କନକ ବ୍ୟୁରୋ : ଥରୁଛି ଉତ୍ତର ଭାରତ । ୟୁପି, ଉତ୍ତରାଖଣ୍ଡ, ହରିଆଣା, ହିମାଚଳ ଓ କାଶ୍ମୀରରେ ଭୟଙ୍କର ଶୀତ ଦେଖିବାକୁ ମିଳିଛି । ଜାମ୍ମୁ କାଶ୍ମୀରର ଅନେକ ସ୍ଥାନରେ ବରଫପାତର ଖବର ରହିଛି । ଆଗକୁ ଆଉ କିଛି ଦିନ ଶୀତ ଲାଗିରହିବା ପୂର୍ବାନୁମାନ ପରେ ଲୋକେ ଏବେ ଆତଙ୍କିତ ଅବସ୍ଥାରେ ଦିନ କାଟୁଛନ୍ତି । ସେପଟେ କାଶ୍ମୀରର ଡାଲ୍ ହ୍ରଦରେ ପାଣି ବରଫ ପାଲଟିଥିବା ଦେଖିବାକୁ ମିଳିଛି । ଉତ୍ତର ଭାରତରେ ଖେଳିଯାଇଛି ଶୀତଲହରି ।
Kanak News is now on WhatsApp
Join and get latest news updates delivered to you via WhatsApp
ବରଫ ପାଲଟିଲା ଡାଲ୍ ହ୍ରଦର ପାଣି । ଜାମ୍ମୁ କାଶ୍ମୀରରେ ଭୟଙ୍କର ଶୀତ । ଆପଣ ଦେଖୁଛନ୍ତି ଜାମ୍ମୁ କାଶ୍ମୀରର ଡାଲ୍ ହ୍ରଦର ଦୃଶ୍ୟ । ଭୟଙ୍କର ଶୀତରେ ବରଫ ପାଲଟିଛି ହ୍ରଦର ପାଣି । ହ୍ରଦର ଉପରିଭାଗରେ ବରଫର ମୋଟା ଆସ୍ତରଣ ଜମିବା ଦେଖିବାକୁ ମିଳିଛି । ଭୟଙ୍କର ଶୀତ କାଶ୍ମୀର ଘାଟିକୁ ଘୋଡ଼େଇ ରଖିଥିବା ବେଳେ ବରଫ ପାଲଟିଛି ଡାଲ୍ ହ୍ରଦର ପାଣି । ପର୍ଯ୍ୟଟକଙ୍କ ପାଇଁ ଏହି ହ୍ରଦ ସବୁବେଳେ ଆକର୍ଷଣ ସୃଷ୍ଟି କରିଥାଏ ଆଉ ପ୍ରବଳଶୀତରେ ବି ଲାଗିରହିଛି ଗହଳିଚହଳି । ତେବେ ହାଉସ୍ ବୋଟ୍ ଗୁଡ଼ିକରେ ଶୀତରୁ ରକ୍ଷା ଦେବାକୁ ପର୍ଯ୍ୟଟକଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଉଛି ।
ଶୀତରେ ଥରୁଛି ରାଜଧାନୀ ଦିଲ୍ଲୀ । ୟୁପି, ହିମାଚଳରେ ବି ପ୍ରବଳ ସର୍ଦ୍ଦି । ରାଜଧାନୀ ଦିଲ୍ଲୀ ରାମଲୀଳା ମଇଦାନ ନିକଟରେ ଥିବା ରାତ୍ରିଆଶ୍ରୟ ସ୍ଥଳୀରେ କମ୍ବଳ ଘୋଡ଼େଇ ରେନ୍ ବସେରାରେ ଲୋକ ଶୀତଦାଉରୁ ରକ୍ଷା ପାଇବାକୁ ଉଦ୍ୟମ କରୁଛନ୍ତି । ୟୁପି କାନପୁର ରେଲୱେ ଷ୍ଟେସନର ଦୃଶ୍ୟ ମଧ୍ୟ କିଛି ଏହିଭଳି । ନିଆଁ ଜାଳି ଶୀତରୁ ନିସ୍ତାର ପାଇବା ପାଇଁ ଯାତ୍ରୀମାନେ ପ୍ରୟାସ କରୁଛନ୍ତି ।
ସେପଟେ ପ୍ରବଳ ଶୀତର ମୁକାବିଲା କରିବାକୁ ଚାହା ଦୋକାନରେ ଲାଗିଛି ଭିଡ଼ । ଚଳିତବର୍ଷ ଶୀତ ବିଗତ ଦିନରେ ଅଧିକାଂଶ ରେକର୍ଡ ଭାଂଗିଥିବା ବେଳେ ଆଗକୁ କଣ ହେବ ପରିସ୍ଥିତି ତାହା ଡରାଇଦେଇଛି । ପ୍ରବଳ ଶୀତରେ ଥରୁଛି ଉତ୍ତର ଭାରତ । ଏଭଳି ସ୍ଥିତିରେ ରାସ୍ତାକଡ଼ରେ ଜୀବନ ଅତିବାହିତ କରୁଥିବା ଗୃହହୀନଙ୍କ ଅବସ୍ଥା ଶୋଚନୀୟ ହେବାରେ ଲାଗିଛି । ଅନ୍ୟପଟେ ଆଗାମୀ କିଛି ଦିନ ପର୍ଯ୍ୟନ୍ତ ଏଭଳି ସ୍ଥିତି ଜାରି ରହିବ ବୋଲି ପାଣିପାଗ ବିଭାଗ ସୂଚନା ଦେବା ପରେ ଲୋକଙ୍କ ମଧ୍ୟରେ ଚିନ୍ତା ବଢ଼ିଯାଇଛି ।