୯ ପୁଅ ହେଲେ ପର, ଟ୍ରାଫିକ ପୋଲିସ ହେଲେ ନିଜର ! ରାସ୍ତାକଡରେ ତିନି ଦିନ ଧରି ଭୋକିଲା ଥିବା ବୃଦ୍ଧାଙ୍କୁ ନିଜ ହାତରେ ଖୁଆଇଲେ ଟ୍ରାଫିକ ପୋଲିସ
ଆଜିର ଶିକ୍ଷିତ ସମାଜରେ ମା’କୁ ପୁଅ ପର କରି ଦେଉଥିବାର ଅନେକ ନଜିର ରହିଛି । କେତେବେଳେ ଜନ୍ମଦାତ୍ରୀ ମା’କୁ ପୁଅ ବୃଦ୍ଧାଶ୍ରମରେ ଛାଡି ଦେଉଛି ତ ପୁଣି କେତେବେଳେ ବୟସ ଗଡିଯିବା ପରେ ମା’ ଉପରେ ପୁଅର ଅତ୍ୟାଚାର ଭଳି ବିଭିନ୍ନ ଘଟଣା ସାମ୍ନାକୁ ଆସୁଛି । କିନ୍ତୁ ଏବେ ବି ମାନବିକତା ବଞ୍ଚି ରହିଛି । ଆଉ ଏହାର ଉଦାହରଣ ହେଉଛନ୍ତି ଟ୍ରାଫିକ ପୋଲିସ ହୋମଗାର୍ଡ ବି ଗୋପାଳ । ଯାହାଙ୍କର ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ହାଇଦ୍ରାବାଦ କୁକୁଟପଲ୍ଲୀ ଟ୍ରାଫିକ ପୋଲିସ ହୋମଗାର୍ଡ ବି ଗୋପାଳ ଜଣେ ବେସାହାରା ବୃଦ୍ଧାଙ୍କୁ ଖାଇବାକୁ ଦେଉଥିବାର ଫଟୋ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଏହି ଫଟୋକୁ ୩ ହଜାର ଥରରୁ ଅଧିକ ରିଟ୍ୱିଟ୍ କରାଗଲାଣି । ତେବେ ଏହି ଫଟୋ ପଛରେ ଏଭଳି ଏକ କାହାଣୀ ଲୁଚି ରହିଛି ଯାହା ଜାଣିଲେ ଆପଣ ହୃଦୟ ନିଶ୍ଚୟ କାନ୍ଦି ଉଠିବ । ଏହାଛଡା ଟ୍ରାଫିକ ପୋଲିସକୁ ସଲାମ କରିବାକୁ ଇଚ୍ଛା ହେବ ।
This gesture of Kukatpally traffic PS Home Guard B.Gopal (1275) towards a homeless woman by feeding her at JNTU shakes the heart @cpcybd @cyberabadpolice @TelanganaDGP @TelanganaCMO pic.twitter.com/tL7VO7Vt5J
— Harsha Bhargavi (@pandiribhargavi) April 1, 2018
ଜବାହାରଲାଲ ନେହେରୁ ଟେକ୍ନୋଲୋଜିକାଲ ବିଶ୍ୱବିଦ୍ୟାଳୟ ପାଖରେ ଥିବା ଏକ ଚା ଦୋକାନ ପାଖରେ ଦୀର୍ଘ ତିନି ଧରି ବେସାହାରା ବୃଦ୍ଧା ବସି ରହୁଥିଲେ । ଅନେକ ଲୋକ ସେହି ବାଟ ଯାଉଥିଲେ ମଧ୍ୟ ଧୂଳି ସରସର ବୃଦ୍ଧାଙ୍କ ଆଡେ କାହାର ଟିକିଏ ବି ନଜର ପଡୁନଥିଲା । ଏପରିକି ସେଠାରେ କାର୍ଯ୍ୟରତ ଥିବା ଟ୍ରାଫିକ ପୋଲିସ ବି ଗୋପାଳ ମଧ୍ୟ ଏହାକୁ ଏତେ ଗୁରୁତର ସହ ନେଇ ନଥିଲେ । କିନ୍ତୁ ତିନି ଦିନ ବୃଦ୍ଧା ଅଖିଆ ଅପିଆ ରହିଥିବା ଜାଣିବା ପରେ ଗୋପାଳ ଯାହା କରିଥିଲେ ତାହା ହୁଏତ ବୃଦ୍ଧାଙ୍କ ପାଇଁ ନିଜ ପୁଅ ମଧ୍ୟ କରିନଥିବେ । ଅସହାୟ ଭୋକିଲା ବୃଦ୍ଧାଙ୍କୁ ଚା’ ଓ ଅନ୍ୟ କିଛି ଖାଦ୍ୟ ଆଣି ଖାଇବାକୁ ଦେଇଥିଲେ । କିନ୍ତୁ ବୃଦ୍ଧା ଜଣକ ଏତେ ଦୁର୍ବଳ ହୋଇଯାଇଥିଲେ ଯେ, ନିଜ ହାତରେ ଖାଇବା ପାଇଁ ମଧ୍ୟ ସକ୍ଷମ ହୋଇନଥିଲେ । ଫଳରେ ନିଜ ହାତରେ ବୃଦ୍ଧାଙ୍କୁ ଖୁଆଇଦେଇ ଟ୍ରାଫିକ ପୋଲିସ ଅନ୍ୟ ପାଇଁ ଉଦାହରଣ ସୃଷ୍ଟି କରିଥିଲେ ।
ଏହାପରେ ବୃଦ୍ଧା ଜଣଙ୍କୁ ବୃଦ୍ଧାଶ୍ରମରେ ଛାଡିବାର ବନ୍ଦବୋସ୍ତ ମଧ୍ୟ କରିଥିଲେ । ବୃଦ୍ଧା ଜଣଙ୍କୁ ଖୁଆଇ ଦେଉଥିବାର ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ବି ଗୋପାଳଙ୍କ ପାଇଁ ଚାରିଆଡୁ ପ୍ରଂଶସାର ସୁଅ ଛୁଟୁଛି । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଉକ୍ତ ମହିଳାଙ୍କର ୯ ଜଣ ସନ୍ତାନ ଥିଲେ ମଧ୍ୟ ମା’ କଥା ବୁଝିବା ପାଇଁ କାହା ପାଖରେ ସମୟ ନାହିଁ । ଏଥିପାଇଁ ମା’କୁ ରାସ୍ତାକଡରେ ଜୀବନ ବିତାଉବାକୁ ପଡୁଛି ବୋଲି କହିଛନ୍ତି ଗୋପାଳ । ଏପରିକି ବୃଦ୍ଧା ଅବସ୍ଥାରେ ମା’ର ସେବା କରିବା ବଦଳରେ ରାସ୍ତା କଡରେ ଛାଡି ଦେଇଛନ୍ତି ପୁଅ ।