ଏମିତି ସରକାରୀ ବିଦ୍ୟାଳୟ ! ପଢନ୍ତି ଜିଲ୍ଲାପାଳ ଓ ଏସପିଙ୍କ ପିଲା, ଖାଆନ୍ତି ମଧ୍ୟାହ୍ନ ଭୋଜନ
ଆଜିକାଲି ସରକାରୀ ସ୍କୁଲରେ ପାଠପଢାଇବାକୁ ନେଇ ଅଭିଭାବକଙ୍କ ଦୃଷ୍ଟିଭଙ୍ଗୀ ବଦଳିଯାଇଛି । ସରକାରୀ ସ୍କୁଲ ନାଁ ଶୁଣିଲେ ନାକ ଟେକୁଛନ୍ତି ଅଭିଭାବକ । କାରଣ ନାନା ଅବ୍ୟବସ୍ଥାରେ ରହିଛି ସରକାରୀ ବିଦ୍ୟାଳୟ । ଏଥିପାଇଁ ସରକାରୀ ବିଦ୍ୟାଳୟ ଅପେକ୍ଷା,ଇଂରାଜୀ ମାଧ୍ୟମ ସ୍କୁଲକୁ ଅଧିକ ଗୁରୁତ୍ୱ ଦେଉଛନ୍ତି ଅଭିଭାବକ । ତେବେ ଆପଣ ଜାଣିଲେ ଆଶ୍ଚର୍ଯ୍ୟହେବେ, ଏମିତି ସରକାରୀ ବିଦ୍ୟାଳୟ ଅଛି ଯେଉଁଠି କଲେକ୍ଟର ଓ ଏସପିଙ୍କ ପିଲାବି ପାଠପଢୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସାଧାରଣ ଲୋକଙ୍କର ମାନସିକତାକୁ ବଦଳାଇବା ଉଦ୍ଦେଶ୍ୟରେ ଛତିଶଗଡର ଦୁଇ ଜଣ ଅଧିକାରୀ ଏକ ବିରଳ ଉଦାହରଣ ସୃଷ୍ଟି କରିଛନ୍ତି । ଏହି ଦୁଇ ଅଧିକାରୀ ସେମାନଙ୍କ ଝିଅଙ୍କ ନାଁ ସରକାରୀ ସ୍କୁଲରେ ଲେଖାଇଛନ୍ତି । ଫଳରେ ସ୍କୁଲର ଶିକ୍ଷକମାନେ ଉତ୍ସାହିତ ହେବା ସହ ପାଠପଢାସ୍ତର ବଦଳିବାରେ ଲାଗିଛି ।
ରାୟପୁରର ଏକ ସରକାରୀ ବିଦ୍ୟାଳୟରେ ଝିଅ ଦିବ୍ୟାଂଜଳିର ନାଁ ଲେଖାଇଥିଲେ ଏସଆଇଟି ଏସପି ଡି.ରବିଶଙ୍କର । ଦିବ୍ୟାଂଜଳୀ ବର୍ତମାନ ଦ୍ୱିତୀୟ ଶ୍ରେଣୀରେ ପଢୁଛନ୍ତି । ଅଦିନିଆ ବର୍ଷା ଭଳି ଦିବ୍ୟାଂଜଳି ସ୍କୁଲକୁ ଆସିଥିଲେ ଯାହା ସ୍କୁଲର ପୂରା ପରିବେଶ ବଦଳାଇଦେଇଥିଲା । ଶୀତତାପ ନିୟନ୍ତ୍ରିତ କୋଠରୀରେ ରହୁଥିବା ଦିବ୍ୟାଂଜଳି ସମସ୍ତଙ୍କ ଭଳି ବିଦ୍ୟାଳୟର ମ୍ୟାଟ ଉପରେ ବସୁଛନ୍ତି । ଅନ୍ୟ ସାଙ୍ଗ ଝିଅଙ୍କ ସହ ମିଶି ମଧ୍ୟାହ୍ନ ଭୋଜନ ଖାଉଛନ୍ତି । ଆଇପିଏସ ଅଫିସରଙ୍କ ଝିଅ ସ୍କୁଲରେ ପଢିବା ପରେ ଅନ୍ୟ ଅଭିଭାବକମାନେ ଗର୍ବ କରୁଛନ୍ତି ।
ବିଦ୍ୟାଳୟର ଗୁଣାତ୍ମକ ଶିକ୍ଷା ବ୍ୟବସ୍ଥା ନେଇ ଅଭିଭାବକମାନଙ୍କ ବିଶ୍ୱାସ ବଢିଛି । ଦିବ୍ୟାଂଜଳି ଗୋଟିଏ ବି ଦିନ ସ୍କୁଲ ବନ୍ଦ କରୁନାହାନ୍ତି । ସ୍କୁଲର ଅବସ୍ଥାରେ ବି ପରିବର୍ତନ ହୋଇଛି । ଶିକ୍ଷକମାନେ ନିୟମିତ ଆସୁଛନ୍ତି ଓ ଗୁଣାତ୍ମକ ଶିକ୍ଷାଦାନ କରୁଛନ୍ତି । ଦିବ୍ୟାଙ୍କ ମାଆ ସ୍କୁଲକୁ ଆସି ପିଲାଙ୍କୁ ଇଂରାଜୀ ପଢାଉଛନ୍ତି । ଆଇପିଏସ ଅଫିସରଙ୍କ ଝିଅ ସ୍କୁଲରେ ପଢିବା ପରେ ଅନ୍ୟ ଅଭିବାବକ ମାନେ ଖୁସି ହେବା ସହ ସରକାରୀ ସ୍କୁଲ ଉପରେ ସେମାନଙ୍କର ଆସ୍ଥା ବଢିଥିବା କହୁଛନ୍ତି । ପ୍ରଧାନଶିକ୍ଷକ ମଧ୍ୟ ବହୁତ ଖୁସିଅଛନ୍ତି । ରବିଶଙ୍କର କହିଛନ୍ତି, ଅନେକ ଅଭିଭାବକ ଇଂରାଜୀ ମାଧ୍ୟମ ବିଦ୍ୟାଳୟରେ ପଢାଇବା ପାଇଁ ଲମ୍ବା ଲାଇନ ଲଗାଉଛନ୍ତି । କିନ୍ତୁ ଅନେକ ଇଂରାଜୀ ମାଧ୍ୟମ ବିଦ୍ୟାଳୟର ଅବସ୍ଥା ସରକାରୀ ବିଦ୍ୟାଳୟ ଭଳି । ଯଦି ଲୋକମାନେ ଚେଷ୍ଟା କରନ୍ତେ ସରକାରୀ ବିଦ୍ୟାଳୟର ଅବସ୍ଥା ଆହୁରି ବଦଳି ପାରନ୍ତା ବୋଲି ସେ କହିଛନ୍ତି । ପିଲାମାନେ ଭଲ ପରିବେଶରେ ସେମାନଙ୍କ ପାଠପଢାର ମୂଳଦୂଆ ପକାଇପାରନ୍ତେ । ସେମାନଙ୍କ ମାନଶିକ ବିକାଶ ପାଇଁ ଏହିଭଳି ପରିବେଶ ଏକାନ୍ତ ଆବଶ୍ୟକ ।
ଛତିଶଗଡ କ୍ୟାବିନେଟ ମନ୍ତ୍ରୀ ବ୍ରିଜମୋହନ ଅଗ୍ରୱାଲ କହିଛନ୍ତି, ରାଜ୍ୟ ସରକାର ଶୈକ୍ଷିକ ବିକାଶ ଆଗକୁ ବଢୁଛି । ଏଥିପାଇଁ ସରକାର ନୂଆ ନିୟମ ଆଣିଛନ୍ତି । ଆପିଏସ ଅଫିସରଙ୍କ ଝିଅ ସ୍କୁଲରେ ପଢାଇବା ପରେ ସ୍କୁଲର ଶୃଙ୍ଖଳାରେ ଅନେକ ସୁଧାର ଆସିଛି । ସବୁ ସରକାରୀ ବିଦ୍ୟାଳୟରେ ଏଭଳି ସୁଧାର ଆସିବା କଥା ବୋଲି ସେ କହିଛନ୍ତି ।
ଛତିଶଗଡ ବଳରାମପୁର ଜିଲ୍ଲାର ଜିଲ୍ଲାପାଳ ଅଭିଂଶ କୁମାର ଶରଣ ପ୍ରଥମେ ଏଭଳି ନିଷ୍ପତ୍ତି ନେଇଥିଲେ । ବଳରାମପୁର ମୁଖ୍ୟାଳୟର ଏକ ସରକାରୀ ବିଦ୍ୟାଳରେ ତାଙ୍କ ଝିଅର ନାଁ ଲେଖାଇଥିଲେ । ପାଂଚ ବର୍ଷିୟ ଝିଅ ବେବିକା ବର୍ତମାନ ବଳରାମପୁରର ପ୍ରାଥମିକ ବିଦ୍ୟାଳୟରେ ପଢୁଛି । ତା ପୂର୍ବରୁ ତାଙ୍କ ଝିଅ ଅଙନୱାଡି ସେଂଟରରେ ପଢୁଥିଲା । ପତ୍ଥ୍ୟଲଗାଓଁ ବିଧାୟକ ଓ ଯଶପୁର ଜିଲ୍ଲାର ସଂସଦୀୟ ସଚିବ ଶିବଶଙ୍କରସାଇ ପାକ୍ରା ବି ଫଛରେ ପଡିନାହାନ୍ତି । ସେ ତାଙ୍କର ଦୁଇ ଝିଅଙ୍କୁ ସରକାରୀ ସ୍କୁଲରେ ପଢାଇବା ପରେ ନିକଟରେ ତାଙ୍କ ପୁ୍ଅ କାର୍ତ୍ତିକେୟକୁ ମଧ୍ୟ ସରକାରୀ ବିଦ୍ୟାଳୟରେ ପଢାଉଛନ୍ତି । ବିଧାୟକ, ଜିଲ୍ଲପାଳ ଓ ଏସପିଙ୍କ ଏଭଳି ଅଭିନବ ପଦକ୍ଷେପ ସମାଜରେ ଅନ୍ୟମାନଙ୍କୁ ଅନୁପ୍ରାଣିତ କରିବ । ତାସହ ସବୁଠି ‘ସମସ୍ତଙ୍କ ପାଇଁ ଗୋଟିଏ ଶିକ୍ଷା ବ୍ୟବସ୍ଥା’ ଦେଖିବାକୁ ମିଳିବ । ପ୍ରଶାସନର ବଡ ପଦବୀରେ ରହି ବି ଏଭଳି ଚିନ୍ତାଧାରେ ଦେଶ ବିକାଶରେ ନିଶ୍ଚିତ ଭାବେ ସାହାଯ୍ୟ କରିବ ।