କନକ ବ୍ୟୁରୋ : ସାରା ରାଜ୍ୟରେ ଲଘୁଚାପ ବର୍ଷା ଲାଗି ରହିଛି । ତେବେ କଳାହାଣ୍ଡିରେ ଲଗାଣ ବର୍ଷା ଯୋଗୁଁ ସୃଷ୍ଟି ହୋଇଛି ଅଭାବନୀୟ ପରିସ୍ଥିତି । ବିଭିନ୍ନ ନଦୀ ନାଳରେ ଜଳ ପତନ ବୃଦ୍ଧି ପାଇବା ସହ ଅନେକ ସ୍ଥାନରେ ରାସ୍ତା ଉପରେ ତିନି ଚାରି ଫୁଟର ପାଣି ପ୍ରବାହିତ ହେଉଥିବା ସୂଚନା ମିଳିଛି । ତେବେ ସବୁଠୁ ଅଧିକ କ୍ଷତିଗ୍ରସ୍ତ ହୋଇଛି ଜାତୀୟ ରାଜପଥ ୨୬ର କନ୍ତେଶୀର ଅଂଚଳ । ଏଠାରେ ବର୍ଷା ପାଣି ଆପ୍ରୋଚ ରୋଡକୁ ଧୋଇନେଇଥିବାରୁ ବଲାଙ୍ଗିର ଭବାନୀପାଟଣା ଯାତାୟତ ବାଧାପ୍ରାପ୍ତ ହୋଇଛି । ତେଣୁ ଉଭୟ ପଟ ରାସ୍ତାରେ ଅନେକ ଗାଡିମଟର ଅଟକି ରହିଛନ୍ତି । ବର୍ଷା ପାଣି ଏକ ବଡ ଟ୍ରକକୁ କିଛି ବାଟ ଭସାଇ ନେଇଥିବା ମଧ୍ୟ ଜଣାପଡିଛି । ପାଣି ସୁଅ ଭିତରେ ଟ୍ରକଟି ଫସି ରହିଥିବା ବେଳେ ଜେସିବି ସାହାଯ୍ୟରେ ଟ୍ରକକୁ ଉଦ୍ଧାର କରିବା ପାଇଁ ଉଦ୍ୟମ ଜାରି ରହିଛି ।
Kanak News is now on WhatsApp
Join and get latest news updates delivered to you via WhatsApp
ହେଲେ ଟ୍ରକର ଅଧିକାଂଶ ଭାଗ ପାଣି ଭିତରେ ଥିବାରୁ ଧସିଯାଇଥିବା ରାସ୍ତାର ଗୋଟିଏ ପଟକୁ ଉଠାଇବା ଭାରି କଷ୍ଟକର ବ୍ୟାପାର ହୋଇଛି । ଗତକାଲି ଟ୍ରକଟି ଆପ୍ରୋଚ ରୋଡ ଦେଇ ଅତିକ୍ରମ କଲାବେଳେ ବର୍ଷା ପାଣି ଆପ୍ରୋଚ ରୋଡକୁ ଭସାଇ ନେବାରୁ ଟ୍ରକଟି ଫସି ରହିଛି । ତେବେ ସାରା ରାଜ୍ୟରେ ଲଘୁଚାପ ବର୍ଷା ଲାଗିରହିଛି । ଗତକାଲିଠାରୁ ବିଭିନ୍ନ ସ୍ଥାନରେ ବର୍ଷା ଲାଗି ରହିଥିବା ବେଳେ ଆଜି ରାଜ୍ୟରେ ପ୍ରବଳ ବର୍ଷାର ଚେତାବନୀ ଦେଇଛି ପାଣିପାଗ ବିଭାଗ । ଏହାସହ ଭୁବନେଶ୍ୱରର ଆଞ୍ଚଳିକ ପାଣିପାଗ ବିଭାଗଙ୍କ ସୂଚନା ଅନୁସାରେ ୧୪ଟି ଜିଲ୍ଲାରେ ପ୍ରବଳ ବର୍ଷା ହୋଇପାରେ । କିଛି ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି । ଏହି ସମୟ ମଧ୍ୟରେ ସମୁଦ୍ର ଅଶାନ୍ତ ରହିବାରୁ ଆସନ୍ତା ୭୨ ଘଂଟା ଯାଏଁ ସମୁଦ୍ର ଭିତରକୁ ନଯିବା ପାଇଁ ମତ୍ସ୍ୟଜୀବୀଙ୍କୁ ପରାମର୍ଶ ଦିଆଯାଇଛି । ସେହିପରି ଲଗାଣ ବର୍ଷା ହେଲେ ସ୍ଥିତି ମୁକାବିଲା ପାଇଁ ଜିଲ୍ଲାପାଳ ମାନଙ୍କୁ ସତର୍କ ସୂଚନା ଦିଆଯାଇଛି ।