ଶେଷ ମୁହୂର୍ତ୍ତରେ ଗତିପଥ ବଦଳାଇଲା ତିତଲି! ରେଡ ୱାର୍ଣ୍ଣିଂ ଜାରି ହୋଇନଥିବା ଜିଲ୍ଲାରେ ତାଣ୍ଡବ ରଚିଲା, ବଡ ଧରଣର କ୍ଷୟକ୍ଷତିର ସମ୍ମୁଖୀନ ହେଲା ରାୟଗଡା
କନକ ବ୍ୟୁରୋ : ପାଣିପାଗ ବିଭାଗ ଆକଳନ କରୁଥିଲା, ବାତ୍ୟା ତିତଲି- ଗୋପାଳପୁର ଓ ଆନ୍ଧ୍ରପ୍ରଦେଶର କଳିଙ୍ଗପଟନମ୍ ମଧ୍ୟରେ ସ୍ଥଳଭାଗକୁ ଛୁଇଁବ । ହେଲେ ଶେଷ ମୁହୂର୍ତରେ ସମସ୍ତଙ୍କୁ ଚକମା ଦେଇଥିଲା ବାତ୍ୟା । ଗୋପାଳପୁର ଠାରୁ ୭୦ କିଲୋମିଟର ଦୂର ପଲାସା ଅଂଚଳରେ ହିଟ୍ କଲା ତିତଲି । ଏହାର ପ୍ରଭାବରେ ଓଡିଶାର ଗଜପତି, ଗଂଜାମ ଓ ରାୟଗଡା ଜିଲ୍ଲା ଅଧିକ କ୍ଷତିଗ୍ରସ୍ତ ହେଲା । ସରକାର ଜାରି କରିଥିବା ରେଡୱାଣ୍ଣିଂ ଜିଲ୍ଲା ମଧ୍ୟରେ ରାୟଗଡା ନଥିବାରୁ ବଡ ଧରଣର କ୍ଷୟକ୍ଷତିର ସମ୍ମୁଖୀନ ହୋଇଛି ରାୟଗଡା ।
Kanak News is now on WhatsApp
Join and get latest news updates delivered to you via WhatsApp
୧୦ ତାରିଖ ବିଳମ୍ବିତ ରାତି ଯାଏଁ ଭାରତୀୟ ପାଣିପାଗ ବିଭାଗ ପୂର୍ବନୁମାନ କରୁଥିଲା ଯେ, ବଙ୍ଗୋପସାଗରରୁ ସ୍ଥଳଭାଗ ଆଡକୁ ମାଡିଆସୁଥିବା ବାତ୍ୟା, ଓଡିଶାର ଗୋପାଳପୁର ଓ ଆନ୍ଧ୍ରପ୍ରଦେଶର କଲିଙ୍ଗପଟ୍ଟନମ ମଧ୍ୟବର୍ତ୍ତୀ କୌଣସି ସ୍ଥାନକୁ ହିଟ୍ କରିବ । ଗୋପାଳପୁରଠାରୁ ଏହା ଦକ୍ଷିଣ-ଦକ୍ଷିଣ ପୂର୍ବ ଦିଗକୁ ସମୁଦ୍ର ମଝିରେ ଘନିଭୂତ ହେଉଥିଲା । ଏବଂ ସ୍ଥଳଭାଗ ଆଡକୁ ଏହାର ଗତି ଉତ୍ତର-ଉତ୍ତର ପଶ୍ଚିମ ମୁହାଁ ରହିଥିଲା । ଏହି ଦିଗରେ ବାତ୍ୟା ତିତଲିର ଗତି ଅବ୍ୟାହତ ରହିଥିଲେ ଗଞ୍ଜାମ ଜିଲ୍ଲାର ଓଡିଶା ଉପକୂଳ ଗୋପାଳପୁରରେ ସ୍ଥଳଭାଗକୁ ଛୁଇଁଥାନ୍ତା ତିତଲି । ଠିକ୍ ଏହି ସ୍ଥାନରେ ସ୍ଥଳଭାଗକୁ ହିଟ୍ କରିଥାନ୍ତା । ହେଲେ ଶେଷ ମୁହୂର୍ତରେ ତିତଲି ୧୧ ତାରିଖ ଭୋର ସମୟରେ ଗୋପାଳପୁରର ଦକ୍ଷିଣ-ପଶ୍ଚିମକୁ ଅର୍ଥାତ ଆନ୍ଧ୍ରପ୍ରଦେଶର ଶ୍ରୀକାକୁଲମ୍ ଜିଲ୍ଲା ପାଲାସାରେ ସ୍ଥଳଭାଗକୁ ହିଟ୍ କଲା ବାତ୍ୟା ତିତଲି ।
ଭାରତୀୟ ପାଣିପାଗ ବିଭାଗର ପୂର୍ବାନୁମାନ ଆଧାରରେ ରାଜ୍ୟ ସରକାର ପ୍ରସ୍ତୁତି ଆରମ୍ଭ କରିଥିବାବେଳେ ଗଂଜାମ, ଗଜପତି, ଜଗତସିଂହପୁର, ପୁରୀ ଓ କେନ୍ଦ୍ରାପଡା ଜିଲ୍ଲା ପାଇଁ ରେଡ ୱାର୍ଣ୍ଣିଂ ଜାରି କରିଥିଲେ । ଅର୍ଥାତ ଏହିସବୁ ଜିଲ୍ଲାରେ ସମ୍ଭାବ୍ୟ ବାତ୍ୟାର ପ୍ରଭାବ ରହିବା ଅନୁମାନ କରି ଆରମ୍ଭ ହେଲା ବ୍ୟାପକ ସ୍ଥାନାନ୍ତର ପ୍ରକ୍ରିୟା । ହେଲେ ଶେଷ ମୁହୂର୍ତ୍ତରେ ବାତ୍ୟା ତିତଲି ସାମାନ୍ୟ ଦକ୍ଷିଣ-ପଶ୍ଚିମକୁ ଗତି କରି ସ୍ଥଳଭାଗରେ ପହଂଚିଗଲା । ଫଳରେ ଆନ୍ଧ୍ରପ୍ରଦେଶର ଶ୍ରୀକାକୁଲମ ଜିଲ୍ଲା ସହ ଓଡିଶାର ଗଞ୍ଜାମ, ଗଜପତି, ରାୟଗଡା ଜିଲ୍ଲାକୁ ଅଧିକ ପ୍ରଭାବିତ କଲା । ପୁରୀ ଓ କନ୍ଧମାଳ ଜିଲ୍ଲାର କିଛି ଅଂଚଳକୁ ଖିନଭିନ୍ କରିପକାଇଲା ।
ସେହିପରି ବାତ୍ୟା ତିତଲି ସ୍ଥଳଭାଗରେ ପହଂଚିବା ପରେ ଏହା ରିକର୍ଭ ହୋଇ ଉତ୍ତର-ପୂର୍ବ ଦିଗରେ ଅଗ୍ରସହ ହୋଇ ପଶ୍ଚିମବଙ୍ଗର ଗାଙ୍ଗେୟ କ୍ଷେତ୍ର ଆଡକୁ ମୁହାଁଇଥିଲା । ପାଣିପାଗ ବିଭାଗ ଖୋର୍ଦ୍ଧା, ନୟାଗଡ, କଟକ, ଯାଜପୁର, ଢେଙ୍କାନାଳ, ଭଦ୍ରକ ଓ ବାଲେଶ୍ୱର ଜିଲ୍ଲା ପାଇଁ ଅରେଂଜ ୱାର୍ଣ୍ଣିଂ ଜାରି କରିଥିଲା । ଅର୍ଥାତ ଏହିସବୁ ଜିଲ୍ଲାରେ ତିତଲି ପ୍ରଭାବରେ ଅଧିକ ବର୍ଷା ନେଇ ସତର୍କ ସୂଚନା ଜାରି କରାଯାଇଥିଲା । ହେଲେ ତିତଲି ଏହାର ଦିଗ ପରିବର୍ତ୍ତନ କରିବା ପରେ ଏହାର ପ୍ରଭାବରେ ଗଜପତି ଜିଲ୍ଲାରେ ସର୍ବାଧିକ ୨୨୮ ମିଲିମିଟ ବର୍ଷା ହଇଥିବାବେଳେ ଗଞ୍ଜାମ, କନ୍ଧମାଳ, ଜଗତସିଂହପୁର, ବାଲେଶ୍ୱର, କେନ୍ଦ୍ରାପଡା, ଯାଜପୁର, କଟକ ଓ ପୁରୀ ଜିଲ୍ଲାରେ ପ୍ରବଳ ବର୍ଷା ହୋଇଛି । ବିଶେଷ କରି ଗଞ୍ଜାମ, ଗଜପତି ଓ ରାୟଗଡାରେ ମୂଷଳ ଧାରାରେ ବର୍ଷା ଫଳରେ ବଂଶଧାରା, ରୁଷିକୂଲ୍ୟା ଓ ବାହୁଡା ନଦୀରେ ବଡ ବନ୍ୟା ଆସିଛି ।