ବର୍ଷାରେ ଭାସିଲା ଓଡିଶା: କେଉଁଠି ଘରେ ପସିଗଲା ପାଣି ତ କେଉଁଠି ଭାସୁଛି ପୋଲ, ପାଣିପାଗ ବିଭାଗର ପୂର୍ବାନୁମାନ ଆହୁରୀ ବର୍ଷିବ ୨ଦିନ
କନକ ବ୍ୟୁରୋ: ଗାଳୁଛି ବର୍ଷା । ଏପଟେ ଉବୁଟୁବୁ ରାଜଧାନୀ । ସେପଟେ ଭାସୁଛି କଟକ ସହର । ଉତର ପଶ୍ଚିମ ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ପ୍ରଭାବରେ ସାରା ରାଜ୍ୟରେ ପ୍ରବଳ ବର୍ଷା ଜାରି ରହିଛି । ଆଂଚଳିକ ପାଣିପାଗ ବିଜ୍ଞାନ କେନ୍ଦ୍ରର ପୂର୍ବାନୁମାନ ଅନୁଯାୟୀ ଆଜି ରାଜ୍ୟର ଅଧିକାଂଶ ଜିଲ୍ଲାରେ ଭୀଷଣ ବର୍ଷା ଜାରି ରହିଛି । କଟକ, ପୁରୀ, ଜଗତସିଂହପୁର, କେନ୍ଦ୍ରାପଡା, ଖୋର୍ଦ୍ଧା, ଗଜପତି, ଗଞ୍ଜାମ ସହ ଆହୁରି ଅନେକ ଜିଲ୍ଲାରେ ପ୍ରବଳ ବର୍ଷା ହେଉଛି । ବର୍ଷାରେ ରାଜଧାନୀ ଭୁବନେଶ୍ୱର ପୁଣି ଥରେ ଉବୁଟୁବୁ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ରସୁଲଗଡ, ବମିଖାଲ, ଲକ୍ଷ୍ମୀସାଗରରେ ଆଣ୍ଠୁଏ ଉଚ୍ଚର ପାଣି ଦେଖିବାକୁ ମିଳିଥିବା ବେଳେ ସକାଳେ ନୟାପଲ୍ଲୀ ଇସ୍କନ୍ ମନ୍ଦିର ସାମନାରେ ଛାତିଏ ଉଚ୍ଚର ପାଣି ଜମିଥିଲା ।
ସେହିପରି ଜୟଦେବ ବିହାର ଓ ଆଚାର୍ଯ୍ୟବିହାର ଅଂଚଳରେ ମଧ୍ୟ ଅବସ୍ଥା ସଙ୍ଗୀନ ହୋଇପଡିଛି । ତଳିଆ ଅଂଚଳରେ ଘର ଭିତରେ ପାଣି ପଶିଯାଇଛି । ବର୍ଷା ଯୋଗୁଁ କଟକ ଓ ଭୁବନେଶ୍ୱରରେ ଛୁଟି ଘୋଷଣା ହୋଇଛି । ସ୍କୁଲ ଓ କଲେଜ୍ ଛୁଟି ନେଇ ଏସଆରସି ବିଷ୍ଣୁପଦ ସେଠୀ ଘୋଷଣା କରିଛନ୍ତି । ଆଜି ଓ କାଲି ଅର୍ଥାତ୍ ୨୧ ଓ ୨୨ ତାରିଖରେ ୧୯ଟି ଜିଲ୍ଲାରେ ବର୍ଷା ହେବ ବୋଲି ପାଣିପାଗ ବିଭାଗ ଆଗୁଆ ସୂଚନା ଜାରି କରିଥିଲା । ପୁରୀ ଓ ଗଞ୍ଜାମ ଜିଲ୍ଲାର କେତେକ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହେବ ବୋଲି ଆକଳନ କରିଥିଲା ଆଂଚଳିକ ପାଣିପାଗ ବିଭାଗ ।
ସେପଟେ କଟକରେ ମଧ୍ୟ ବର୍ଷା ଯୋଗୁ ଅବସ୍ଥା ବେହାଲ ହୋଇପଡିଛି । ରାସ୍ତା ଉପରେ ପାଣିର ସୁଅ ଛୁଟୁଥିବା ବେଳେ ଅନେକ ଅଂଚଳରେ ଘର ଭିତରେ ନର୍ଦ୍ଦମା ପାଣିର ସୁଅ ଛୁଟୁଛି । ରୋଭର ଷ୍ଟ୍ରୀଟ୍, ସୂତାହାଟ, ପଟାପୋଲ, ରାଣୀହାଟ ଓ ଖଟବିନ୍ ସାହି ଇତ୍ୟାଦି ଅଂଚଳ ଜଳମଗ୍ନ ହୋଇପଡିଛି । ଫଳରେ ସାଧାରଣ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ତେବେ ସିଏମସି ପକ୍ଷରୁ ପାଣି ନିଷ୍କାସନ ପ୍ରକ୍ରିୟା ଆରମ୍ଭ ହୋଇଥିବା ସୂଚନା ମିଳିଛି । ଗତକାଲି ରାତିରୁ ଆରମ୍ଭ ହୋଇଥିବା ବର୍ଷା ଥମିବାର ନାଁ ନେଉନାହିଁ ।
ଲଘୁଚାପ ବର୍ଷାରେ ପୁରୀ ବଡଦାଣ୍ଡରେ ଆଣ୍ଠୁଏ ପାଣି ଜମିରହିଛି । ସେପଟେ ଶରଧାବାଲିରେ ମଧ୍ୟ ଚାଲିଛି ପାଣିର ସୁଅ ।
ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ହୀରାକୁଦ ଜଳଭଣ୍ଡାରରେ ଜଳସ୍ତର ବଢୁଛି । ସେପଟେ ପ୍ରଶାସନ ଆସନ୍ତା ୨୪ତାରିଖରେ ବନ୍ୟାଜଳ ଛାଡିବା ନେଇ ନିଷ୍ପତି ନେଇଛି ।
ସେହିପରି କନ୍ଧମାଳ ଜିଲ୍ଲା କୋଟଗଡ ବ୍ଲକରେ ବି ପ୍ରବଳ ବର୍ଷା ଜାରି ରହିଛି । ଫଳରେ କୋଟଗଡ ଠାରୁ ଶ୍ରୀରାମପୁର ଓ ସୁବର୍ଣ୍ଣଗିରିକୁ ସଂଯୋଗ କରୁଥିବା ମୁଖ୍ୟ ରାସ୍ତା ଧୋଇଯାଇଛି । ରାସ୍ତା ଭାସିଯିବା ଯୋଗୁଁ ଯାତାୟତ ବନ୍ଦ ରହିଛି । ଏପରିକି କିଛି ଗାଡି ମଧ୍ୟ ସେଠାରେ ପାଣିରେ ଭସିରହିଛି । ଜେସିବି ଦ୍ୱାରା ଗାଡି ଉଦ୍ଧାର କରାଯାଇଛି ।
ସେପଟେ ନିମ୍ନମାନର କାମ ଯୋଗୁୁଁ ପିଡବ୍ଲୁଡି ଓ ଆରକେଡି ଦ୍ୱାରା ନିର୍ମିତ ରାସ୍ତା ଭୁଶୁଡି ଯାଇଥିବା ଅଭିଯୋଗ ହୋଇଛି । ସେପଟେ ତୁମୁଡିବନ୍ଧ-ରାମପୁର ୫୯ନମ୍ବର ଜାତୀୟ ରାଜପଥରେ ପାଣି ଜମି ରହିଥିବା ଯୋଗୁଁ ଯାତାୟତ ବନ୍ଦ ରହିଛି ।
ରାୟଗଡାରେ ପ୍ରବଳ ବର୍ଷା ଯୋଗୁଁ ଟ୍ରେନ ଟ୍ରାକ ନଷ୍ଟ ହୋଇଛି । ଫଳରେ ହୀରାଖଣ୍ଡ ସମେତ ଅନେକ ଟ୍ରେନ ଅଟକି ରହିଛି । ସେହିପରି ରାୟଗଡା କଲ୍ୟାଣସିଂହପୁର ଅଂଚଳରେ ପ୍ରବଳ ବର୍ଷା ଯୋଗୁଁ କାନ୍ଥ ପଡି ୨ଜଣଙ୍କ ମୃତ୍ୟୁ ହୋଇଛି । ମୃତ ଦୁଇ ଜଣ ସ୍ୱାମୀ ସ୍ତ୍ରୀ ବୋଲି ଜଣାପଡିଛି ।
ସେପଟେ ମାଲକାନଗିରିରେ ବି ପ୍ରବଳ ବର୍ଷା ଲାଗିରହିଛି । ଜୟପୁର-ମାଲକାନଗିରି ମଧ୍ୟରେ ଯୋଗାଯୋଗ ବିଚ୍ଛିନ୍ନ ରହିଛି । ପ୍ରବଳ ବର୍ଷା ଯୋଗୁଁ ବିଭିନ୍ନ ସ୍ଥାନରେ ପାଣି ଜମିରହିଛି ।
କଳାହାଣ୍ଡିରେ ବି ଲାଗିରହିଛି ପ୍ରବଳ ବର୍ଷା । ଜୟପାଟଣା ଅଂଚଳରେ ହାତୀ ଓ ଇନ୍ଦ୍ରାବତି ନଦୀରେ ଜଳସ୍ତର ବଢିଛି । ବିଭିନ୍ନ ତଳି ଅଂଚଳ ଗାଁରେ ପଶିଲା ବନ୍ୟାଜଳ ।
ସେହିପରି ପ୍ରବଳ ବର୍ଷା ଯୋଗୁଁ ସମୁଦ୍ର ଉପକୂଳ ଅସ୍ତରଙ୍ଗ ଅଂଚଳ ଜଳମଗ୍ନ ହୋଇପଡିଛି । ସମୁଦ୍ରରେ ଅଶାନ୍ତ ଥିବା ବେଳେ ପ୍ରାୟ ୩ଫୁଟ ଉଚ୍ଚର ଜୁଆର ଉଠୁଛି ।