କନକ ବ୍ୟୁରୋ : ଆଇଆଇସିଙ୍କୁ ବାନ୍ଧି ରଖିଲେ ଗାଁଲୋକେ । ରାତି ସାରା ଗାଁ ମନ୍ଦିରରେ ଆଇଆଇସିଙ୍କୁ ଗାଁଲୋକେ ବାନ୍ଧି ରଖିଥିବା ଅଭିଯୋଗ ହୋଇଛି । ଗଂଜାମ ଜିଲ୍ଲା ବଡଗଡ ଥାନା କରଡାକଣା ଗାଁରେ ଗତ ରାତିରେ ଆଇଆଇସିଙ୍କୁ ଗାଁ ମନ୍ଦିର ଭିତରେ ବାନ୍ଧି ରଖିଥିଲେ ଗାଁଲୋକେ । ବିଜେଡି କର୍ମିଙ୍କ ସୂଚନାକୁ ଭିତ୍ତି କରି ଆଇଆଇସି ଲୋକଙ୍କୁ ଅଟକ କିମ୍ବା ଗିରଫ କରୁଥିଲେ ବୋଲି ଅଭିଯୋଗ କରି ଗାଁଲୋକେ ତାଙ୍କୁ ବାନ୍ଧି ରଖିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଆଜି ପଂଚମ ତଥା ଶେଷ ପର୍ଯ୍ୟାୟ ନିର୍ବାଚନ ଥିବାରୁ ଗତକାଲି ରାତିିରେ ବିଜେଡି କର୍ମୀ ପ୍ରତାପ ପ୍ରଧାନଙ୍କ ଫୋନକଲକୁ ଭିତ୍ତି କରି ଗାଁରେ ପହଂଚିଥିଲେ ବଡଗଡ ଆଇଆଇସି ଜୀବନାନନ୍ଦ ଜେନା । ଏହାପରେ ଗାଁର ସନ୍ତୋଷ କୁମାର ଭଂଜ ନାମକ ଜଣେ ଯୁବକଙ୍କୁ ଆଇଆଇସି ନିସ୍ତୁକ ମାଡ ମାରିଥିବା ଅଭିଯୋଗ ହୋଇଛି ।
ଏଥିରେ ଗାଁଲୋକେ ଉତକ୍ଷିପ୍ତ ହୋଇ ଆଇଆଇସିଙ୍କୁ ଘେରି ରଖିବା ସହ ଗାଁ ମନ୍ଦିରରେ ବାନ୍ଧି ରଖିଥିଲେ । ତେବେ ତାଙ୍କୁ ମୁକୁଳାଇବା ପାଇଁ ପହଂଚିଥିବା ବିଜେଡି କର୍ମୀଙ୍କୁ ମଧ୍ୟ ଗାଁଲୋକେ ଅଟକ ରଖିଥିଲେ । ଆଜି ସକାଳୁ ଶେରଗଡ ତହସିଲଦାର ୧ପ୍ଲାଟୁନ ପୁଲିସ ଫୋର୍ସ ସହ ଗାଁରେ ପହଂଚି ମନ୍ଦିରର କବାଟ ଭାଙ୍ଗି ଆଇଆଇସି ଓ ବିଜେଡି କର୍ମୀଙ୍କୁ ଉଦ୍ଧାର କରିଥିଲେ ।