ଆଜି ହକି ବିଶ୍ୱ ଲିଗର ଫାଇନାଲ ଫାଇଟ୍ ! ବିଶ୍ୱର ନମ୍ବର ୱାନ ଆର୍ଜେଂଟିନାକୁ ଭେଟିବ ଅଷ୍ଟ୍ରେଲିଆ
କନକ ବ୍ୟୁରୋ: ବିଶ୍ୱ ହକି ଲିଗ ଫାଇନାଲରେ ମୁହାଁମୁହିଁ ହେବେ ଆର୍ଜେଂଟିନା ଓ ଅଷ୍ଟ୍ରେଲିଆ । ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ଶନିବାର ଖେଳାଯାଇଥିବା ଦ୍ୱିତୀୟ ସେମି ଫାଇନାଲରେ ଜର୍ମୀନିକୁ ୩-୦ ଗୋଲରେ ହରାଇ ଫାଇନାଲରେ ପ୍ରବେଶ କରିଛି ଅଷ୍ଟ୍ରେଲିଆ । ପ୍ରଥମରୁ ଆକ୍ରମଣାତ୍ମକ ଖେଳ ଖେଳି ଅଷ୍ଟ୍ରେଲିଆ ଜର୍ମାନୀକୁ ବ୍ୟାକଫୁଟକୁ ଟେଲି ଦେଇଥିଲା । ବାରମ୍ବାର ଜର୍ମାନୀ ଗୋଲପୋଷ୍ଟ ଉପରେ ଆକ୍ରମଣ କରିଚାଲିଥିଲା କଙ୍ଗାରୁ ବାହିନୀ । ଏହାସହ ନିଜର ମଜଭୂତ ପ୍ରତିରକ୍ଷା ପାଇଁ ଜର୍ମାନୀକୁ କୌଣସି ସୁଯୋଗ ଦେଇନଥିଲା । ପୂର୍ବରୁ ପ୍ରଥମ ସେମିରେ ଭାରତକୁ ୧-୦ରେ ହରାଇ ଫାଇନାଲରେ ପ୍ରବେଶ କରିସାରିଛି ଆର୍ଜେଂଟିନା । ଆଜି ସଂଧ୍ୟାରେ ଫାଇନାଲ ଲଢେଇରେ ମୁହାଁମୁହିଁ ହେବେ ଆର୍ଜେଂଟିନା ଓ ଅଷ୍ଟ୍ରେଲିଆ । ସେହିପରି ବ୍ରୋଞ୍ଜ ମେଡାଲ ପାଇଁ ଭାରତ ଓ ଜର୍ମୀନୀ ମଧ୍ୟରେ ମୁକାବିଲା ହେବ ।
Kanak News is now on WhatsApp
Join and get latest news updates delivered to you via WhatsApp
ଉଲ୍ଲେଖଯୋଗ୍ୟ ଯେ, ଚଳିତ ହକି ବିଶ୍ୱ ଲିଗ୍ ଫାଇନାଲରେ ବିଶ୍ୱ ମାନ୍ୟତାର ପ୍ରଥମ ସ୍ଥାନରେ ଥିବା ଆର୍ଜେଣ୍ଟିନା ଗତଥରର ବିଜେତା ଅଷ୍ଟ୍ରେଲିଆକୁ ଭେଟିବ । ଏହି ମହା ମୁକାବିଲା ଆଜି ସଂଧ୍ୟାରେ ଖେଳାଯିବ । ଶୁକ୍ରବାର ରିଓ ଅଲିମ୍ପିକ୍ସ ସ୍ୱର୍ଣ୍ଣ ବିଜେତା ଆର୍ଜେଣ୍ଟିନା ଆୟୋଜକ ଭାରତକୁ ୧-୦ ଗୋଲରେ ହରାଇ ପ୍ରଥମ ଦଳ ଭାବେ ଫାଇନାଲରେ ପ୍ରବେଶ କରିଥିଲା । ଶନିବାର ରାଏପୁରରେ ଆୟୋଜିତ ଦ୍ୱିତୀୟ ସଂସ୍କରଣର ବିଜେତା ଅଷ୍ଟ୍ରେଲିଆ ଏକତରଫା ଭାବେ ୟୁରୋପୀୟ ଦଳ ତଥା ବିଶ୍ୱ ମାନ୍ୟତାର ପଞ୍ଚମ ସ୍ଥାନରେ ଥିବା ଜର୍ମାନିକୁ ୩-୦ ଗୋଲରେ ପରାସ୍ତ କରି ଟ୍ରଫି ଲଢ଼େଇରେ ଅବତୀର୍ଣ୍ଣ ହେବା ଲାଗି ଯୋଗ୍ୟତା ଅର୍ଜନ କରିଛି ।
ଆଜି ମେଗା ଫାଇନାଲରେ ଏହି ଦୁଇ ଦଳ ମୁହାଁ ମୁହିଁ ହେବେ । ତା’ ସହ ହକି ବିଶ୍ୱ ଲିଗ୍ରେ ନୂଆ ଇତିହାସ ଲେଖାହେବ । ଅଷ୍ଟ୍ରେଲିଆ ବିଜୟୀ ହେଲେ ଏକମାତ୍ର ଦଳ ଭାବେ ଏହି ବହୁଦେଶୀୟ ପ୍ରତିଯୋଗିତାରେ ଦୁଇ ଥର ବିଜେତା ହେବାର ଗୌରବ ଅର୍ଜନ କରିବ । ଆର୍ଜେଣ୍ଟିନା ଜିତିଲେ ପ୍ରଥମ ଥର ପାଇଁ ହକି ବିଶ୍ୱ ଲିଗ୍ ମୁକୁଟ ପିନ୍ଧିବାର ସମ୍ମାନ ଲାଭ କରିବ । ହକି ବିଶ୍ୱ ଲିଗ୍ ଚଳିତ ବର୍ଷ ପରେ ବନ୍ଦ ହୋଇ ଯିବାକୁ ଥିବାରୁ ଉଭୟ ଦେଶର କୀର୍ତ୍ତିମାନ ଭାଙ୍ଗିବା ଲାଗି ଅନ୍ୟ କୌଣସି ଦେଶକୁ ସୁଯୋଗ ମିଳିବନି । ନୂଆଦିଲ୍ଲୀରେ ଆୟୋଜିତ ହକି ବିଶ୍ୱ ଲିଗର ପ୍ରଥମ ସଂସ୍କରଣରେ ନେଦରଲାଣ୍ଡ ବିଜୟୀ ହୋଇଥିଲା । ଅନ୍ୟ ପକ୍ଷରେ ରାୟପୁରରେ ଖେଳା ଯାଇଥିବା ଦ୍ୱିତୀୟ ସଂସ୍କରଣରେ ଅଷ୍ଟ୍ରେଲିଆ ବାଜି ମାରି ନେଇଥିଲା ।
ଶନିବାର ରାତିରେ ଖେଳା ଯାଇଥିବା ଅଷ୍ଟ୍ରେଲିଆ-ଜର୍ମାନି ମ୍ୟାଚ୍ ଆରମ୍ଭରୁ ଅଷ୍ଟ୍ରେଲିଆ ଏକପ୍ରକାର ଆଧିପତ୍ୟ ବିସ୍ତାର କରିଥିଲା । ଜର୍ମାନି ଅବଶ୍ୟ ୪୧ ମିନିଟ୍ ପର୍ଯ୍ୟନ୍ତ ଏହି ଦଳର ଆକ୍ରମଣକୁ ପ୍ରତିହତ କରି ପାରିଥିଲା । ତେବେ ୪୨ ମିନିଟରେ ଡାଏଲନ ଉଦରସ୍ପୁନ୍ ଏକ ଚମତ୍କାର ଫିଲ୍ଡ ଗୋଲ୍ ବଳରେ କଙ୍ଗାରୁ ଦଳକୁ ଆଗୁଆ କରି ଦେଇଥିଲେ । ଏହା ପରେ ଅଷ୍ଟ୍ରେଲିଆ ଆଉ ପଛକୁ ଫେରି ଚାହିଁ ନଥିଲା । ୬ ମିନିଟରେ ଜେରମି ହେଓ୍ଵାର୍ଡ ପେନାଲ୍ଟି କର୍ନରକୁ ଗୋଲରେ ରୂପାନ୍ତର କରି ସ୍ଥିତି ୨-୦ କରି ନେଇଥିଲେ । ସେହିଭଳି ଶେଷ ମିନିଟରେ ଟମ୍ ଓ୍ଵିକାମ ଆଉ ଏକ ଫିଲ୍ଡ ଗୋଲ୍ ଦେଇ ଅଷ୍ଟ୍ରେଲିଆକୁ ୩-୦ ବିଜୟ ଊପହାର ଦେଇଥିଲେ । ଅଷ୍ଟ୍ରେଲିଆର ୧୯ ବର୍ଷୀୟ ଖେଳାଳି ସାର୍ପ ଲାଚଲନ ମ୍ୟାଚର ଶ୍ରେଷ୍ଠ ଉଦୀୟମାନ ଖେଳାଳି ଏବଂ ଜର୍ମାନିର ୫ ନମ୍ବର ଖେଳାଳି ଫିଲିପ ହୁବର ମ୍ୟାଚର ଶ୍ରେଷ୍ଠ ଖେଳାଳି ପୁରସ୍କାର ଲାଭ କରିଥିଲେ ।
ଅନ୍ୟପଟେ, ଭୁବନେଶ୍ୱର କଳିଙ୍ଗ ଷ୍ଟାଡିଅମରେ ଖେଳାଯିବ ବିଶ୍ୱ ହକି ଲିଗର ଫାଇନାଲ ମ୍ୟାଚରେ ସାମିଲ ହେବାକୁ ଓଡିଶା ଆସିଛନ୍ତିି କେନ୍ଦ୍ର କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ରାଜ୍ୟବର୍ଦ୍ଦନ ସିଂ ରାଠୋର । କେନ୍ଦ୍ରମନ୍ତ୍ରୀ ତିନି ଦିନିଆ ଓଡିଶା ଗସ୍ତରେ ଆସିଛନ୍ତି । ହକି ପାଇଁ ଓଡିଶାର ଭୁରି ଭୁରି ପ୍ରଶଂସା କରିଛନ୍ତି କେନ୍ଦ୍ରମନ୍ତ୍ରୀ । କହିଛନ୍ତି, ଓଡିଶା ହେଉଛି ହକିର ଗଡ । ଓଡିଶାରୁ ଅନ୍ତର୍ଜାତୀୟ ସ୍ତରର ଖେଳାଳି ବାହାରୁ ଥିବାରୁ ହକିର ମାନକୁ କିପରି ଆହୁରି ଅଧିକ ବୃଦ୍ଧି କରିହେବ ସେନେଇ ରାଜ୍ୟ ସରକାର ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ଆଲୋଚନା କରି ଆଗକୁ ପଦକ୍ଷେପ ନେବେ । ଏଥିସହ ଖେଳାଳିଙ୍କୁ କିପରି ସମସ୍ତ ପ୍ରକାର ସୁବିଧା ସୁଯୋଗ ମିଳିବ ସେନେଇ ଧ୍ୟାନ ଦିଆଯିବ ବୋଲି କହିଛନ୍ତି କେନ୍ଦ୍ର କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ରାଜ୍ୟବର୍ଦ୍ଧନ ସିଂ ରାଠୋର ।