ଭାରତୀୟ ନ୍ୟାୟିକ ଇତିହାସରେ ପ୍ରଥମ ! ସୁପ୍ରିମକୋର୍ଟର ମୁଖ୍ୟ ବିଚାରପତି ଦୀପକ ମିଶ୍ରଙ୍କ ବିରୋଧରେ ମହାଭିଯୋଗ ପ୍ରସ୍ତାବ, ଜାଣନ୍ତୁ କିପରି କାର୍ଯ୍ୟ କରେ ମହାଭିଯୋଗ ପ୍ରସ୍ତାବ
କନକ ବ୍ୟୁରୋ : ଦେଶର ଇତିହାସରେ ପ୍ରଥମ ଥର ପାଇଁ ଆଜି ଏପରି ଏକ ଘଟଣା ଘଟିଛି, ଯାହା ନ୍ୟାୟିକ ବ୍ୟବସ୍ଥା ଉପରେ ସାରାଦେଶରେ ଆଲୋଚନା ପାଇଁ ଖୋରାକ ଯୋଗାଇଛି । ସୁପ୍ରିମକୋର୍ଟଙ୍କ ପ୍ରଧାନ ବିଚାରପତିଙ୍କୁ ହଟାଇବା ଲାଗି ଏକାଠି ହୋଇଛନ୍ତି ବିରୋଧୀ । କଂଗ୍ରେସ ନେତୃତ୍ୱରେ ୭ଟି ବିରୋଧୀ ଦଳ ପ୍ରଧାନ ବିଚାରପତିଙ୍କ ବିରୋଧରେ ମହାଅଭିଯୋଗ ପ୍ରସ୍ତାବ ଆଣି ଉପରାଷ୍ଟ୍ରପତି ଭେଙ୍କିୟା ନାଇଡ଼ୁଙ୍କୁ ଦେଇଛନ୍ତି ନୋଟିସ୍ । ଏଥିରେ ୬୪ ଜଣ ସାଂସଦଙ୍କ ସ୍ୱାକ୍ଷର ରହିଛି । ସେପଟେ ବିଜେପିର ଅଭିଯୋଗ, ଦେଶର ନ୍ୟାୟିକ ବ୍ୟବସ୍ଥାକୁ ବଦନାମ କରିବାକୁ କଂଗ୍ରେସ ଚାଲ୍ କରୁଛି । ରାଜନୀତିର ଚକ୍ରବ୍ୟୁହ ଭିତରେ ପେଶି ହୋଇଯାଇଛି ଦେଶର ନ୍ୟାୟିକ ବ୍ୟବସ୍ଥା ।
Kanak News is now on WhatsApp
Join and get latest news updates delivered to you via WhatsApp
ନ୍ୟାୟ ବ୍ୟବସ୍ଥାର ସର୍ବୋଚ୍ଚ ଅନୁଷ୍ଠାନ ସୁପ୍ରିମକୋର୍ଟଙ୍କ ଉପରେ ପ୍ରଶ୍ନ ଉଠାଇ ଦେଶର ୭ଟି ରାଜନୈତିକ ଦଳ ପ୍ରଧାନ ବିଚାରପତି ଦୀପକ ମିଶ୍ରଙ୍କୁ ପଦରୁ ହଟାଇବାକୁ ଏକାଠି ହୋଇଛନ୍ତି । ମହାଅଭିଯୋଗ ପ୍ରସ୍ତାବ ପାଇଁ ଉପରାଷ୍ଟ୍ରପତି ତଥା ରାଜ୍ୟସଭା ଅଧ୍ୟକ୍ଷ ଭେଙ୍କିୟା ନାଇଡୁଙ୍କୁ ଦିଆଯାଇଛି ନୋଟିସ୍ । କଂଗ୍ରେସ ନେତୃତ୍ୱରେ ୭ଟି ବିରୋଧୀ ଦଳର ୬୪ ଜଣ ସାଂସଦ ଏହି ନୋଟିସରେ ସ୍ୱାକ୍ଷର କରିଛନ୍ତି । କଂଗ୍ରେସ, ଏନସିପି, ସିପିଆଇ, ସିପିଏମ୍, ଏସପି, ବିଏସପି ଆଦି ୭ଟି ଦଳର ସାଂସଦମାନେ ଆଜି ଏ ନେଇ ଆଲୋଚନା କରିବା ପରେ ଉପରାଷ୍ଟ୍ରପତିଙ୍କୁ ଦେଇଛନ୍ତି ନୋଟିସ୍ । ମହାଅଭିଯୋଗ ପ୍ରସ୍ତାବ ଦେଇ ସୁପ୍ରିମକୋର୍ଟ ପ୍ରଧାନ ବିଚାରପତି ପଦରୁ ଜଷ୍ଟିସ ଦୀପକ ମିଶ୍ରଙ୍କୁ ହଟାଇବାକୁ ପାଇଁ ଦାବି କରିଛନ୍ତି ।
ମହାଅଭିଯୋଗ ପ୍ରସ୍ତାବ ଲାଗି ଲୋକସଭାରେ ସର୍ବନିମ୍ନ ୧୦୦ ସାଂସଦ ଓ ରାଜ୍ୟସଭାରେ ୫୦ ଜଣ ସାଂସଦ ଆବଶ୍ୟକ । ରାଜ୍ୟସଭାର ୬୪ ଜଣ ସାଂସଦ ଏହି ପ୍ରସ୍ତାବ ପାଇଁ ନୋଟିସ ଦେଇଥିବାରୁ ମହାଅଭିଯୋଗକୁ ଗ୍ରହଣ କରିପାରନ୍ତି ଉପରାଷ୍ଟ୍ରପତି । ତେବେ ତୃଣମୂଳ କଂଗ୍ରେସ, ଡିଏମକେ, ଟିଡିପି, ବିଜେଡି ଭଳି ପ୍ରମୁଖ ଦଳମାନେ ଏ ନେଇ ଆଭିମୁଖ୍ୟ ସ୍ପଷ୍ଟ କରିନାହାନ୍ତି । ଜଷ୍ଟିସ ଲୋୟା ମାମଲାରେ ତଦନ୍ତ କରିବାକୁ ସୁପ୍ରିମକୋର୍ଟ ମନା କରିଦେବା ପରେ ରାଜନୈତିକ ଦଳଗୁଡିକ ମେଳି କରିବା ଆରମ୍ଭ କରିଦେଇଛନ୍ତି । ଗୋଟିଏ ପଟେ କଂଗ୍ରେସ ନେତୃତ୍ୱରେ ମହାଅଭିଯୋଗ ପ୍ରସ୍ତାବ ପାଇଁ ପ୍ରସ୍ତୁତି ଚାଲିଛି । ଅନ୍ୟପଟେ ବିଜେପି କହୁଛି ଦେଶର ନ୍ୟାୟିକ ବ୍ୟବସ୍ଥାକୁ ବଦନାମ କରିବାକୁ କଂଗ୍ରେସ ଚାଲ୍ କରୁଛି ।
ମହାଅଭିଯୋଗ ପ୍ରସ୍ତାବ କ’ଣ?
ସମ୍ବିଧାନର ଧାରା ୧୨୪(୪) ଅନୁଯାୟୀ ସୁପ୍ରିମକୋର୍ଟଙ୍କ ବିଚାରପତି ଓ ପ୍ରଧାନ ବିଚାରପତିଙ୍କୁ ପଦରୁ ହଟାଇବାକୁ ହେଲେ ସଂସଦରେ ମହାଅଭିଯୋଗ ପ୍ରସ୍ତାବ ଆବଶ୍ୟକ । ଏହି ମହାଅଭିଯୋଗ ପ୍ରସ୍ତାବକୁ ଉଭୟ ରାଜ୍ୟସଭା ଓ ଲୋକସଭାର ଦୁଇ-ତୃତୀୟାଂଶରୁ ଅଧିକ ସଦସ୍ୟଙ୍କ ସମର୍ଥନ ଜରୁରୀ । ଏହାପରେ ରାଷ୍ଟ୍ରପତି ହଟାଇ ପାରିବେ ସୁପ୍ରିମକୋର୍ଟଙ୍କ ବିଚାରପତିଙ୍କୁ ।
କିପରି କାର୍ଯ୍ୟ କରେ ମହାଅଭିଯୋଗ ପ୍ରସ୍ତାବ?
ମହାଅଭିଯୋଗ ପ୍ରସ୍ତାବ ଆସିବାକୁ ହେଲେ ଲୋକସଭାରେ ୧୦୦ ଜଣ ସାଂସଦ ଓ ରାଜ୍ୟସଭାରେ ୫୦ ଜଣ ସାଂସଦଙ୍କ ସ୍ୱାକ୍ଷର ଆବଶ୍ୟକ । ଲୋକସଭାରେ ବାଚସ୍ପତି ଓ ରାଜ୍ୟସଭାରେ ଉପରାଷ୍ଟ୍ରପତି ଏହାକୁ ଗ୍ରହଣ କରିବେ । ପ୍ରସ୍ତାବ ଗ୍ରହଣ ହେଲେ ତିନି ଜଣିଆ କମିଟି ଗଠନ ହେବ । ସେଥିରେ ସୁପ୍ରିମକୋର୍ଟଙ୍କ ଜଣେ ବିଚାରପତି, ହାଇକୋର୍ଟଙ୍କ ଜଣେ ବିଚାରପତି ଏବଂ ଜଣେ ଆଇନ ବିଶାରଦ ସଦସ୍ୟ ରହିବେ । ପ୍ରସ୍ତାବରେ ଯେଉଁ ଅଭିଯୋଗ ଆସିଛି, ତାହାର ତଦନ୍ତ କରିବେ ଏହି କମିଟି । କମିଟିର ହୃଦବୋଧ ହେଲେ ସଂସଦରେ ଏହା ଆଲୋଚନା ହେବ । ଦୁଇଟି ଯାକ ସଦନରେ ଆଲୋଚନା କରାଯାଇ ଭୋଟିଂ ହେବ । ଦୁଇ-ତୃତୀୟାଂଶରୁ ଅଧିକ ସଦସ୍ୟ ପ୍ରସ୍ତାବକୁ ସମର୍ଥନ କଲେ ଏହା ପାରିତ ହୋଇ ରାଷ୍ଟ୍ରପତିଙ୍କ ଅନୁମୋଦନ ପାଇଁ ଯିବ ।