କନକ ବ୍ୟୁରୋ : ବର୍ଷା ଭୟରେ କ୍ଷେତରୁ ତରବରିଆ ଭାବେ ଧାନ କାଟିିଲେ ଚାଷୀ । ଲଘୁଚାପ ବର୍ଷା ଆସୁଥିବାରୁ ପାଚିଲା ଧାନ କାଟି ଆଣିବାକୁ ଓୟୁଏଟିର ପରାମର୍ଶ ପରେ, ରାଜ୍ୟର ବିଭିନ୍ନ ସ୍ଥାନରେ ଚାଷୀ ମାନେ ଧାନ କାଟିବାରେ ବ୍ୟସ୍ତ । ହାତରେ ଆଉ ସମୟ ନାହିଁ । ଧାନ ନ କାଟିଲେ ସବୁ ଚାଷ ଉଜୁଡି ଯିବ । ଏପଟେ ପାଣିପାଗ ବିଭାଗ କହିଛି ବଙ୍ଗୋପସାଗରରେ ସୃଷ୍ଟ ଲଘୁଚାପ ଶ୍ରୀଲଙ୍କା ମୁହାଁ ହେଉଛି । ତଥାପି ଆଗାମୀ ମଙ୍ଗଳବାରଠାରୁ ଏହାର ପ୍ରଭାବ ଓଡିଶାର ବିଭିନ୍ନ ଜିଲ୍ଲାରେ ରହିବ । ଦକ୍ଷିଣରୁ ଉପକୂଳ ଏବଂ ଆଭ୍ୟନ୍ତରୀଣ ଓଡିଶାରୁ ଉତର, ଲଘୁଚାପର ଗତି ଅନୁସାରେ ବଦଳିବ ବର୍ଷା ଅଂଚଳ । ଆଗାମୀ ୧୭ ତାରିଖ ଯାଏଁ ବର୍ଷା ନେଇ ପୂର୍ବାନୁମାନ କରିଛି ଆଂଚଳିକ ପାଣିପାଗ ବିଜ୍ଞାନ କେନ୍ଦ୍ର ।
Kanak News is now on WhatsApp
Join and get latest news updates delivered to you via WhatsApp
ବଙ୍ଗୋପ ସାଗରରେ ସୃଷ୍ଟି ହୋଇଥିବା ଲଘୁଚାପ ପ୍ରଭାବରେ ଆଗାମୀ ମଙ୍ଗଳବାରଠାରୁ ରାଜ୍ୟର ବିଭିନ୍ନ ଜିଲ୍ଲାରେ ବର୍ଷାର ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ନଭେମ୍ବର ୧୪ ତାରିଖ ବେଳକୁ ଦକ୍ଷିଣ ଓଡି଼ଶାର ଗଞ୍ଜାମ, ଗଜପତି, ମାଲକାନଗିରି, ରାୟଗଡ଼ା ଓ କୋରାପୁଟ ଆଦି ଜିଲ୍ଲାର କେତେକ ସ୍ଥାନରେ ବର୍ଷା ହେବାର ସମ୍ଭାବନା ରହିଛି । ତେବେ ଲଘୁଚାପର ଗତି ସହିତ ବଦଳିବ ବର୍ଷା ଅଂଚଳ । ୧୫ ତାରିଖ ବେଳକୁ ଉପକୂଳ ଓଡି଼ଶାରେ ଭଲ ବର୍ଷା ହେବ । କେନ୍ଦ୍ରାପଡ଼ା, ଜଗତସିଂହପୁର, ଯାଜପୁର, କଟକ, ଖୋର୍ଦ୍ଧା ଓ ପୁରୀ ଜିଲ୍ଲାରେ ବର୍ଷାର ପୂର୍ବାନୁମାନ କରିଛି ପାଣିପାଗ କେନ୍ଦ୍ର । ସମୟ ବିତିବା ସହ ନଭେମ୍ବର ୧୬ ତାରିଖରେ ଉପକୂଳ ସହ ଆଭ୍ୟନ୍ତରୀଣ ଓଡି଼ଶାରେ ବର୍ଷିବ । ପୁରୀ, କଟକ ସମେତ ଖୋର୍ଦ୍ଧାର ଗୋଟିଏ ଦୁିଇଟି ସ୍ଥାନରେ ପ୍ରବଳ ବର୍ଷା ହେବା ସମ୍ଭାବନା ରହିଛି । ଠିକ୍ ସେହିଭଳି ୧୭ ତାରିଖ ବେଳକୁ ଉତରକୁ ଓଦା କରିବ ଲଘୁଚାପ ବର୍ଷା । ଉତର ଓଡି଼ଶାର ବାଲେଶ୍ୱର, ଭଦ୍ରକ, ମୟୁରଭଞ୍ଜ ଓ କେନ୍ଦୁଝର ଜିଲ୍ଲାର ଗୋଟିଏ ଦୁଇଟି ସ୍ଥାନରେ ପ୍ରବଳ ବର୍ଷିପାରେ ।
ଯଦିଓ ବଙ୍ଗୋପସାଗରରେ ସୃଷ୍ଟ ଲଘୁଚାପ ଶ୍ରୀଲଙ୍କା ମୁହାଁ ହୋଇଛି ତଥାପି ଏହାର ପ୍ରଭାବରେ ଓଡିଶାର ଅନେକ ସ୍ଥାନରେ ବର୍ଷା ହେବ ବୋଲି ପୂର୍ବନୁମାନ କରିଛି ଭୁବନେଶ୍ୱର ସ୍ଥିତ ଆଞ୍ଚଳିକ ପାଣିପାଗ କେନ୍ଦ୍ର । ସ୍ଥଳଭାଗଠାରୁ ଲଘୁଚାପ ବହୁ ଦୂରରେ କେନ୍ଦ୍ରୀଭୂତ ହୋଥିବାରୁ ସୋମବାର ବେଳକୁ ଏହାର ଗତି ଓ ପ୍ରଭାବ ସଂପର୍କରେ ଅଧିକ ସ୍ପଷ୍ଟ ହୋଇପାରିବ ବୋଲି କୁହାଯାଇଛି ।
ଗୋଟିଏ ପଟେ ଶ୍ରୀଲଙ୍କା ମୁହାଁ ହେଉଛି ଲଘୁଚାପ । ସେପଟେ ବର୍ଷା ନେଇ ପାଣିପାଗ ବିଭାଗର ପୂର୍ବାନୁମାନ ପରେ ଚାଷୀଙ୍କ ଭିତରେ ଛନକା । ଅମଳ ହେବାକୁ ଥିବା ଧାନ ତୁରନ୍ତ କାଟିନେବାକୁ ସରକାରଙ୍କ ପରାମର୍ଶ ମଧ୍ୟ ଚିନ୍ତା ବଢାଇ ଦେଇଛି । ମରୁଡି ଓ ଚକଡା ପୋକ ଦାଉରେ ହାଇରାଣ ହେଉଥିବା ଚାଷୀ ପୁରା ଛାନିଆ ହୋଇପଡିଛି । ବିଭିନ୍ନ ସ୍ଥାନରେ ଚାଷୀମାନେ ବିଲରୁ ତରବରିଆ ଭାବେ ଧାନ କାଟିନେଇଛନ୍ତି ।
ଲଘୁଚାପ ବର୍ଷା ସମ୍ଭାବନାକୁ ଆଖିରେ ରଖି ପାଚିଲା ଧାନ କ୍ଷେତରୁ କାଟିଆଣିବାକୁ ପରାମର୍ଶ ଦେଇଥିଲା ଓଡିଶା କୃଷି ବୈଷୟିକ ବିଶ୍ୱବିଦ୍ୟାଳୟ । ଏହାପରେ ଚାଷୀ ତତ୍ପର ହୋଇପଡିଛନ୍ତି । କାରଣ ଅମଳ ନକରି ଧାନ ବିଲରରେ ଛାଡିଦେଲେ ବର୍ଷାପାଣିରେ ଗଜା ହୋଇଯିବାର ଆଶଙ୍କା ରହିଛି । ସେପଟେ ଅମଳକୁ ସୁରକ୍ଷିତ ରଖିବା ଲାଗି ସରକାରୀ ସ୍ତରରେ ପର୍ଯ୍ୟାପ୍ତ ଧାନ ଖଳା ମଧ୍ୟ ନିର୍ମାଣ କରାଯାଇ ନାହିଁ । ତେଣୁ ଅମଳ ଧାନକୁ ଘୋଡାଇ ରଖିବା ପାଇଁ ପାଲ ଓ ତାର୍ପୋଲିନ ଯୋଗାଇ ଦେବାକୁ ଚାଷୀମାନେ ଦାବି କରିଛନ୍ତି ।