ନଦୀ ପଠାରେ ମାଳ ମାଳ ଚିଙ୍ଗୁଡ଼ି ଘେରି, ଶୁଖିଯାଉଛି ହେନ୍ତାଳ ବଣ! ଜିଲ୍ଲାପାଳଙ୍କ ଅଜବ ଉତ୍ତର, ସେମାନେ କରୁଥିବେ ଆମେ ଭାଙ୍ଗୁଥିବୁ
କନକ ବ୍ୟୁରୋ : ପୁଣି ସକ୍ରିୟ ଚିଙ୍ଗୁଡି ମାଫିଆ । ବେଆଇନ ଚିଙ୍ଗୁଡି ଘେରିକୁ ବନ ବିଭାଗ ଓ ରାଜସ୍ୱ ବିଭାଗ ଉଚ୍ଛେଦ କରୁଥିଲେ ମଧ୍ୟ ମାଫିଆ ମାନେ ପୁନଃର୍ବାର ସେହିସ୍ଥାନରେ ଘେରି କରି ଦେଉଛନ୍ତି । ଚିଙ୍ଗୁଡ଼ି ମାଫିଆଙ୍କୁ ତଡ଼ିପାର କରିବାକୁ ଯେତେ ଚେଷ୍ଟା କଲେ ମଧ୍ୟ ଏହା ସଫଳ ହୋଇ ପାରୁନାହିଁ । ନଦୀ ପଠାରେ ମାଳମାଳ ଚିଙ୍ଗୁଡ଼ି ଘେରି କରି ପ୍ରଶାସନକୁ ଖୋଲା ଚ୍ୟାଲେଞ୍ଜ ଦେଉଛନ୍ତି ଚିଙ୍ଗୁଡ଼ି ମାଫିଆ । ସେପଟେ ଜିଲ୍ଲାପାଳଙ୍କ ଉତ୍ତର ଏହା କ୍ରମାନ୍ୱୟ ପ୍ରୋସେସ । ସେମାନେ କରୁଥିବେ ଆମେ ଭାଙ୍ଗୁଥିବୁ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରାପଡା ଜିଲ୍ଲା ରାଜନଗର ବ୍ଲକର ବିଭିନ୍ନ ନଦୀ ପଠାର ହଜାର ହଜାର ହେକ୍ଟର ଜମିରେ ହୋଇଛି ବେଆଇନ ଚିଙ୍ଗୁଡି ଘେରି । କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରଣାଳୟର ଉପକୂଳ ନିୟନ୍ତ୍ରଣ ଆଇନକୁ ବେଖାତିର କରି ବେଆଇନ୍ ଭାବେ ଘେରି କରିଛନ୍ତି ମାଫିଆ । ଆଇନ୍ କହୁଛି, ସମୁଦ୍ର ଓ ନଦୀର ଜୁଆର ମାଡୁଥିବା ସ୍ଥାନର ୫ଶହ ମିଟର ମଧ୍ୟରେ ଚିଙ୍ଗୁଡି ଘେରି ହେବ ନାହିଁ । ହେଲେ ଏଠାରେ କିନ୍ତୁ ଜୁଆର ଅଟକାଇ ଘେରି କରି ମାଲାମାଲ ମାଫିଆ ଆଉ ଦୁର୍ବଳ ନଦୀ ବନ୍ଦ । ରାଜସ୍ୱ ବିଭାଗ ନାଁକୁ ମାତ୍ର ବର୍ଷରେ ଗୋଟିଏ ଦୁଇଟି ଘେରି ଭାଙ୍ଗି ଚୂପ ବସୁଥିବାରୁ ଚିଙ୍ଗୁଡି ମାଫିଆ ଓ ପ୍ରାସାଶନିକ ବାବୁଙ୍କ ମଧ୍ୟରେ ସଲାସୁତରା ନେଇ ସନ୍ଦେହ ହେଉଛି ।
ଚିଙ୍ଗୁଡ଼ି ଘେରିରୁ ବାହାରୁଥିବା ରାସାୟନିକ କୀଟନାଷକ ଯୁକ୍ତ ଜଳ ଭିତରକନିକାର ନଦୀ-ନାଳରେ ମିଶିବାରୁ ଚାଷ ଜମି କ୍ଷତିଗ୍ରସ୍ତ ହେଉଛି । ଫଳରେ ଭିତରକନିକାରରେ ଚଳପ୍ରଚଳ କରୁଥିବା ଜୀବଜନ୍ତୁ ଓ ଜଳଚର ପ୍ରାଣୀ ବିଭିନ୍ନ ରୋଗରେ ଆକ୍ରାନ୍ତ ହେଉଛନ୍ତି । ବିରଳ ହେନ୍ତାଳ ବଣ ଲୁଣା ଜଙ୍ଗଲ ବି ଶୁଖି ଯାଉଛି । ସବୁଠୁ ବଡ଼ କଥା ହେଲା ଏଭଳି ଅଭିଯୋଗକୁ ସ୍ୱୀକାର କରିଛନ୍ତି କେନ୍ଦ୍ରାପଡା ଜିଲ୍ଲାପାଳ । ଲୋକେ ପ୍ରତିବର୍ଷ ତିଆରି କରିବେ ପ୍ରଶାସନ ଭାଙ୍ଗିବ,ପୁଲିସ ପ୍ରୋଟେକସନ ଅଭାବରୁ ସବୁ ଘେରି ପାଖରେ ପହଂଚି ହେଉନି ବୋଲି ସେ ସ୍ୱୀକାର କରିଛନ୍ତି । ତେଣୁ ଚିଙ୍ଗୁଡ଼ି ମାଫିଆ ଉକ୍ତ ଅଞ୍ଚଳରେ ରାଜ କରୁଛନ୍ତି । ଏସବୁ ଭିତରେ କେବେ ଚିଙ୍ଗୁଡି ମାଫିଆଙ୍କ କବଳରୁ ମୁକୁଳିବ ନଦୀ ପଠା ଆଉ ଉଚ୍ଛେଦ ହେବ ବେଆଇନ ଚିଙ୍ଗୁଡି ଘେରି ତାକୁ ହିଁ ଦେଖିବାକୁ ବାକି ରହିଲା ।