ବିଶ୍ୱସ୍ତରରେ ମାସୁଦ ଉପରେ କଟକଣା ଲଗାଇବା ପାଇଁ ଉଠିଲା ସ୍ୱର ! ଚୀନର ଆଭିମୁଖ୍ୟ ଉପରେ ନଜର, ଜାଣନ୍ତୁ କଟକଣା ଲାଗିଲେ କ’ଣ ହେବ ।
କନକ ବ୍ୟୁରୋ : ଆତଙ୍କବାଦୀ ସଂଗଠନ ଜୈସ-ଇ-ମହମ୍ମଦର ମୁଖ୍ୟ ମାସୁଦ ଆଝାର ଉପରେ ଏବେ ନଜର । ଯଦି ମାସୁଦ ଆଝାର ଉପରେ ମିଳିତ ଜାତିସଂଘ ସୁରକ୍ଷା ପରିଷଦ ପକ୍ଷରୁ ବ୍ୟାନ ଲଗାଯାଏ ତେବେ କଣ ହେବ । ଏବେ ଏହି ପ୍ରଶ୍ନ ଉଠିଛି । ତେବେ ଯଦି ମାସୁଦ ଆଝାର ଉପରେ କଟକଣା ଲାଗିବ ତେବେ ସାରା ବିଶ୍ୱ ଭ୍ରମଣ ଉପରେ ଲାଗିବ ଲଗାମ । ସମସ୍ତ ସମ୍ପତିକୁ ଫ୍ରିଜ କରାଯିବା ସହ ଅସ୍ତ୍ରଶସ୍ତ୍ର ଉପରେ ମଧ୍ୟ କଟକଣା ଲାଗିବ ।
Kanak News is now on WhatsApp
Join and get latest news updates delivered to you via WhatsApp
ମାସୁଦ ଉପରେ କଟକଣା ଲାଗିଲେ କଣ ହେବ? ମିଳିତ ଜାତିସଂଘ ସୁରକ୍ଷା ପରିଷଦ ବ୍ୟାନ ଲଗାଇଲେ କଣ ହେବ? ଏହି ପ୍ରଶ୍ନ ସେତେବେଳେ ଉଠିଛି ଯେତେବେଳେ ଭାରତ ପାକିସ୍ତାନ ମଧ୍ୟରେ ଲାଗିରହିଛି ଉତ୍ତେଜନା । ପୁଲୱାମା ଆତଙ୍କୀ ହମଲା ପଛରେ ମାସୁଦ ହିଁ ମାଷ୍ଟର ମାଇଣ୍ଡ ବୋଲି ଜଣାପଡିବା ପରେ ଏବେ ବିଶ୍ୱସ୍ତରରେ ମାସୁଦ ଉପରେ କଟକଣା ଲଗାଇବା ପାଇଁ ସ୍ୱର ଉଠିଛି । ପାକିସ୍ତାନରେ ଥିବା ଆତଙ୍କବାଦୀ ସଂଗଠନ ଜୈସ-ଇ-ମହମ୍ମଦ ମୁଖ୍ୟ ମାସୁଦ ଆଝାରକୁ ଗ୍ଲୋବାଲ ଟେରରିଷ୍ଟ ବୋଲି ଆଖ୍ୟା ଦିଆଯାଉ । ଆମେରିକା, ଇଂଲଣ୍ଡ ଏବଂ ଫ୍ରାନ୍ସ ମିଳିତ ଜାତିସଂଘ ସୁରକ୍ଷା ପରିଷଦ ଆଗରେ ଏହି ପ୍ରସ୍ତାବ ମଧ୍ୟ ରଖିସାରିଲେଣି ।
ଯଦି ମିଳିତ ଜାତିସଂଘ ସୁରକ୍ଷା ପରିଷଦ ମାସୁଦ ଆଝାର ଉପରେ ଏହି ବ୍ୟାନ ଲଗାଏ ତେବେ ମିଳିତ ଜାତିସଂଘର ସଦସ୍ୟ ରାଷ୍ଟ୍ରମାନେ ବିଭିନ୍ନ ଉପାୟରେ ମାସୁଦ ଉପରେ କଟକଣା ଲଗାଇପାରିବେ । ଆର୍ଥିକ କଟକଣା ଠାରୁ ଆରମ୍ଭ କରି ଭ୍ରମଣ ଏବଂ ଅସ୍ତ୍ରଶସ୍ତ୍ର ରଖିବା ଉପରେ ଲାଗିପାରିବ କଟକଣା । ଜଣେ ବ୍ୟକ୍ତି କିମ୍ବା ଗୋଟିଏ ସଂଗଠନକୁ ଯଦି ମିଳିତ ଜାତିସଂଘ ସୁରକ୍ଷା ପରିଷଦ ଦ୍ୱାରା ଆତଙ୍କବାଦୀ ତାଲିକାରେ ସାମିଲ କରେ ତେବେ ମିଳିତ ଜାତିସଂଘ ସଦସ୍ୟ ରାଷ୍ଟ୍ରମାନେ ତା ଉପରେ ଏହି କଟକଣା ଲଗାଇପାରିବେ ।
• ପାଖରେ ଥିବା ଅର୍ଥ, ସମ୍ପତି, ଆର୍ଥିକ ସମ୍ବଳ ଫ୍ରିଜ ହେବ
• ଉକ୍ତ ବ୍ୟକ୍ତି ବା ସଂଗଠନ ପାଇଁ କାମ କରୁଥିବା ବ୍ୟକ୍ତିର ଅର୍ଥ, ସମ୍ପତି, ଆର୍ଥିକ ସମ୍ବଳ ଫ୍ରିଜ ହେବ
• ସେ ରହୁଥିବା ସ୍ଥାନରେ ଅନ୍ୟ ଲୋକମାନେ ମଧ୍ୟ ଆର୍ଥିକ ସାହାଯ୍ୟ କରିପାରିବେ ନାହିଁ
ଭ୍ରମଣ କଟକଣା :
• ମିଳିତ ଜାତିସଂଘର ସଦସ୍ୟ ରାଷ୍ଟ୍ରମାନେ ସେମାନଙ୍କ ଅଂଚଳରେ ପ୍ରବେଶ ଉପରେ ଲାଗିବ କଟକଣା
ଅସ୍ତ୍ରଶସ୍ତ୍ର କଟକଣା :
ମିଳିତ ଜାତିସଂଘର ସଦସ୍ୟ ରାଷ୍ଟ୍ରମାନେ ପରୋକ୍ଷ କିମ୍ବା ପ୍ରତ୍ୟକ୍ଷ ଭାବେ ସେହି ବ୍ୟକ୍ତିକୁ ନିଜ ଅଂଚଳରୁ ଅସ୍ତ୍ରଶସ୍ତ୍ର ବିକ୍ରି କରିବେ ନାହିଁ କିମ୍ବା ଟ୍ରାନସଫର କରିପାରିବେ ନାହିଁ । ଏପରିକି ସ୍ପେୟାରପାର୍ଟସ ମଧ୍ୟ ଦିଆଯିବ ନାହିଁ ।
ମାସୁଦ ଆଝାରକୁ ଗ୍ଲୋବାଲ ଟେରରିଷ୍ଟ ଭାବେ ଘୋଷଣା କରାଯିବା ପ୍ରସ୍ତାବ ମିଳିତ ଜାତିସଂଘରେ ଗତ ୧୦ ବର୍ଷ ମଧ୍ୟରେ ଚତୁର୍ଥ ଏପରି ଘଟଣା । ୨୦୦୯ ଏବଂ ୨୦୧୬ ମସିହାରେ ମାସୁଦ ଆଝାରକୁ ଗ୍ଲୋବାଲ ଟେରରିଷ୍ଟ ଭାବେ ଘୋଷଣା କରିବାପାଇଁ ପ୍ରସ୍ତାବ ଦେଇଥିଲା ଭାରତ । ୨୦୧୭ରେ ମଧ୍ୟ ପି-ଥ୍ରୀ ଦେଶ, ଆମେରିକା, ଇଂଲଣ୍ଡ ଏବଂ ଫ୍ରାନ୍ସ ମାସୁଦ ଆଝାରକୁ ଗ୍ଲୋବାଲ ଟେରରିଷ୍ଟ ଘୋଷଣା କରିବା ପାଇଁ ପ୍ରସ୍ତାବ ଦେଇଥିଲେ । ତେବେ ସବୁବେଳେ ଭୋଟିଂ ବେଳେ ବାଟ ଓଗାଳିଥିଲା ଚାଇନା । ଭାରତ ଦେଇଥିବା ପ୍ରସ୍ତାବ ବିରୋଧରେ ଯାଇଥିଲା ଚାଇନା । ଏବେ ୩ ସଦସ୍ୟ ରାଷ୍ଟ୍ର ଦେଇଥିବା ପ୍ରସ୍ତାବ ଉପରେ ଭୋଟିଂ ବେଳେ କି ଆଭିମୁଖ୍ୟ ଗ୍ରହଣ କରୁଛି ଚାଇନା ତା ଉପରେ ରହିଛି ସମସ୍ତଙ୍କ ନଜର ।