ପାକିସ୍ତାନର ପ୍ରଧାନମନ୍ତ୍ରୀ ଭାବେ ଶପଥ ନେଲେ ଇମ୍ରାନ ଖାନ୍ ! ଇସଲାମାବାଦ ପ୍ରେସିଡେଂଟ୍ ହାଉସରେ ଶପଥ ଭବ୍ୟ ସମାରୋହ ।
କନକ ବ୍ୟୁରୋ : ପାକିସ୍ତାନର ନୂଆ ପ୍ରଧାନମନ୍ତ୍ରୀ ଭାବେ ଶପଥ ନେଲେ ଇମ୍ରାନ୍ ଖାନ୍ । ବଡ ବଡ ନେତା ଓ ପୂର୍ବତନ କ୍ରିକେଟରଙ୍କ ସମେତ ଇମ୍ରାନଙ୍କ ଶପଥ ଗ୍ରହଣ ଉତ୍ସବରେ ଯୋଗ ଦେଇଛନ୍ତି କ୍ରିକେଟରରୁ ରାଜନେତା ପାଲଟିଥିବା ନଭଜ୍ୟୋତ ସିଂହ ସିଦ୍ଧୁ । ଇମ୍ରାନଙ୍କ ଶପଥ ଗ୍ରହଣ ଉତ୍ସବରେ ପାକିସ୍ତାନ ଅଧିକୃତ କାଶ୍ମୀର ମୁଖ୍ୟ ମସୁଦ ଖାନଙ୍କ ସହ ପ୍ରଥମ ଧାଡିରେ ବସିଥିଲେ ସିଦ୍ଧୁ । ଏହାପରେ ପାକ୍ ସେନାମୁଖ୍ୟ କମର ବାଜୱାଙ୍କୁ କୁଣ୍ଢାଇ ଧରି ଶୁଭେଚ୍ଛା ଜଣାଇଥିଲେ । ଯାହାକୁ ନେଇ ଭାରତରେ ସୃଷ୍ଟି ହୋଇଛି ବିବାଦ ।
Kanak News is now on WhatsApp
Join and get latest news updates delivered to you via WhatsApp
ପାକ୍ ରାଜନୀତିରେ ୨୨ ବର୍ଷର ସଂଘର୍ଷ ପରେ ଦେଶର ସବୁଠୁ ବଡ ଆସନରେ ବସିଛନ୍ତି ପୂର୍ବ କ୍ରିକେଟର ଇମ୍ରାନ ଖାନ । ପାକିସ୍ତାନର ୨୨ତମ ପ୍ରଧାନମନ୍ତ୍ରୀ ଭାବେ ଶପଥ ନେଇଛନ୍ତି ପାକିସ୍ତାନ ତେହରିକ୍ ଏ ଇନସାଫ୍ ପାର୍ଟି ମୁଖ୍ୟ । କ୍ରିକେଟ୍ ଛାଡି ରାଜନୀତିକୁ ଆସିଥିବା ଇମ୍ରାନଙ୍କ ପାଇଁ ଅପେକ୍ଷା କରି ରହିଥିଲା ପାକିସ୍ତାନର ରାଷ୍ଟ୍ରପତି ଭବନ, ଏବାନ-ଏ-ସଦନ । ଭବ୍ୟ ସମାରୋହରେ ଉର୍ଦ୍ଧୁରେ ପଦ ଓ ଗୋପନୀୟତାର ଶପଥ ପାଠ କରାଇଥିଲେ ରାଷ୍ଟ୍ରପତି ମମନୁନ୍ ହୁସେନ୍ ।
ଗୋଟିଏ ପଟେ ଆତଙ୍କବାଦୀ ଦେଶର ଟ୍ୟାଗ୍ ଅନ୍ୟପଟେ ସେନାର ଅଖଣ୍ଡ କ୍ଷମତା, ଏହାରି ଭିତରେ ଇମ୍ରାନ ସମ୍ଭାଳିଛନ୍ତି ପାକିସ୍ତାନର ପ୍ରଧାନମନ୍ତ୍ରୀ ପଦ । ଭାରତ, ଆମେରିକା ଓ ଚୀନ୍ ଭଳି ଦେଶ ସହ ସୁସଂପର୍କ ସ୍ଥାପନ, ଦେଶର ବିଗିଡିଯାଇଥିବା ଅର୍ଥନୀତିରେ ସୁଧାର, ଆତଙ୍କବାଦରୁ ମୁକ୍ତି ଏବଂ ଦେଶରେ ଲାଗିରହିଥିବା ପାନୀୟ ଜଳ ସଂକଟର ସମାଧାନ, ଏବେ ନୂଆ ପ୍ରଧାନମନ୍ତ୍ରୀଙ୍କ ଆଗରେ ଚ୍ୟାଲେଂଜ ।
ଇମ୍ରାନଙ୍କ ଶପଥ ସମାରୋହରେ ସାମିଲ ହୋଇଛନ୍ତି ଭାରତର ପୂର୍ବତନ କ୍ରିକେଟର ତଥା ସାଂସଦ ନଭଜୋତ୍ ସିଂ ସିଦ୍ଧୁ । ଶହ ଶହ ନେତା, କ୍ରିକେଟର, ଗଣମାଧ୍ୟମ ଆଗରେ ପାକ୍ ସେନାମୁଖ୍ୟ କମର ଜାଭେଦ୍ ବାଜୱାଙ୍କୁ ସିଦ୍ଧୁ କୁଣ୍ଢାଇ ଧରିଥିଲେ । ଖାଲି ସେତିକି ନୁହେଁ, ଉତ୍ସବର ପ୍ରଥମ ଧାଡିରେ ପାକିସ୍ତାନ ଅଧିକୃତ କାଶ୍ମୀର ମୁଖ୍ୟ ମସୁଦ ଖାନଙ୍କ ସହ ସିଦ୍ଧୁଙ୍କୁ ବସାଯାଇଥିଲା । ଯାହାକୁ ନେଇ ବିବାଦ ଉପୁଜିଛି ।
ସାଧାରଣ ନିର୍ବାଚନରେ ଇମ୍ରାନଙ୍କ ଦଳ ପିଟିଆଇ ୧୧୬ ଆସନରେ ବିଜୟୀ ହୋଇଥିଲା । ଇମ୍ରାନ ଖାନ୍ ପ୍ରଧାନମନ୍ତ୍ରୀ ହେବା ନିଶ୍ଚିତ ହୋଇଯାଇଥିଲା । ତେବେ ସଂଖ୍ୟା କମ୍ ଥିବାରୁ ମେଂଟର ଆବଶ୍ୟକ ଥିଲା । ଶୁକ୍ରବାର ପାକିସ୍ତାନର ନବଗଠିତ ଜାତୀୟ ପରିଷଦରେ ଇମ୍ରାନଙ୍କୁ ପ୍ରଧାନମନ୍ତ୍ରୀ ଭାବେ ନିର୍ବାଚିତ କରାଯାଇଥିଲା ।