ପୋଲିସ୍ ଡାଳରେ କୁ ଲୋକ ପତରେ…ଜରିମାନାରୁ ବର୍ତ୍ତିବା ପାଇଁ ଚାଳକଙ୍କ ସ୍ମାର୍ଟ ପ୍ଲାନ୍; ଟ୍ରାଫିକ୍ ଚେକିଂ ଗ୍ରୁପ କରି ହ୍ୱାଟସଆପରେ ଦେଉଛନ୍ତି ସୂଚନା
କନକ ବ୍ୟୁରୋ: କଥାରେ ଅଛି ପୁଲିସ୍ ଡାଳେ ଡାଳେ ଗଲେ ଚୋର ପତରେ ପତରେ ଯାଏ… ଆଉ ଏହି ଉକ୍ତିଟି ବର୍ତ୍ତମାନ ସାବ୍ୟସ୍ତ ହୋଇଛି ସମ୍ବଲପୁର ସହରରେ । ଟ୍ରାଫିକ ନୂଆ ନିୟମ ଆସିଲା ପରେ ପୁଲିସ ବିଭିନ୍ନ ସ୍ଥାନରେ ହେଲମେଟ୍ ଚେକିଂ ଆରମ୍ଭ କରିଛି । ସହରର ବିଭିନ୍ନ କଳି କନ୍ଦିରେ ପୁଲିସ ବର୍ତ୍ତମାନ ଟ୍ରାଫିକ ଉଲ୍ଲଂଘକାରୀଙ୍କୁ ଧରିବା ପାଇଁ ଜଗିବସିଛି । ଆଉ ପ୍ରତ୍ୟେକ ଦିନ ଲକ୍ଷାଧିକ ଟଙ୍କାର ଫାଇନ ମଧ୍ୟ ଆଦାୟ କରାଯାଉଛି । ହେଲେ ଏହି ଫାଇନଠୁ ବର୍ତ୍ତିବା ପାଇଁ ସହରର କିଛି ଯୁବକ ତିଆରି କରିଛନ୍ତି ଏକ ବେଆଇନ ହ୍ୱାଟସଆପ ଗ୍ରୁପ । ଯେଉଁଥିରେ କେଉଁ ସ୍ଥାନରେ ପୁଲିସ କେତେବେଳ ଚେକିଂ କରିଛି ସମସ୍ତ ପ୍ରକାରର ତଥ୍ୟ ଏଠାରେ ଦେବା ପାଇଁ ଚାଳକଙ୍କ କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଫଳରେ ଗ୍ରୁୁପରେ ଥିବା ସଦସ୍ୟ ମାନେ ନିଜ ନିଜ ଅଂଚଳର ଲୋକଙ୍କୁ ପୁଲିସ ଚେକିଂ ବାବଦରେ ସୂଚନା ଦେଇପାରିବେ । ତେବେ ଟ୍ରାଫିକ ଚେକିଂରୁ ବର୍ତ୍ତିବା ପାଇଁ ସମ୍ବଲପୁରରେ କିଛି ଯୁବକ ତିଆରି କରିଥିବା ଏହି ହ୍ୱାଟସଆପ ଗ୍ରୁପ ନାଁ ଦିଆଯାଇଛି ‘ଟ୍ରାଫିକ୍ ଚେକିଂ ଗ୍ରୁପ’ । ଆଉ ଏହି ଗ୍ରୁପ ଏବେ ପୁଲିସର ସ୍କାନରେ । ଏନେଇ ଏକ ଗୁଇନ୍ଦା ରିପୋର୍ଟ ମଧ୍ୟ ପୁଲିସ ପାଖରେ ରହିଛି । ଏପରିକି ଗ୍ରୁପର ଆକ୍ଟିଭିଟି ଉପରେ ବି ପୁଲିସ ନଜର ରଖିଛି ।
ଏହି ଘଟଣା ଭାଇରାଲ ହେଲାପରେ ଗ୍ରୁପଟିକୁ ଡ଼ିଲିଟ ହୋଇଯାଇଥିଲେ ମଧ୍ୟ ଏହା ଉପରେ ତିକ୍ଷଣ ନଜର ରଖିଛି ପୁଲିସ୍ । ଏସପି ଏହି ଗ୍ରୁପକୁ ନେଇ ମୁହଁ ଖୋଲିବା ସହିତ ଏହା ବେନିୟମ ହୋଇଥିବା ବେଳେ ଏଭଳି କାର୍ଯ୍ୟ କରୁଥିବା ବ୍ୟକ୍ତିଙ୍କ ବିରୁଦ୍ଧରେ ଆଇନ ଅନୁସାରେ କଡା କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି । ଏଥିସହିତ ହିଁ ଯଦି ଏଭଳି କରାଯିବ ତାହେଲେ ପୁଲିସ ଚେକିଂର ରଣନୀତି ପରିବର୍ତ୍ତନ କରି କାମ କରିବ ବୋଲି ମଧ୍ୟ କହିଛନ୍ତି ସମ୍ବଲପୁର ଏସପି । ତେବେ ଟ୍ରାଫିକର ନୁଆ ନିୟମକୁ ନେଇ ସର୍ବଭାରତୀୟ ସ୍ତରରେ ସମ୍ବଲପୁର ଚର୍ଚ୍ଚିତ ଥିବା ବେଳେ ଏବେ ଏହି ଘଟଣା ପୁଣି ଥରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ।