ଶବଙ୍କ ସେବାରେ ଜୀବନ କରିଛନ୍ତି ଉତ୍ସର୍ଗ ! ପଢନ୍ତୁ ସମାଜସେବା ପାଇଁ ଅବିବାହିତ ରହିଥିବା ଶାନ୍ତନୁଙ୍କ କାହାଣୀ
କୌଣସି ବି ଟେଲିଭିଜନ୍ ନ୍ୟୁଜ୍ ଚ୍ୟାନେଲ୍ ଅନ୍ କରନ୍ତୁ । କିମ୍ବା ଖବର କାଗଜର ଯେକୌଣସି ପୃଷ୍ଠା ଓଲଟାନ୍ତୁ । ସବୁଠାରେ ଅପରାଧର ଖବର । କେଉଁଠାରେ କେହି ଦୁଷ୍ମର୍ମ କରିଛି ତ ଆଉ କେଉଁଠି ହୋଇଛି ହତ୍ୟାକାଣ୍ଡ । କେହି ଲୁଟ୍ କରିଛି ତ କେହି କେହି ଲୁଟି ହୋଇଯାଇଛନ୍ତି । ସତେ ଯେମିତି ଦେଶ ହୋଇପଡିଛି ଅପରାଧପ୍ରବଣ । ଆଉ ମଣିଷଠୁ ଦୂରେଇ ଯାଇଛି ମାନବିକତା । ହେଲେ ଏସବୁ ଭିତରେ ଆସିଛି ଏକ ଭଲ ଖବର ।
Kanak News is now on WhatsApp
Join and get latest news updates delivered to you via WhatsApp
ହିମାଚଳ ପ୍ରଦେଶ ହମିରପୁରର ଶାନ୍ତନୁ କୁମାର ଏମିତି କିଛି କରି ଦେଖାଇଛନ୍ତି ଯାହାଙ୍କୁ ପୁରା ଦେଶ ଏବେ କରୁଛି ସଲାମ୍ । ପ୍ରାୟ ୧୫ ବର୍ଷ ହେବ ଅଚିହ୍ନା ମୃତ ଦେହକୁ ନିଜ କାନ୍ଧରେ ଉଠାଇ ସେମାନଙ୍କ ଅନ୍ତିମ ସଂସ୍କାର କରୁଛନ୍ତି ଶାନ୍ତନୁ । କେବଳ ସେତିକି ନୁହେଁ ହରିଦ୍ୱାରରେ ହିନ୍ଦୁ ରୀତିନୀତି ଅନୁସାରେ ଗଙ୍ଗାରେ ଅସ୍ଥି ବିସର୍ଜନ କରିବା ସହ ପିଣ୍ଡଦାନ ମଧ୍ୟ କରିଥାନ୍ତି । ଆଉ ଏସବୁ ନିଜ ଖର୍ଚ୍ଚରେ ତୁଲାଇଥାନ୍ତି ଶାନ୍ତନୁ । ଏଯାଏଁ ସେ ପ୍ରାୟ ୬୦୦ ଅଚିହ୍ନା ମୃତଦେହଙ୍କ ଅନ୍ତିମ ସଂସ୍କାର କରି ସାରିଛନ୍ତି ।
କେବଳ ସେତିକିରେ ସରିନାହିଁ ଶାନ୍ତନୁଙ୍କ ମଣିଷପଣିଆ । ଏହି ସମାଜସେବା ପାଇଁ ସାରାଜୀବନ ଅବିବାହିତ ରହିବା ପାଇଁ ନିଷ୍ପତି ମଧ୍ୟ ନେଇଛନ୍ତି । ଶାନ୍ତନୁ ଏଥିପାଇଁ ଅନେକ ସମ୍ମାନ ଏବଂ ପୁରସ୍କାର ମଧ୍ୟ ପାଇଛନ୍ତି । ତେବେ ଜାଣି ଆଶ୍ଚର୍ଯ୍ୟ ହେବେ ପୁରସ୍କାରରେ ମିଳୁଥିବା ରାଶିକୁ ମଧ୍ୟ ଚାରିଟିରେ ଦାନ କରିଦିଅନ୍ତି ଶାନ୍ତନୁ । ମଦର ଟେରେସାଙ୍କୁ ନିଜ ପ୍ରେରଣା ବୋଲି ମାନଥିବା ଶାନ୍ତନୁଙ୍କ ଭିତରେ ସମାଜସେବାର ଭାବନା ସୃଷ୍ଟି କରିଥିଲା ହମିରପୁରରେ ହୋଇଥିବା ଏକ ଦୁର୍ଘଟଣା । ଆଉ ୧୯୯୦ରୁ ନିଜକୁ ସଂପୂର୍ଣ୍ଣ ରୂପେ ଏହି କାର୍ଯ୍ୟରେ ଉତ୍ସର୍ଗ କରିଦେଇଛନ୍ତି ।