ଚିଲିକା ଉପରେ ଉଡିଥିବା ଧଳା ହେଲିକପ୍ଟର କାହାର ? ମେରାଇନ ଥାନାରେ ଏତଲା ଦାୟର, ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଦାବି ।
କନକ ବ୍ୟୁରୋ : ଚିଲିକା ଉପରେ ଉଡିଥିଲା ହେଲିକପ୍ଟର । ବେଆଇନ ଭାବେ ବିପଦଜନକ ଉଚ୍ଚତାରେ ମଣିଷ ଓ ବନ୍ୟପ୍ରାଣୀଙ୍କ ଜୀବନକୁ ବିପଦରେ ପକାଇ ହେଲିକପ୍ଟର ଉଡାଇବା ନେଇ ମେରାଇନ ଥାନାରେ ଅଭିଯୋଗ କରିଛନ୍ତି ଚିଲିକା ଉନ୍ନୟନ କର୍ତ୍ତୃପକ୍ଷ ଏସିଏଫ ବିନୋଦ ଆଚାର୍ଯ୍ୟ । ଆଜି ଥାନାରେ ମାମଲା ଦାୟର ପରେ ଘଟଣାକୁ ନେଇ ଚର୍ଚ୍ଚା ବଢିଛି ।
Kanak News is now on WhatsApp
Join and get latest news updates delivered to you via WhatsApp
ଏତଲାରେ କୁହାଯାଇଛି, ଗତ ୧୫ ତାରିଖ ଦିନ ଅପରାହ୍ନ ପ୍ରାୟ ସାଢେ ଗୋଟାଏ ସମୟରେ ଧଳା ରଙ୍ଗର ଏକ ହେଲିକପଟର ଚିଲିକା ଉପରେ ଉଡିଥିଲା । ଏପରିକି ନିକଟସ୍ଥ ଅଂଚଳରେ ଲ୍ୟାଣ୍ଡ କରିବାକୁ ହେଲିକପଟରର ପାଇଲଟ ଚେଷ୍ଟାକରିଥିଲେ । ତେବେ ଧଳା ହେଲିକପଟରଟି କାହାର, ତାହା ଏଯାଏଁ ସ୍ପଷ୍ଟ ହୋଇନାହିଁ ।
ନୋ ଫ୍ଲାଇଙ୍ଗ ଇକୋ ସେନସିଟିଭ୍ ଜୋନରେ ହେଲିକପଟର ଉଡିବା ପରେ ଆପତ୍ତି ଉଠାଇଛି ସିଡିଏ । ନାଭିଗେସନ ରୁଟକୁ ନଷ୍ଟ କରି ଚିଲିକାର ଖୁବ କମ ଉଚ୍ଚତାରେ ହେଲିକପଟର ଉଡିବା ପରେ ବିବାଦ ଦେଖାଦେଇଛି । ଏଭଳି କାର୍ଯ୍ୟକଳାପ ଲୋକଙ୍କ ଜୀବନ ଖାସକରି ପର୍ଯ୍ୟଟକ ଓ ଡଲଫିନଙ୍କ ପାଇଁ ବିପଦ ନେଇ ଆସିଥିଲା ବୋଲି ଏତଲାରେ କୁହାଯାଇଛି ।
ବେଆଇନ ଭାବେ ପାଇଲଟ ଜଣକ ହେଲିକପଟରକୁ ଚିଲିକାର ଇକୋ ସେନସିଟିଭ ଜୋନ ଉପରେ ଉଡାଇଥିଲେ, ତେଣୁ ଆଇନତଃ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଏତଲାରେ କୁହାଯାଇଛି । ତେବେ ପ୍ରଶ୍ନ ଉଠୁଛି, କିଏ ଏହି ହେଲିକପଟରକୁ ଉଡାଉଥିଲେ ଏବଂ ଅନୁମତି ମିଳିଥିବା ରୁଟ୍ ବାହାରକୁ ଯାଇ ବେଆଇନ ଭାବେ ଚିଲିକା ଉପରେ ହେଲିକପଟର ଉଡାଇବାକୁ କିଏ ଉଦ୍ୟମ କରିଥିଲେ, ତାକୁ ନେଇ ତନାଘନା ଆରମ୍ଭ କରାଯାଇଛି । ଡିଜିସିଏର ରିପୋର୍ଟ ପରେ ସ୍ପଷ୍ଟ ହୋଇପାରିବ, କିଏ ଏହି ଅଂଚଳରେ ହେଲିକପଟର ଉଡାଇବା ପାଇଁ ଅନୁମତି ପାଇଥିଲେ ଏବଂ କାହିଁକି ନିର୍ଦ୍ଧାରିତ ଉଚ୍ଚତା ଠାରୁ କମ ଉଚ୍ଚତାରେ ହେଲିକପଟର ଉଡାଇ ନିୟମକୁ ଉଲ୍ଲଂଘନ କରିଥିଲେ । ଏନେଇ ବିଶଦ ରିପୋର୍ଟକୁ ଅପେକ୍ଷା କରାଯାଇଛି ।