ଓଡ଼ିଆ ଡାକ୍ତରଙ୍କ ସଫଳ ସମନ୍ଵିତ ଚିକିତ୍ସା ! ୬୦ କି.ମି ଦୂରରୁ ଆସିଲା ହୃତପିଣ୍ଡ, ଜୀବନ ପାଇଲେ ଆନ୍ଧ୍ରର ନାବାଳିକା
କନକ ବ୍ୟୁରୋ: ଆନ୍ଧ୍ରପ୍ରଦେଶର ଜଣେ ବାର ବର୍ଷର ଝିଅ ତ୍ରିଶା ପାଇଁ ହୋଇଥିବା ସମନ୍ଵିତ ଚିକିତ୍ସା ଯୋଜନା ଚିକିତ୍ସା ଇତିହାସରେ ନୂଆ ଅଧ୍ୟାୟ ଯୋଡ଼ିଦେଇଛି । ହାଇଦ୍ରାବାଦର କଣ୍ଟିନେଣ୍ଟାଲ ହସ୍ପିଟାଲରେ ଦୁଇ ଓଡ଼ିଆ ଡାକ୍ତର ସୁନୀଲ କୁମାର ସ୍ୱାଇଁ ଓ ଡା. ଭାରତ ବିଜୟ ପୁରୋହିତଙ୍କ ବିରଳ ହୃଦରୋପଣ ଅସ୍ତ୍ରୋପଚାରର ସଫଳତା ତ୍ରିଶାକୁ ନୂଆ ଜୀବନ ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନାନୁଯାୟୀ, ଗତ ଜୁଲାଇ ମାସରେ ଉକ୍ତ ହସ୍ପିଟାଲରେ ଭର୍ତ୍ତି ହୋଇଥିବା ତ୍ରିଶାର ସ୍ୱାସ୍ଥ୍ୟ ପରୀକ୍ଷା ପରେ ସେ ହୃଦଜନିତ ସମସ୍ୟା ଭୋଗୁଥିବା ଜଣାପଡ଼ିଥିଲା । ହୃଦରୋଗ ବିଶେଷଜ୍ଞ ଡା. ସୁନୀଲ ସ୍ୱାଇଁ ତ୍ରିଶାକୁ ଦେଖିବା ପରେ ହୃଦରୋପଣ ହିଁ ଏକମାତ୍ର ସମାଧାନର ବାଟ ବୋଲି କହିଥିଲେ । ଏଥିପାଇଁ ଅଙ୍ଗଦାନ ଜରୁରୀ ହୋଇଥିବାରୁ ତେଲେଙ୍ଗାନା ସରକାରଙ୍କ ‘ଜୀବନ ଦାନ’ ସଂସ୍ଥାରେ ତ୍ରିଶାଙ୍କ ନାମ ପଞ୍ଜୀକରଣ କରାଗଲା ।
ଖବର ମିଳିଲା, କଣ୍ଟିନେଣ୍ଟାଲ ହସ୍ପିଟାଲଠାରୁ ୬୦ କିମି ଦୂର ଗ୍ଲୋବାଲ ହସ୍ପିଟାଲରେ ମସ୍ତିସ୍କ ରୋଗରେ ଆକ୍ରାନ୍ତ ଜଣେ ୧୪ ବର୍ଷୀୟା ଝିଅର ଚିକିତ୍ସା ଚାଲିଥିଲା । ତା’ର ବଞ୍ଚିବା ଆଶା ନଥିବା ଡାକ୍ତରମାନେ କହିବା ପରେ ଝିଅର ବାପା-ମା’ ନିଜ ସନ୍ତାନର ବିଭିନ୍ନ ଅଙ୍ଗ ଦାନ କରିଦେବା ପାଇଁ ସହମତି ଦେଇଥିଲେ । ତ୍ରିଶା ପାଇଁ ସେହି ଝିଅର ହୃତପିଣ୍ଡ ଆଣିବା ସ୍ଥିର ହେଲା । ଗ୍ଲୋବାଲ ହସ୍ପିଟାଲରେ ଉକ୍ତ ଝିଅର ଅସ୍ତ୍ରୋପଚାର କରାଯାଇ ହୃତପିଣ୍ଡକୁ ଆମ୍ବୁଲାନ୍ସ ଯୋଗେ କଣ୍ଟିନେଣ୍ଟାଲ ହସ୍ପିଟାଲକୁ ଅଣାଯିବା ବ୍ୟବସ୍ଥା ହେଲା । ଏଥିପାଇଁ ପୁଲିସ, ପ୍ରଶାସନ ସହଯୋଗରେ ଏହି ବ୍ୟସ୍ତବହୁଳ ୬୦ କିମି. ରାସ୍ତାକୁ କେଇ ଘଣ୍ଟା ପାଇଁ ଜନଶୂନ୍ୟ ଓ ଗାଡ଼ିଶୂନ୍ୟ (ଗ୍ରୀନ୍ କରିଡର) କରାଗଲା ।
ରାସ୍ତାର ସମସ୍ତ ଟ୍ରାଫିକକୁ ସିଲ୍ କରାଗଲା । ମାତ୍ର ୫୦ ମିନିଟ୍ ମଧ୍ୟରେ ୬୦ କିମି ରାସ୍ତା ଅତିକ୍ରମ କରି ଆମ୍ବୁଲାନ୍ସ ସୁରକ୍ଷିତ ଭାବେ କଣ୍ଟିନେଣ୍ଟାଲ ହସ୍ପିଟାଲରେ ପହଞ୍ଚିଥିଲା । ତା’ପରେ ଡା. ସ୍ୱାଇଁ ଆରମ୍ଭ କରିଥିଲେ ତ୍ରିଶାଙ୍କ ଅସ୍ତ୍ରୋପଚାର। ପୁରୁଣା ହୃତପିଣ୍ଡ କାଢ଼ି ନୂଆଟିକୁ ଖଞ୍ଜିଥିଲେ । ଏବେ ନୂଆ ଜୀବନ ଫେରିପାଇଥିବା ତ୍ରିଶା ଗତ ୧୮ ତାରିଖରେ ହସହସ ମୁହଁରେ ଘରକୁ ଫେରିଛି । ଗୋଟିଏ ଜୀବନ ରକ୍ଷା ପାଇଁ ପ୍ରଶାସନର ଦାୟିତ୍ୱବୋଧ ଓ ଲୋକଙ୍କ ସହଯୋଗର ଏଭଳି ବିରଳ ଦୃଷ୍ଟାନ୍ତକୁ ସବୁ ମହଲରେ ଉଚ୍ଚ ପ୍ରଶଂସା କରାଯାଇଛି ।