ଟ୍ରାଫିକ ଜାମକୁ ବାଏ ବାଏ ! ଆକାଶରେ ଉଡ଼ିବାକୁ ଭାରତ ନିର୍ମାଣ କରୁଛି ଉଡ଼ନ୍ତା କାର, ସେନାକୁ ମଧ୍ୟ କରିପାରିବ ସାହାଯ୍ୟ
ଦିନକୁ ଦିନ ସହରରେ ଟ୍ରାଫିକ ସମସ୍ୟା ଗୁରୁତର ହେବାରେ ଲାଗିଛି । ଯେଉଁ ସ୍ଥାନରେ ଦଶ ମିନିଟରେ ପହଞ୍ଚି ହେବ ସେଠାକୁ ଯିବାକୁ ଘଣ୍ଟାଏରୁ ମଧ୍ୟ ଅଧିକ ସମୟ ଲାଗୁଛି । ଦ୍ରୁତ ସହରୀକରଣ, ଆଧୁନିକ ଲାଇଫଷ୍ଟାଇଲ ଯୋଗୁଁ ଏଭଳି ସମସ୍ୟା ବଢ଼ି ବଢ଼ି ଚାଲିଛି । ସହରରେ ଯାନବାହାନ ସଂଖ୍ୟା ବୃଦ୍ଧି ହେତୁ ଟ୍ରାଫିକ ସମସ୍ୟା ଦେଖାଯାଉଛି । ଆଉ ଏହି ସମସ୍ୟାକୁ ଦୃଷ୍ଟିରେ ରଖି ଆଇଆଇଟି କାନପୁରର ବିଶେଷଜ୍ଞ ଏବେ ଉଡ଼ନ୍ତା କାର ନିର୍ମାଣ କରିବାକୁ ଅଣ୍ଟା ଭିଡ଼ିଛନ୍ତି । ଏହି ଉଡ଼ନ୍ତା କାର ଯେ କୌଣସି ସ୍ଥାନରୁ ଟେକ ଅଫ୍ ଓ ଲ୍ୟାଣ୍ଡିଂ କରିପାରିବ । ଏଥିପାଇଁ କୌଣସି ରନୱେର ଆବଶ୍ୟକତା ପଡ଼ିବ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଉଡ଼ନ୍ତା କାର ନିର୍ମାଣ ପାଇଁ ବିଟଲ ଏଭିଏସନ କମ୍ପାନି ଠାରୁ ୧୫ କୋଟି ଟଙ୍କା ଆଣିଛି ଆଇଆଇଟି କାନପୁର । ଏରୋସ୍ପେଶ ଇଞ୍ଜିନିୟରିଙ୍ଗ ବିଭାଗ ଆଗାମୀ ୫ ବର୍ଷ ମଧ୍ୟରେ ୮୦୦ରୁ ୧୦୦୦ କିଲୋଗ୍ରାମର ପ୍ରୋଟୋଟାଇପ ମଡ଼େଲ ପ୍ରସ୍ତୁତ କରିବ । ଏହାର ସଫଳ ପରୀକ୍ଷଣ ପରେ ଏଭଳି ଉଡ଼ନ୍ତା କାରକୁ ମୁ୍ମ୍ବାଇରେ ନିର୍ମାଣ କରାଯିବ । ସବୁଠୁ ବଡ଼ କଥା ହେଲା ଏହି ଉଡ଼ନ୍ତା କାରର ମଡ଼େଲକୁ ମେକ୍ ଇନ୍ ଇଣ୍ଡିଆ ଦ୍ୱାରା ପ୍ରସ୍ତୁତ କରାଯିବ ।
୧୨ ହାଜର ଫୁଟ୍ ଉପରେ ଉଡ଼ିବ କାର :
ଆଇଆଇଟି କାନପୁରର ଏରୋସ୍ପେଶ ବିଭାଗ ଆକାଶରେ ଉଡ଼ିପାରୁଥିବା ଦୁଇ ସିଟ୍ ବିଶିଷ୍ଟ କାର ନିର୍ମାଣ କରିବ । ଏହି ଉଡ଼ନ୍ତା କାର ସର୍ବାଧିକ ୧୨ ହଜାର ଫୁଟ ଉପର ପର୍ଯ୍ୟନ୍ତ ଉଡ଼ି ପାରିବ । ଏହାଛଡ଼ା ସର୍ବନିମ୍ନ ୧୦୦୦ ଫୁଟ ତଳେ ଏହି କାର ଉଡ଼ିପାରିବ । ଏହାଛଡ଼ା କାରର ଗତି ସେକେଣ୍ଡ ପ୍ରତି ୯୦ରୁ ୧୦୦ ମିଟର ରହିବ । ବିଶେଷଜ୍ଞଙ୍କ କହିବା ଅନୁଯାୟୀ, ଆକାଶରେ ଉଡ଼ି ପାରୁଥିବା ଏହି କାରରେ କଡ଼ା ସୁରକ୍ଷା ବ୍ୟବସ୍ଥା ରହିଛି । ଖାସକରି ଏଥିରେ ବିଭିନ୍ନ ପ୍ରକାର ସେନସର ଲଗାଯିବ । ଏପରିକି କୌଣସି ଦୁର୍ଘଟଣାରୁ ରକ୍ଷା ପାଇବା ପାଇଁ ପାରାଚ୍ୟୁଟର ମଧ୍ୟ ସୁବିଧା ରହିବ କି ନାହିଁ ସେନେଇ ବିଚାରବିମର୍ଷ ଚାଲିଛି । ଏହାଛଡ଼ା ଇଞ୍ଜନରୁ କମ ଶବ୍ଦ ଆସିବା ଓ ଏୟାର ଟ୍ରାଫିକରେ ଯେମିତି କୌଣସି ଅସୁବିଧା ନ ଦେଖାଦେବ ତାହା ଉପରେ ମଧ୍ୟ କାମ ଚାଲିଛି ।
ସେନାର ରେସ୍କ୍ୟୁ ଅପରେସନରେ ମଧ୍ୟ କାମ ଦେବ :
ଏହି ଉଡ଼ନ୍ତା କାରକୁ ସେନାର ଉଦ୍ଧାର କାର୍ଯ୍ୟରେ ମଧ୍ୟ ସାମିଲ କରାଯାଇପାରିବ । ଏୟାରକ୍ରାଫ୍ଟ ଓ ହେଲିକପ୍ଟର ଇଞ୍ଜନରୁ ଅଧିକ ଶବ୍ଦ ଆସୁଥିବାରୁ ଅଧିକାଂଶ ସମୟରେ ଶତ୍ରୁପକ୍ଷ ଏହାର ସୂଚନା ହାସଲ କରି ନେଇଥାନ୍ତି । କିନ୍ତୁ ଏହି ଉନନ୍ତା କାର ଶତ୍ରୁପକ୍ଷକୁ ମାତ୍ ଦେଇ ପାହାଡ଼ ଓ ବରଫାବୃତ ଅଞ୍ଚଳରେ ବେଶ ଆରାମରେ ଉଡ଼ିପାରିବ । ଆଇଆଇଟି କାନପୁରର ବିଶେଷଜ୍ଞ ମାନେ ମେ ୧୦ରେ ୨୦ କିଲୋଗ୍ରାମ ଓଜନ ବିଶିଷ୍ଟ ୟୁଏବିକୁ ୨୦ ମିନିଟ୍ ପର୍ଯ୍ୟନ୍ତ ଆକାଶରେ ସଫଳତାର ସହ ଉଡ଼ାଇଥିଲେ । ଏରୋସ୍ପେଶ ବିଭାଗର ମୁଖ୍ୟ ଏକେ ଘୋଷଙ୍କ କହିବା ଅନୁଯାୟୀ, ଆଗାମୀ ୫ ବର୍ଷ ମଧ୍ୟରେ ଆକାଶରେ ଉଡ଼ି ପାରୁଥିବା କାରର ମଡ଼େଲ ପ୍ରସ୍ତୁତ କରାଯିବ । ଏହାକୁ ବେଶ ସହଜରେ ଉଡ଼ାଯାଇପାରିବ ଓ ଲ୍ୟାଣ୍ଡିଂ ମଧ୍ୟ କରାଯାଇପାରିବ ।