ପୁରୁଣା କଥା ଭୁଲିଯାଅ, ଆମ ସହ ଆସିଲେ ଯେତିକି କମେଇଛ ତାହା ଠାରୁ ୧୦୦ ଗୁଣ ଅଧିକ କମେଇବ ! ବିଧାୟକଙ୍କୁ ବିଜେପି ନେତା ଟଙ୍କା ଯାଚୁଥିବାର ଅଡ଼ିଓ ଟେପ ଜାରି କଲା କଂଗ୍ରେସ
କନକ ବ୍ୟୁରୋ : କର୍ଣ୍ଣାଟକ ନାଟକରେ ଯୋଡି ହୋଇଯାଇଛି ନୂଆ ଅଧ୍ୟାୟ । ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ଆସନ୍ତାକାଲି ବିଜେପି ବିଧାନସଭାରେ ସଂଖ୍ୟା ଗରିଷ୍ଠତାର ପ୍ରମାଣ ଦେବାକୁ ଯାଉଥିବାବେଳେ କଂଗ୍ରେସ ଆଣିଛି ସାଂଘାତିକ ଅଭିଯୋଗ । ଆବଶ୍ୟକ ସଂଖ୍ୟା ନଥିବା ବିଜେପି ଟଙ୍କାର ଲୋଭ ଦେଖାଇ କଂଗ୍ରେସ ବିଧାୟକଙ୍କୁ କିଣିବାକୁ ଉଦ୍ୟମ କରୁଥିବା ଅଭିଯୋଗ କରିଛି ଦଳ । ଏପରିକି ବିଜେପି ବିଧାୟକ ତଥା ଖଣି ବ୍ୟବସାୟୀ ଜନାର୍ଦ୍ଦନ ରେଡ୍ଡି, ରାଇଚୁର ରୁରାଲ ଆସନରୁ ବିଜୟୀ ଜଣେ କଂଗ୍ରେସ ବିଧାୟକଙ୍କୁ ଟଙ୍କା ଯାଚୁଥିବାର ଏକ ଅଡିଓ ଟେପ ଜାରି କରିଛି କଂଗ୍ରେସ ।
Kanak News is now on WhatsApp
Join and get latest news updates delivered to you via WhatsApp
ଯେଉଁଥିରେ ଜନାର୍ଦ୍ଦନ ରେଡ୍ଡି ସଂପୃକ୍ତ ବିଧାୟକଙ୍କୁ ଆସନ୍ତାକାଲି ବିଧାନସଭାରେ ୟେଦିୟୁରପ୍ପାଙ୍କୁ ସମର୍ଥନ କରିବା ପାଇଁ କହୁଛନ୍ତି ଆଉ ପ୍ରତିବଦଳରେ ତାଙ୍କୁ ମନ୍ତ୍ରୀପଦ ମିଳିବ ବୋଲି ପ୍ରତିଶ୍ରୁତି ଦିଆଯାଉଛି । ଏହି ଅଡିଓ ଟେପର ବୈଦ୍ଧତା ସ୍ପଷ୍ଟ ହୋଇନଥିବାବେଳେ ଏକ ସାମ୍ବାଦିକ ସମ୍ମିଳନୀ କରି ଟେଲିଫୋନ ବାର୍ତାଳାପର ଏହି ଅଡିଓ ଟେପକୁ ଜାରି କରିଛି କଂଗ୍ରେସ ।
ଜନାର୍ଦ୍ଦନ ରେଡ୍ଡି ଓ ବାସନାଗୌଡ଼ାଙ୍କ ଭିତରେ ହୋଇଥିବା କଥାବାର୍ତା
ଜନାର୍ଦ୍ଦନ ରେଡ୍ଡି :
ବାସନାଗୌଡା କହୁଛନ୍ତି? ଆପଣ ଫ୍ରି ଅଛନ୍ତି?
ବାସନାଗୌଡା:
ହଁ ଆଜ୍ଞା ମୁଁ କହୁଛି ।
ଜନାର୍ଦ୍ଦନ ରେଡ୍ଡି :
ଆଗରୁ ଯାହାକିଛି ହୋଇଛି ସବୁ ଭୁଲିଯାଅ । ସବୁ ଖରାପ କଥାକୁ ଭୁଲିଯାଅ । ମୋର ଭଲ ସମୟ ଆସିଯାଇଛି । ଜାତୀୟ ସଭାପତିଙ୍କ ସହ ତୁମର ଅଲୋଚନା ପାଇଁ ବନ୍ଦୋବସ୍ତ କରିବି । ତାଙ୍କସହ ସିଧାସଳଖ କଥାହେବ । ଆମେ ପରବର୍ତ୍ତି ପଦକ୍ଷେପ ନେବା ।
ବାସନାଗୌଡା :
ନାହିଁ ସାର । ଶେଷ ମୁହୂର୍ତ୍ତରେ ସେମାନେ ମୋତେ ବିଧାୟକ କରିଛନ୍ତି ।
ଜନାର୍ଦ୍ଦନ ରେଡ୍ଡି :
ମୁଁ ଗୋଟେ କଥା କହୁଛି । ବିଏସଆରଙ୍କ ସମୟରେ ଆମେ ଯେତେବେଳେ ଦଳ ଗଢିଲୁ ବହୁତ ଖରାପ ସମୟ ଥିଲା । ଅନେକ ବିରୋଧ ହୋଇଥିଲା । ଏକଥା ସତ ଯେ, ଆମକୁ ବିଶ୍ୱାସ କରି ତମେ ଅନେକ କିଛି ହରାଇଛ । କିନ୍ତୁ ମୁଁ ଆଶ୍ୱାସନା ଦେଉଛି ତମେ ୧୦୦ଗୁଣା ଉନ୍ନତି କରିବ । ଶିବନାଗୌଡା ମୋ ପାଇଁ ମନ୍ତ୍ରୀ ହୋଇପାରିଲେ । ଏବେ ସେ ନିଜକଥା ନିଜେ ବୁଝିବାକୁ ସକ୍ଷମ । କେବଳ ମୋ ପାଇଁ । ରାଜୁ ଗୌଡା ବି ଲାଭବାନ ହୋଇଛନ୍ତି ।
ବାସନାଗୌଡା :
ଆଜ୍ଞା
ଜନାର୍ଦ୍ଦନ ରେଡ୍ଡି :
ଏହା ତମର ଦୁର୍ଭାଗ୍ୟ ଯେ, ସେତେବେଳେ ଆମର ଖରାପ ସମୟ ଥିଲା । ଆଜି ଶିବନାଗୌଡାଙ୍କ ବିଜୟର କିଛି ମାନେ ନାହିଁ । ତୁମେ ମନ୍ତ୍ରୀ ହେବ । ବୁଝିପାରୁଛ ନା ନାହିଁ । ନେତାଙ୍କ ସହ ତମେ ସିଧା ଦେଖା କରିବ । ତାଙ୍କ ସହ କଥାବାର୍ତ୍ତା ପାଇଁ ମୁଁ ବ୍ୟବସ୍ଥା କରିବି । ଆଜି ପର୍ଯ୍ୟନ୍ତ ଯେତେ ରୋଜଗାର କରିଛ ତାର ୧୦୦ଗୁଣା କମେଇବ ।
ବାସନାଗୌଡା :
ସାର ମୁଁ ଦୁଃଖିତ । ଶେଷ ସମୟରେ ସେମାନେ ମୋତେ ଖଣ୍ଡେ ଟିକେଟ ଦେଲେ ଆଉ ଜିତିବାକୁ ସାହାଯ୍ୟ କଲେ । ଏଭଳି ପରିସ୍ଥିତିରେ ମୁଁ ତାଙ୍କୁ ଧୋକା ଦେଇପାରିବିନି । ମୁଁ ଆପଣଙ୍କୁ ସମ୍ମାନ କରେ
ବାସ ଏହାପରେ ଫୋନ କଟିଯାଇଥିଲା । ଗୋଟିଏ ପଟେ ବିଜେପି ଘୋଡ଼ାବେପାର କରି କଂଗ୍ରେସ ବିଧାୟକଙ୍କୁ କିଣିବାକୁ ଚେଷ୍ଟା କରୁଛି ବୋଲି ଅଭିଯୋଗ ଆଣୁଥିବା ବେଳେ ଏବେ ଏଭଳି ଅଡ଼ିଓ ଟେପ କର୍ଣ୍ଣାଟକ ରାଜନୀତି ନାଟକର ଆଉ ଏକ ନୂଆ ଅଧ୍ୟାୟ ସୃଷ୍ଟି କରିଛି ।