ବୁର୍ଲା ମେଡିକାଲରେ ରୋଗୀଙ୍କ ଜୀବନ ସହ ସାଂଘାତିକ ଖେଳ । ଏଚଆଇଭି ସଂକ୍ରମିତ ଉପକରଣରେ ରୋଗୀଙ୍କ ଅସ୍ତ୍ରୋପଚାର ଅଭିଯୋଗ, ଡାକ୍ତର କହିଲେ ଅଭିଯୋଗ ଭିତ୍ତିହୀନ
କନକ ବ୍ୟୁରୋ : ରୋଗୀଙ୍କ ଜୀବନ ସହ ସାଂଘାତିକ ଖେଳ । କୌଣସି ସତର୍କତାମୂଳକ ପଦକ୍ଷେପ ଗ୍ରହଣ ନକରି ଏଚଆଇଭି ବା ଏଡସ ରୋଗୀଙ୍କ ଚିକିତ୍ସା କରାଯାଇଥିବା ଉପକରଣରେ ଅନ୍ୟ ରୋଗୀଙ୍କ ଚିକିତ୍ସା କରାଯାଇଛି । ଏହି କଥା ପ୍ରଘଟ ହେବା ପରେ ଭିମସାର ପରିସରରେ ଚାଞ୍ଚଲ୍ୟ ଖେଳିଯାଇଛି । ଏପଟେ ଘଟଣାର ତଦନ୍ତ ପାଇଁ ମେଡିକାଲ ସୁପରିଟେଣ୍ଡେଂଟଙ୍କୁ ନିର୍ଦେଶ ପରେ ୫ ଜଣିଆ ଟିମ ଗଠନ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ବୁର୍ଲା ବୀର ସୁରେନ୍ଦ୍ର ସାଏ ମେଡିକାଲ କଲେଜର ଏକ ଏଭଳି ଘଟଣା ସାମ୍ନାକୁ ଆସିଛି ଯାହା ଆପଣଙ୍କୁ ଆଶ୍ଚଯ୍ୟ କରିଦେବ । ଅଭିଯୋଗ ଏତେ ଗମ୍ଭୀର ଯେ, ଜଣେ ଭୟଭୀତ ହୋଇଯିବାର ଅନେକ ସମ୍ଭାବନା ରହିଛି । ଗତ ୨୮ ତାରିଖରେ ଜଣେ ଏଚଆଇଭି ଆକ୍ରାନ୍ତ ରୋଗୀଙ୍କୁ ଅପରେସନ୍ କରିବା ପରେ ସେହି ସମାନ ଉପକରଣରେ ଅନ୍ୟ ରୋଗୀଙ୍କ ଦାନ୍ତ ଓପଡା ଯାଇଥିବା ଅଭିଯୋଗ ହୋଇଛି । ଭିମସାରର ଦାନ୍ତ ବିଭାଗର ମୁଖ୍ୟ ନିଜ ବିଭାଗକୁ ନେଇ ଏହି କଥା ସାମ୍ନାକୁ ଆଣିଛନ୍ତି ।
ପ୍ରୋଟୋକଲ କିମ୍ବା ନିୟମ ଅନୁସାରେ ଏଚଆଇଭି ବା ଏଡସ୍ ଆକ୍ରାନ୍ତ ବ୍ୟକ୍ତିଙ୍କ ଦାନ୍ତ ଅପରେସନ ପରେ । ଆବଶ୍ୟକୀୟ ବିଶୋଧନ କରାଯିବାର ଆବଶ୍ୟକତା ରହିଛି । କିନ୍ତୁ ଅଭିଯୋଗ ଅନୁସାରେ କୌଣସି ସତର୍କତାମୂଳକ ପଦକ୍ଷେପ ଗ୍ରହଣ ନକରି ଦାନ୍ତ ବିଭାଗର ଆସିଷ୍ଟାଣ୍ଟ ପ୍ରଫେସର ପ୍ରଶାନ୍ତ ସ୍ୱାଇଁ ଜଣେ ଏଚଆଇଭି ରୋଗୀଙ୍କ ଦାନ୍ତ ଅପରେସନ ପରେ ଅନ୍ୟ ୨ ଜଣ ରୋଗୀଙ୍କ ଦାନ୍ତ ଓପାଡିଛନ୍ତି । ଏନେଇ ଡିନଙ୍କୁ ଲିଖିତ ଭାବେ ଜଣାଯାଇଛି ।
ସେପଟେ ଦାନ୍ତ ଅପରେସନ କରିଥିବା ଡାକ୍ତର ପ୍ରଶାନ୍ତ କୁମାର ସ୍ୱାଇଁ କନକ ନ୍ୟୁଜରେ ତାଙ୍କ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି ପ୍ରୋଟୋକଲ କିମ୍ବା ନିୟମ ଅନୁସାରେ ସବୁ କାମ ହୋଇଛି । ଅନ୍ୟ ରୋଗୀଙ୍କର ଦାନ୍ତ ଓପଡା ଅନ୍ୟ ରୁମରେ କରିବା ସହିତ ଅନ୍ୟ ଉପକରଣରେ କରିଥିବା ସଂପୃକ୍ତ ଡାକ୍ତର କହିଛନ୍ତି । ଘଟଣାକୁ ଗୁରୁତର ସହ ନେଇ ଭିମସାର ଡିନ୍ ବ୍ରଜମୋହନ ମିଶ୍ର ଘଟଣାର ତଦନ୍ତ ନିର୍ଦେଶ ଦେଇଛନ୍ତି । ତଦନ୍ତ ପାଇଁ ସୁପରିଟେଣ୍ଡଂଟଙ୍କ ନେତୃତ୍ୱରେ ଏକ ପାଂଚ ଜଣିଆ ଟିମ୍ ଗଠନ କରାଯାଇଛି ।ବ୍ରୁ୍ଲା ମେଡିକାଲର ଏହି ଘଟଣା ଯେତିକି ଗୁରୁତର ସେତିକି ସମ୍ବେଦନଶୀଳ ମଧ୍ୟ । ଘଟଣାର ତଦନ୍ତ ପରେ ପ୍ରକୃତ ତଥ୍ୟ ସାମ୍ନାକୁ ଆସିବ ।