୍ରାମବାସୀଙ୍କ ଦ୍ଵାରା ଆୟୋଜିତ ଏଭଳି ମହତ ଉଦ୍ୟମର ଭୁରିଭୁରି ପ୍ରଶଂସା କରିଛନ୍ତି ସଭିଏଁ ।