ଭୋଟ୍ ଦେଉଛି ବିଜେପୁର: ଭୋଟରଙ୍କ ଧାଡିରେ ନେତା…ଗଣତନ୍ତ୍ରର ମହାପର୍ବରେ ଭୋଟ୍ ଦେଇ ମତଦାନ ସାବ୍ୟସ୍ତ କରୁଛନ୍ତି ହେଭିୱେଟ୍
ଉପନିର୍ବାଚନ ପାଇଁ ୨୮୫ଟି ବୁଥରେ ମତଦାନ ଜାରି; ୧୧ଟା ସୁଦ୍ଧା ୨୫ ଦଶମିକ ୭ ପ୍ରତିଶତ ଭୋଟିଂ
କନକ ବ୍ୟୁରୋ: ବିଜେପୁରରେ ଉପନିର୍ବାଚନ ପାଇଁ ଜାରି ରହିଛି ଭୋଟିଂ । ସକାଳ ୧୧ ଟା ସୁଦ୍ଧା ୨୫ ଦଶମିକ ୭ ପ୍ରତିଶତ ଭୋଟିଂ ହୋଇଛି । ଭୋଟ ଦେବା ପାଇଁ ସକାଳୁ ସକାଳୁ ବୁଥମାନଙ୍କରେ ପ୍ରବଳ ଭିଡ ଜମିଛି ।ବିଶେଷ କରି ମହିଳା ଭୋଟରମାନେ ଲମ୍ବା ଲାଇନରେ ଘଂଟା ଘଂଟା ଧରି ଛିଡା ହୋଇ ଭୋଟ୍ ଦେଉଥିବା ଦେଖିବାକୁ ମିଳିଛି । ଅନ୍ୟପଟେ ସାଧାରଣ ଭୋଟରଙ୍କ ଭଳି ଲମ୍ବା ଲାଇନରେ ଛିଡା ହୋଇ ନିଜ ନିଜ ମତଦାନ ସାବ୍ୟସ୍ତ କରୁଛନ୍ତି ହେଭିୱେଟ୍ ନେତାମାନେ ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମେ ବିଜେପୁରର ବିଜେଡି ପ୍ରାର୍ଥୀ ରୀତା ସାହୁ ନିଜ ବୁଥରେ ମତଦାନ ସାବ୍ୟସ୍ତ କରିବା ସହ ଗଣତନ୍ତ୍ରର ଏହି ମହାପର୍ବରେ ସାମିଲ ହେବାକୁ ଭୋଟରଙ୍କୁ ଆହ୍ୱାନ ଦେଇଛନ୍ତି ରୀତା ସାହୁ । ଏହା ସହିତ ବିଜେପୁରବାସୀ ବିଜେପୁରର ବିକାଶ ପାଇଁ ଭଲ ଲୋକ ବାଛିବେ ବୋଲି କହିଛନ୍ତିି ବିଜେପୁର ବିଜେଡି ପ୍ରାର୍ଥୀ ରିତା ସାହୁ । ଏହା ସହିତ ବିଜୟୀ ହେବେ ବୋଲି ଆଶା ରଖିଛନ୍ତି । ସେହିଭଳି ବିଜେପି ପ୍ରାର୍ଥୀ ସନତ ଗଡତିଆ ୧୦୫ ନମ୍ବର ବୁଥରେ ମତଦାନ କରିଛନ୍ତି । କଂଗ୍ରେସ ପ୍ରାର୍ଥୀ ଦିଲ୍ଲୀପ ପଣ୍ଡା ନିଜ ବୁଥରେ ଭୋଟ ଦାନ କରିଛନ୍ତି ।
ବିଜେପୁର ଉପନିର୍ବାଚନରେ ମୋଟ ୨ ଲକ୍ଷ ୩୨ ହଜାର ୫୫ ଜଣ ଭୋଟର ସେମାନଙ୍କ ମତ ଅଧିକାର ସାବ୍ୟସ୍ତ କରୁଛନ୍ତି । ସେମାନଙ୍କ ମଧ୍ୟରେ ୧ଲକ୍ଷ ୧୯ ହଜାର ୯୩୯ ଜଣ ପୁରୁଷ ଓ ୧ ଲକ୍ଷ ୧୨ ହଜାର ୧୦୧ ମହିଳା ଏବଂ ୧୫ ଜଣ ତୃତୀୟ ଲିଙ୍ଗୀ ଭୋଟର ଅଛନ୍ତି । ତେବେ ଦିବ୍ୟାଙ୍ଗ ଭୋଟରମାନଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ଦିବ୍ୟଙ୍ଗମାନଙ୍କୁ ମତଦାନ କେନ୍ଦ୍ର ଯାଏଁ ଆଣିବା ପାଇଁ ମୋଟ ୨୩୨୧ଟି ଗାଡିର ବ୍ୟବସ୍ଥା କରାଯାଇଛି । ଭୋଟ କେନ୍ଦ୍ର ଗୁଡିକରେ କଡା ସୁରକ୍ଷା ବ୍ୟବସ୍ଥା କରାଯାଇଛି । ୨୮ଟି ବୁଥରେ ୱେବକାଷ୍ଟିଂ, ୧୪ଟି ବୁଥରେ ସିସିଟିଭି, ୧୬ଟି ବୁଥରେ ମତାଦାନର ଭିଡିଓଗ୍ରାଫି କରାଯାଉଛି । ବିଜେଡିର ରୀତା ସାହୁ, ବିଜେପିର ସନତ ଗଡ଼ତିଆ ନା’ କଂଗ୍ରେସର ଦିଲ୍ଲୀପ ପଣ୍ଡା କାହାକୁ ଭରସା କରିବେ ଲୋକେ । ଏହି ଆସନ ବିଜେଡି ପାଇଁ ସମ୍ମାନର ପ୍ରଶ୍ନ ହୋଇଥିବା ବେଳେ ଏହାକୁ କବଜା କରିବା ପାଇଁ ଲାଗିପଡିଛନ୍ତି ବିଜେପି ଓ କଂଗ୍ରେସ ।