ଜଟିଳ ଚରଣରେ ପହଂଚିଲା ଚନ୍ଦ୍ରଯାନ-୨ । ଆଜି ଚନ୍ଦ୍ର କକ୍ଷ ପଥରେ କରିବ ପ୍ରବେଶ : ବେଗ ନିୟନ୍ତ୍ରଣ ନହେଲେ ଜହ୍ନପୃଷ୍ଠରେ ପିଟି ହୋଇ ଧ୍ୱଂସ ହୋଇପାରେ ଯାନ
କନକ ବ୍ୟୁରୋ : ଇସ୍ରୋ ଓ ଭାରତ ପାଇଁ ଆଜି ଗୁରୁତ୍ୱପୂର୍ଣ୍ଣ ଦିନ । ଆଜି ଚନ୍ଦ୍ରର କକ୍ଷ ପଥରେ ପ୍ରବେଶ କରିବ ଚନ୍ଦ୍ରଯାନ-୨। ସକାଳ ୮ଟାରୁ ୯ଟା ୩୦ ମିନିଟ ଭିତରେ ଭାରତର ମହାକାଶ ଯାନ ଚନ୍ଦ୍ରର କକ୍ଷ ପଥରେ ପ୍ରବେଶ କରିବ ବୋଲି ସୂଚନା ମିଳିଛି । ଆଉ ଏହି ସମୟ ଭାରତର ଚନ୍ଦ୍ର ଅଭିଯାନ ପାଇଁ ସବୁଠୁ ଗୁରୁତ୍ୱପୂର୍ଣ୍ଣ । କାରଣ ଏହି ସମୟରେ ଚନ୍ଦ୍ରଯାନ-୨ ନିଜ ଲକ୍ଷ୍ୟସ୍ଥଳର ଗୋଟିଏ ପାଦ ନିକଟକୁ ଯିବ । ପୃଥିବୀର କକ୍ଷପଥ ଛାଡିଥିବା ଏହି ମହାକାଶଯାନ ଚନ୍ଦ୍ରର କକ୍ଷପଥରେ ପ୍ରବେଶ କରିବ । ଏଥି ପାଇଁ ସମସ୍ତ ପ୍ରକାର ପ୍ରସ୍ତୁତିରେ ଲାଗିପଡିଛନ୍ତି ଇସ୍ରୋ ବୈଜ୍ଞାନିକ ।
Kanak News is now on WhatsApp
Join and get latest news updates delivered to you via WhatsApp
ଚନ୍ଦ୍ରର ଆକର୍ଷଣ ଶକ୍ତି ଅନୁସାରେ ମହାକାଶଯାନର ବେଗକୁ ନିୟନ୍ତ୍ରଣ ନକରିପାରିଲେ ଏହା ସିଧା ଚନ୍ଦ୍ରର ପୃଷ୍ଠରେ ପିଟି ହୋଇ ଧ୍ୱଂସ ହୋଇଯିବ । ତେଣୁ ଏହି ସମୟ ଉଭୟ ଚନ୍ଦ୍ରଯାନ-୨ ଓ ବୈଜ୍ଞାନିକଙ୍କ ପାଇଁ ପରୀକ୍ଷାର ସମୟ ବୋଲି କୁହାଯାଉଛି । ଆଜି ଚନ୍ଦ୍ର କକ୍ଷପଥରେ ଚନ୍ଦ୍ରଯାନ-୨ ଅବସ୍ଥାପିତ ହେବା ପରେ ଅଗଷ୍ଟ ୩୧ ଯାଏଁ ଚନ୍ଦ୍ରକୁ ପରିକ୍ରମଣ କରିବ । ଏହି ସମୟରେ ଚନ୍ଦ୍ରର ଅତି ନିକଟକୁ ଯିବା ପାଇଁ ୪ ଥର କକ୍ଷପଥ ପରିବର୍ତନ କରିବ ଚନ୍ଦ୍ରଯାନ-୨ । ଏଥିରେ ସଫଳ ହେଲେ ସେପ୍ଟେମ୍ବର ୭ରେ ଚନ୍ଦ୍ରପୃଷ୍ଠର ଦକ୍ଷିଣ ମେରୁକୁ ଛୁଇଁବ ଲାଣ୍ଡର ବିକ୍ରମ ଓ ରୋଭର ପ୍ରଜ୍ଞାନ । କିନ୍ତୁ ଅର୍ବିଟର ଚନ୍ଦ୍ର ଚାରିପାଖରେ ଘୁରିବ । ଏକ ବର୍ଷ ପାଇଁ ଏହା କାମ କରିବ ବୋଲି ଆକଳନ କରାଯାଉ ଥିବା ବେଳେ ଏହାର ଇନ୍ଧନ ଯାହା ବଂଚିବ, ସେଥିରେ ଏହା ଆଉ ଏକ ବର୍ଷ କାମ କରି ପାରିବ ବୋଲି ଆଶା ରଖିଛନ୍ତି ବୈଜ୍ଞାନିକ ।