ଶିକ୍ଷକତା ପାଇଁ ବାଜିରେ ଲାଗିଛି ଜୀବନ । ପାଠ ପଢାଇବା ଲାଗି ଭରା ନଦୀ ପାର ହେଉଛନ୍ତି ଶିକ୍ଷକ, ଅଂଟାରେ ଲାଉତୁମ୍ବା ବାନ୍ଧି ପାଣିର ସୁଅକୁ କାଟି ପହଁରି ପହଁରି ଯାଉଛନ୍ତି ସ୍କୁଲ ।
କନକ ବ୍ୟୁରୋ : ଉଚ୍ଛୁଳା ନଈରେ ଶିକ୍ଷକଙ୍କ ବିପଦପୂର୍ଣ୍ଣ ଜଳଯାତ୍ରା । ପାଣିର ସୁଅକୁ କାଟି ପହଁରି ପହଁରି ନଦୀପାର ହେଉଛନ୍ତି ଶିକ୍ଷକ । ଛାତ୍ରଛାତ୍ରୀଙ୍କ ଭବିଷ୍ୟତ ଗଢିବା ପାଇଁ ପ୍ରତିଦିନ ନିଜ ଜୀବନକୁ ବାଜିରେ ଲଗାଇ ଏମିତି କରିବାକୁ ପଡୁଛି । ଲାଉ ତୁମ୍ବାକୁ ଅଂଟାରେ ବାନ୍ଧି ନଦୀ ପାରି ହେଉଛନ୍ତି ଶିକ୍ଷକ । କେବଳ ଏତିକି ନୁହେଁ, ପାଣି ପାରି ହେବା ପରେ ପାହାଡ ଚଢି ଜଙ୍ଗଲ ଅତିକ୍ରମ କରି ଦୁର୍ଗମ ଅଂଚଳର ବିଦ୍ୟାଳୟରେ ପହଂଚୁଛନ୍ତି ଶିକ୍ଷକ । ଆଗରୁ ମଧ୍ୟ ଏମିତି ଅନେକ ଘଟଣା ଆମେ ଆପଣମାନଙ୍କ ସାମ୍ନାକୁ ଆଣିଛୁ ।
Kanak News is now on WhatsApp
Join and get latest news updates delivered to you via WhatsApp
ଚିତ୍ରକୋଣ୍ଡା ବ୍ଲକର ସ୍ୱାଭିମାନ ଅଂଚଳରେ ପାଣି ପାରି ହୋଇ ଘୋଡାରେ ଯାଇ ବିଦ୍ୟାଳୟରୁ ବିଦ୍ୟାଳୟ ବୁଲି ଶିକ୍ଷା ବ୍ୟବସ୍ଥାର ତଦାରଖ କରିଥିଲେ ଶିକ୍ଷା ଅଧିକାରୀ । କେବଳ ଶିକ୍ଷା ଅଧିକାରୀ ନୁହେଁ ସ୍ୱାଭିମାନ ଅଂଚଳର ବିଭିନ୍ନ ବିଦ୍ୟାଳୟରେ ଶିକ୍ଷାଦାନ କରୁଥିବା ବହୁ ଶିକ୍ଷକ ପ୍ରତିଦିନ ଏମିତି ଜଳଯାତ୍ରା କରିଥାନ୍ତି ।
କାରଣ ଗୁରୁପ୍ରିୟା ସେତୁ ହେବା ପରେ ବିଚ୍ଛିନ୍ନାଂଚଳର ନାଁ ବଦଳି ସ୍ୱାଭିମାନ ଅଂଚଳ ହୋଇଛି, କିନ୍ତୁ ସବୁ ଅଂଚଳକୁ ସ୍ଥଳପଥରେ ସଂଯୋଗ କରାଯାଇ ପାରିନାହିଁ । ଯାହାର ଜ୍ୱଳନ୍ତ ଉଦାହରଣ ହେଉଛନ୍ତି ଜଣେ ଶିକ୍ଷକ । ସ୍ୱାଭିମାନ ଅଂଚଳ ଅଂଡ୍ରାପାଲ୍ଲୀ ପଂଚାୟତ ଧାକଡପଦର ବିଦ୍ୟାଳୟର ଶିକ୍ଷକ ସନ୍ନ୍ୟାସୀ ପାତ୍ର ଓ କୋଡେ ମଙ୍ଗୁଲୁ ପ୍ରତିଦିନ ପାଣି ପାରିହେବା ପରେ ପାହାଡ ଚଢି ବଣ ଜଙ୍ଗଲ ଦେଇ ବିଦ୍ୟାଳୟରେ ପହଂଚୁଛନ୍ତି । ଆଉ ଛାତ୍ରଛାତ୍ରୀଙ୍କୁ ଶିକ୍ଷାଦାନ କରୁଛନ୍ତି । ତେବେ ଶିକ୍ଷକଙ୍କ ଏଭଳି କାର୍ଯ୍ୟ ପାଇଁ ତାଙ୍କୁ ପ୍ରଂଶସାର ଶୁଅ ଛୁଟୁଥିବା ବେଳେ ସରକାରୀ ବ୍ୟବସ୍ଥାକୁ ନେଇ ବଡ ପ୍ରଶ୍ନବାଚୀ ସୃଷ୍ଟି ହୋଇଛି ।