ପାଟକୁରା ଆକାଶରେ ‘ବୟାନବାଜି’ ବିଜୁଳି: ଭୃଗୁ-କିଶୋରଙ୍କ ବିସ୍ଫୋରକ ବୟାନ ପରେ ଗୋଳିଆ ହେଲା ପାଟକୁରା ପାଣି…
କନକ ବ୍ୟୁରୋ: ‘ପାଟକୁରା’ ପରୀକ୍ଷା ପାଇଁ ଜୋରସୋରରେ ଚାଲିଛି ପାଠପଢା । ତାରିଖ ଯେତିକି ପାଖଉଛି ପ୍ରସ୍ତୁତି ସେତିକି ପ୍ରଖର ହେଉଛି । ଏଗାର ଦିନ ପରେ ଏକ୍ଜାମ ଥିବାରୁ ସମସ୍ତଙ୍କ ଆଖିରୁ ନିଦ ହଜି ଯାଇଛି । ଆଉ ଏତିକି ବେଳେ ପାଟକୁରା ପାଣିକୁ ଗୋଳିଆ କରିଛି ବଡ ବଡିଆଙ୍କ ବୟାନବାଜି । ଉଭୟ ବିଜେପି ଓ ବିଜେଡିର ହେଭିୱେଟ ନେତାଙ୍କ ବୟାନବାଜି ପରେ ସରଗରମ ହୋଇଛି ରାଜନୈତିକ ପାଣିପାଗ ।
Kanak News is now on WhatsApp
Join and get latest news updates delivered to you via WhatsApp
ତେବେ ଗଡ଼ ରକ୍ଷା ପାଇଁ ବିଜେଡିର ମାଳମାଳ ନେତା, ମନ୍ତ୍ରୀ ପାଟକୁରାରେ ଡେରା ପକାଇଥିବା ବେଳେ ଏହାକୁ ନେଇ ଆଜି ବିସ୍ଫୋରକ ବୟାନ ଦେଇଛନ୍ତି ବିଜେପିର ସାଧାରଣ ସମ୍ପାଦକ ଭୃଗୁ ବକ୍ସିପାତ୍ର । ସବୁଜ ଶିବିରକୁ ସିଧାସଳଖ ତୀର ମାରି ଭୃଗୁ ବିଜେଡିକୁ ଘାଇଲା କରିଛନ୍ତି । ବିଜେପିର ବିଜୟ ପାଇଁ ବିଜେଡି ପ୍ରଚାର କରୁଥିବା ସେ କହିଛନ୍ତି । ପାଟକୁରାରେ ବିଜେପି ଏବଂ ବିଜୟ ମହାପାତ୍ରଙ୍କୁ ଜିତେଇବା ପାଇଁ ବିଜେଡିର ନେତା ମନ୍ତ୍ରୀ ଏଠାରେ ପ୍ରଚାର କରୁଛନ୍ତି । ବିଜେଡିର ଯେଉଁ ମାଳମାଳ ନେତା ଏଠାକୁ ଆସୁଛନ୍ତି ସେମାନେ ସବୁ ଆମ ପାଇଁ କାମ କରୁଛନ୍ତି । ପାଟକୁରାର ସବୁ ଭୋଟରଙ୍କ ସହ ବିଜେଡି ବି ମନସ୍ଥ କରିସାରିଛନ୍ତି କି ଏଥର ବିଜୟଙ୍କୁ ହିଁ ବିଧାନସଭା ପଠାଇବେ ବୋଲି । ତେବେ ସେମାନେ ସେମାନଙ୍କ ବସଙ୍କୁ ଖୁସି କରାଇବାକୁ ଏଠାରେ ବୁଲୁଛନ୍ତି ବୋଲି ଭୃଗୁ ଭୀଷଣ କଟାକ୍ଷ କରିଛନ୍ତି ।
ତେବେ ଭୃଗୁଙ୍କ ଏହି ବୟାନକୁ ଖଣ୍ଡନ କରିଛି ବିଜେଡି । କେନ୍ଦ୍ରାପଡା ଜିଲ୍ଳା ସଭାପତି କିଶୋର ତରାଇଙ୍କ ସହ ଗରଦପୁର ବ୍ଲକର ୨ଟି ପଞ୍ଚାୟତ ଦାୟିତ୍ୱରେ ଥିବା ମନ୍ତ୍ରୀ ସୁଶାନ୍ତ ସିଂ ମଧ୍ୟ ଭୃଗୁଙ୍କ ଏହି ବୟାନକୁ ଅବାନ୍ତର ବୋଲି କହିଛନ୍ତି । ଲୋକଙ୍କୁ ଭୁଆଁ ବୁଲାଇବାକୁ ବିଜେପି ସବୁବେଳେ ଏମିତି କହେ ମାତ୍ର ଆମେ ପାଟକୁରାରେ କେମିତି ଶଙ୍ଖ ଚିହ୍ନର ଜିତ୍ ହେବ ସେନେଇ ସମସ୍ତ କର୍ମୀ ସମର୍ପିତ ହୋଇ କାମ କରୁଛନ୍ତି ବୋଲି ସୁଶାନ୍ତ ସିଂ କହିଛନ୍ତି ।
ଅନ୍ୟପଟେ ଭୃଗୁଙ୍କୁ ଓଲଟା ଜବାବ ଦେଇଛନ୍ତି କିଶୋର ତରାଇ । ବିଜେଡି ନୁହେଁ ବରଂ ବିଜେପି ନେତା ବିଜେଡିକୁ ଜିତେଇବା ପାଇଁ କାମ କରୁଛନ୍ତି । ଭୃଗୁଙ୍କ ଭଳି ଜଣେ ପରିପକ୍ୱ ନେତା ଏଭଳି ବାଚାଳାମୀ ବୟାନ ଦେବା ଉଚିତ ନୁହେଁ କହି ଭୃଗୁଙ୍କୁ ସମାଲୋଚନା କରିଛନ୍ତି କିଶୋର । ବିଜେଡି ୩୦ରୁ ୪୦ ହଜାର ଭୋଟ ବ୍ୟବଧାନରେ ଜିତିବ ବୋଲି କିଶୋର କହିଛନ୍ତି । ତେବେ ଭୋଟ ପୂର୍ବରୁ ଉଭୟ ବିଜେପି- ବିଜେଡି ବୟାନ ଭୋଟରଙ୍କ ମନରେ ଦ୍ୱନ୍ଦ୍ୱ ସୃଷ୍ଟି କରିଥିବା ବେଳେ ‘କିଏ କାହା ପାଇଁ କାମ କରୁଛି’ ? ଏହା ଏକ ବଡ ପ୍ରଶ୍ନ ହୋଇ ଛିଡା ହୋଇଛି । ତେବେ ଭୋଟ ଗଣତି ପରେ ସବୁ ଫର୍ଚ୍ଚା ହୋଇଯିବ । ପାଣି ପାଣି, କ୍ଷୀର କ୍ଷୀର ହୋଇଯିବ ।