କନକ ବ୍ୟୁରୋ: ହିମାଳୟ ଭାଲୁ କଲା ମାଙ୍କଡ ଶିକାର । ନନ୍ଦନକାନନ ଚିଡିଆଖାନାରେ ଚିଲିଛି ଜଙ୍ଗଲରାଜର ଆତଙ୍କ । ପ୍ରାଣୀ ଉଦ୍ୟାନର ୧୬ ‘ଖ’ ଖୁଆଡରେ ହିମାଳୟ ଭାଲୁ ‘କୁଲୁ’ ମାଙ୍କଡ ଛୁଆ ଶିକାର କରିଛି । ଗତକାଲି ଅପରାହ୍ନରେ ଖୁଆଡ ପ୍ରାଚୀର ଓ ଗଛ ଉପରେ ମାଙ୍କଡ ପଲ ଖେଲକୁଦ କରୁଥିଲେ । ଏହି ସମୟରେ କାଠ ସିଡି ତଳେ ବିଶ୍ରାମ ନେଇଥିଲା ହିମାଳୟ ଭାଲୁ ‘କୁଲୁ’ । ଏହି ସମୟରେ ଏକ ୩-୪ ମାସର ମାଙ୍କଡ ଶିଶୁ ଖୁଆଡର ଚଟାଣକୁ ଚାଲିଆସିଥିଲା । ଆଉ ଏହାର ସୁଯୋଗରେ ମାଙ୍କଡ ଶାବକକୁ ମାଡି ବସିଥିଲା ‘କୁଲୁ’ । ମାଙ୍କଡ ଶିଶୁକୁ ହିମାଳୟ ଭାଲୁ ‘କୁଲୁ’ ତୀକ୍ଷ୍ଣ ଦାନ୍ତ ଓ ନଖର ବିଦାର ଦେଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଛୁଆକୁ ହିମାଳୟ ଭାଲୁ ‘କୁଲୁ’ କବଳରୁ ଛଡାଇବାକୁ ଚିକ୍ରାର କରି କିଛି ବାଟ ମାଡି ଆସିଥିଲା ମାଆ ମାଙ୍କଡ । ହେଲେ ବିଶାଳକାୟ ଭାଲୁକୁ ମୁକାବିଲା କରିବାକୁ ସାହାସ କୁଳାଇନପାରି ପୁଣି ପଛକୁ ଫେରିଯାଇଥିଲା । ଛୁଆ ମୃତ୍ୟୁର ହୃଦୟ ବିଦାରକ ଦୃଶ୍ୟକୁ ମାଆ ମାଙ୍କଡ ଦେଖିଥିଲା । ଅନ୍ୟମାଙ୍କଡମାନେ ମଧ୍ୟ ଚିକ୍ରାର କରିଥିଲେ, ହେଲେ ହିମାଳୟ ଭାଲୁ ‘କୁଲୁ’ ଉପରେ ଏହାର କୌଣସି ପ୍ରଭାବ ପଡିନଥିଲା । ମାଙ୍କଡ ଶାବକର ଅନ୍ତବୁଜୁଳା ବାହାରି କରି ସେ ଶିକାରର ମଜା ନେଇଥିଲା । ଏହା ପରେ ମୃତ ମାଙ୍କଡର ଦେହକୁ ଧରି ଖୁଆଡ ସାରା ବୁଲାବୁଲି କରିଥିଲା ‘କୁଲୁ’ ।
ନିରାଶ ହୋଇ ମାଙ୍କଡ ପଲ ଚାଲିଯାଇଥିଲେ । ଜନ୍ତୁରକ୍ଷକ ଆସି ମୃତ ମାଙ୍କଡ ଛୁଆ ଠାରୁ କୁଲୁକୁ ଅଲଗା କରିବାକୁ ଉଦ୍ୟମ କରି ବିଫଳ ହୋଇଥିଲେ । ସନ୍ଧ୍ୟାରେ କୁଲୁ ତା କକ୍ଷକୁ ଯିବା ପରେ ମାଙ୍କଡର ମୃତଦେହକୁ ଉଦ୍ଧାର କରାଯାଇଛି । ଅତୀତରେ ନନ୍ଦନକାନନରେ ସିଂହ ଯୋଡି କ୍ରୀସ, ରାଧା ଖୁଆଡକୁ ଡେଇଁପଡିଥିବା ହରିଣକୁ ଶିକାର କରିଥିଲେ । ସେହିଭଳି ଗତବର୍ଷ ମହାବଳ ବାଘ ବାହୁବଳୀ ଓ ମନୀଷ ମଧ୍ୟ ମାଙ୍କଡ ଶିକାର କରିଥିବା ନଜିର ରହିଛି ।