ବିଜେପି ବିରୋଧରେ ହାର୍ଦ୍ଦିକଙ୍କ ଅଭିଯୋଗ ! ୫୦୦୦ ଇଭିଏମ ହ୍ୟାକ କରିବାକୁ ୧୪୦ ସଫ୍ଟୱୟାର ଇଞ୍ଜିନିୟର ପ୍ରସ୍ତୁତ
ଗୁଜରାଟ ବିଧାନସଭା ପାଇଁ ମତଦାନ ସରିଛି । ସୋମବାର ପ୍ରକାଶ ପାଇବ ଫଳାଫଳ । ଚଳିତ ନିର୍ବାଚନ ଉଭୟ କଂଗ୍ରେସ ଓ ବିଜେପି ପାଇଁ ସମ୍ମାନର ପ୍ରଶ୍ନ ପାଲଟିଛି । କିନ୍ତୁ ବିଜେପି ଆଶ୍ୱସ୍ତି ଆଣିଛି ବିଭିନ୍ନ ନ୍ୟୁଜ ଚ୍ୟାନେଲ ପକ୍ଷରୁ ହୋଇଥିବା ଏକଜିଟ ପୋଲ । ଫଳାଫଳ ଆସିବା ପୂର୍ବରୁ ଆସିଥିବା ଏକଜିଟ ପୋଲରେ ହିମାଚଳ ପ୍ରଦେଶ ଓ ଗୁଜରାଟରେ ଗେରୁଆ ବାନା ଉଡିବ ବୋଲି ସ୍ୱଷ୍ଟ ଦର୍ଶାଯାଇଛି । ଏପରିକି ଗୁଜରାଟରେ ବିଜେପି ପୁଣିଥରେ ଏକାକୀ ସରକାର ଗଢିବ ବୋଲି ଏକଜିଟ ପୋଲରେ ପ୍ରକାଶ ପାଇଛି । କିନ୍ତୁ ଏହି ଫଳାଫଳ ଉପରେ ପ୍ରଶ୍ନ ଉଠାଇଛନ୍ତି ଯୁବ ପଟିଦାର ନେତା ହାର୍ଦ୍ଦିକ ପଟେଲ । ବିଜେପି ଉପରେ ଆରୋପ ଲଗାଇ ହାର୍ଦ୍ଦିକ କହିଛନ୍ତି, ଇଭିଏମରେ ଯଦି ଗଡବଡ ନ ହୁଏ ତେବେ ବିଜେପିର ହାରିବା ସୁନିଶ୍ଚିତ ।
Kanak News is now on WhatsApp
Join and get latest news updates delivered to you via WhatsApp
ଶନିବାର ରାତିରେ ହାର୍ଦ୍ଦିକ ଟ୍ୱିଟ୍ କରି କହିଛନ୍ତି, ଅହମ୍ମଦାବାଦର ଏକ କମ୍ପାନିର ୧୪୦ ଜଣ ସଫ୍ଟୱେୟାର ଇଞ୍ଜିନିୟର ପ୍ରାୟ ୫୦୦୦ ଇଭିଏମର ସୋର୍ସ କୋର୍ଡକୁ ହ୍ୟାକିଂ କରିବାକୁ ପ୍ରସ୍ତୁତି ଚଳାଇଛନ୍ତି । ଆଉ ଏହା ପଛରେ ବିଜେପି କାମ କରୁଛି । ଏହାପୂର୍ବରୁ ମଧ୍ୟ ଇଭିଏମକୁ ନେଇ ବିଜେପିକୁ ଟାର୍ଗେଟ କରିଥିଲେ ହାର୍ଦ୍ଦିକ । ଟ୍ୱିଟ୍ କରି ହାର୍ଦ୍ଦିକ କହିଛନ୍ତି, ଶନିବାର ଓ ରବିବାର ରାତିରେ ବିଜେପି ଇଭିଏମ ହ୍ୟାକିଂ କରିବାକୁ ଯାଉଛି । ଯଦି ଇଭିଏମରେ ଗଡବଡ ନ ହୁଏ ତେବେ ବିଜେପିକୁ ଗୁଜରାଟରେ ୮୨ଟି ସିଟ ମିଳିବ ବୋଲି ଦୃଢୋକ୍ତି ପ୍ରକାଶ କରିଛନ୍ତି ହାର୍ଦ୍ଦିକ ।
ଅନ୍ୟ ଏକ ଟ୍ୱିଟରେ ହାର୍ଦ୍ଦିକ କହିଛନ୍ତି, ଗୁଜରାଟରେ ବିଜେପିର ପରାଜୟ ଦଳକୁ ପତନ ଆଡକୁ ଟାଣି ଆଣିବ । ଇଭିଏମ ହ୍ୟାକ କରି ବିଜେପି ଗୁଜରାଟ ନିର୍ବାଚନ ଜିତିବ ଓ ଜାଣିଶୁଣି ହିମାଚଳ ପ୍ରଦେଶ ନିର୍ବାଚନ ହାରିବ । ଯାହାଫଳରେ ବିଜେପି ଉପରେ କେହି ପ୍ରଶ୍ନ ଉଠାଇପାରିବେ ନାହିଁ । ତେବେ ଏସବୁ ଭିତରେ ଗୁଜରାଟ ବିଧାନସଭା ଫଳାଫଳ ପାଇଁ କାଉଣ୍ଟଡାଉନ ଆରମ୍ଭ ହୋଇଛି । କିଏ କେତେ ସିଟ୍ ହାତେଇବ ? ମୋଦିଙ୍କ ମ୍ୟାଜିକ କାମ କରିବ ନା ରାହୁଲଙ୍କୁ ଆପଣାଇନେବେ ଗୁଜରାଟବାସୀ ତାହା ଫଳାଫଳ ଆସିବା ପରେ ଜଣାପଡିବ ।