ଅର୍ଦ୍ଧ ଶତାବ୍ଦୀର ଅନ୍ଧାରୀ ଜୀବନର ଅନ୍ତ ଘଟିଲା । ଲାଲଗଡକୁ ସଂଯୋଗ କରୁଥିବା ଗୁରୁପ୍ରିୟା ସେତୁକୁ ଉଦଘାଟନ କଲେ ମୁଖ୍ୟମନ୍ତ୍ରୀ, ବିଚ୍ଛିନ୍ନାଚଂଳ ପାଇଁ ଘୋଷଣା କଲେ ୧୦୦ କୋଟିର ପ୍ୟାକେଜ
କନକ ବ୍ୟୁରୋ : ଶେଷରେ ବର୍ଷ ବର୍ଷ ଧରି ପ୍ରତୀକ୍ଷାର ଅନ୍ତ ଘଟିଲା । ସମ୍ପର୍କର ସେତୁ ଗୁରୁପ୍ରିୟାକୁ ଉଦଘାଟନ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଉ ୧୫୧ ଗାଁ ଲୋକଙ୍କୁ ବିଚ୍ଛିନ୍ନ ରହି ବନ୍ଦୀ ଜୀବନ ବିତାଇବାକୁ ପଡିବନି । ଏହି ଅବସରରେ ମୁଖ୍ୟମନ୍ତ୍ରୀ ବିଚ୍ଛିନ୍ନାଚଂଳ ପାଇଁ ୧୦୦ କୋଟିର ପ୍ୟାକେଜ ଘୋଷଣା କରିଛନ୍ତି । ବିଦ୍ୟୁତିକରଣ, ପାନୀୟ ଜଳ ଯୋଗାଣ, ସ୍ୱାସ୍ଥ୍ୟ ସେବା ପାଇଁ ନୂଆ ପ୍ରକଳ୍ପ ତିଆରି ହେବ ବୋଲି କହିଛନ୍ତି ମୁଖ୍ୟମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ଗୁରୁପ୍ରିୟା ସେତୁକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦଘାଟନ କରିବା ସହ ଅନ୍ତ ଘଟିଛି ହଜାର ହଜାର ଲୋକଙ୍କ ବର୍ଷ ବର୍ଷର ପ୍ରତୀକ୍ଷା । ଅନ୍ତ ଘଟିଛି ୧୫୧ ଗାଁ ଲୋକଙ୍କ ଅର୍ଦ୍ଧ ଶତାବ୍ଦୀର ବନ୍ଦୀ ଜୀବନ । ଗୋଟିଏ ପଟେ ମୁଖ୍ୟମନ୍ତ୍ରୀ ଉଦଘାଟନ କରୁଥିଲେ, ଅନ୍ୟପଟେ ଏହି ଐତିହାସିକ ମୁହୂର୍ତର ସାକ୍ଷୀ ବନିବାକୁ ଆସିଥିବା ଲୋକଙ୍କ ମୁହଁରେ ବାରି ହୋଇ ପଡୁଥିଲା ଖୁସି । ସେପଟେ ହିଂସା ଛାଡ଼ି ସମାଜର ମୁଖ୍ୟ ସ୍ରୋତରେ ସାମିଲ ହେବାକୁ ମାଓବାଦୀଙ୍କୁ ଆହ୍ୱାନ ଦେଇଥିଲେ ନବୀନ ।
ଗୁରୁପ୍ରିୟା ସେତୁ ଉଦଘାଟନ ପରେ ମୁଖ୍ୟମନ୍ତ୍ରୀ କିଛି ସମୟ ବ୍ରିଜରେ ଚାଲି ଚାଲି ବୁଲିଥିଲେ । ବ୍ରିଜ ଆରପଟେ ଥିବା ଜାନବାଇ ଗାଁକୁ ଯାଇଥିଲେ ନବୀନ । ସେଠାରେ ବିଚ୍ଚିନ୍ନାଚଂଳବାସୀଙ୍କ ସହ ଆଲୋଚନା କରିଥିଲେ ମୁଖ୍ୟମନ୍ତ୍ରୀ । ଯେଉଁ ଅଂଚଳରେ ସରକାରୀ କର୍ମଚାରୀଙ୍କ ପାଦ ପଡିବା ସହଜ ନଥିଲା, ସେଠାରେ ପହିଁଚିଥିଲେ ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀଙ୍କୁ ପାଖରେ ପାଇଁ ବେଶ ଉତ୍ସାହିତ ହୋଇଥିଲେ ଗ୍ରାମବାସୀ । ଏହାସହ ବିଚ୍ଛିନ୍ନାଂଚଳ ପାଇଁ ଶହେ କୋଟିର ସ୍ୱତନ୍ତ୍ର ପ୍ୟାକେଜ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ । ଏହା ମଧ୍ୟରେ ରହିଛି ୨ ହଜାର ମତ୍ସ୍ୟଜୀବୀ ପରିବାର ପାଇଁ ସ୍ୱତନ୍ତ୍ର ବ୍ୟବସ୍ଥା । ବିଚ୍ଛିନ୍ନାଂଚଳ ମଧ୍ୟରେ ୨ ଟି ସଡ଼କ ପ୍ରକଳ୍ପ ହାତକୁ ନିଆଯିବ । ସେହିପରି ବିଦ୍ୟୁତିକରଣ, ପାନୀୟ ଜଳ ଯୋଗାଣ, ସ୍ୱାସ୍ଥ୍ୟ ସେବା ପାଇଁ ନୂଆ ପ୍ରକଳ୍ପ ତିଆରି ହେବ ।
ଗୁରୁପ୍ରିୟା ସେତୁ । ଲମ୍ବ ୯୧୦ ମିଟର । ହେଲେ ଏହି ଦୂରତା ଏପରି ବାଡ଼ ପକାଇଥିଲା ଯେ ଏହା ୧୫୧ଟି ଗାଁର ଲୋକଙ୍କୁ ମୂଳ ଭୂଖଣ୍ଡ ଠାରୁ ଅଲଗା କରି ଦେଇଥିଲା । ବର୍ଷେ କି ଦିବର୍ଷ ନୁହେଁ ଅର୍ଦ୍ଧ ଶତାବ୍ଦୀ ଧରି ପ୍ରାୟ ୩୦ ହଜାର ଲୋକଙ୍କର ହଜି ଯାଇଥିଲା ପରିଚୟ । ୧୯୭୨ରେ ଚିତ୍ରକୋଣ୍ଡା ଜଳ ଭଣ୍ଡାର ଉପରେ ବାଲିମେଳା ଜଳ ବିଦ୍ୟୁତ କେନ୍ଦ୍ର ନିର୍ମାଣ ହେବା ପରେ ଏଭଳି ବିଚିତ୍ର ଅବସ୍ଥା ସୃଷ୍ଟି ହୋଇଥିଲା । ୧୯୮୨ ମସିହାରୁ ବ୍ରିଜ୍ ନିର୍ମାଣ ପାଇଁ ଯୋଜନା ହୋଇଥିଲା ସତ ମାତ୍ର ପୂରଣ ହେବାକୁ ଲାଗି ଯାଇଥିଲା ୩୬ ବର୍ଷ । ଶେଷରେ ୨୦୧୪ରେ କୋଲକାତାର ରୟାଲ ଇନଫ୍ରା କନଷ୍ଟ୍ରକସନ୍ ଲିମିଟେଡ୍କୁ କାମ ଦିଆ ଯାଇଥିଲା । ବିଏସଏଫର ସହାୟତାରେ ଆରମ୍ଭ ହୋଇଥିଲା ପ୍ରକଳ୍ପ ନିର୍ମାଣ । ବ୍ୟୟ ଅଟକଳ ୧୭୨ କୋଟି ୫୮ ଲକ୍ଷ ଟଙ୍କାକୁ ବୃଦ୍ଧି କରା ଯାଇଥିଲା । ବହୁ ଘାତ ପ୍ରତିଘାତ ପରେ ସତରେ ପରିଣତ ହୋଇଥିଲା ଗୁରୁପ୍ରିୟା ସେତୁ ।
ଗୁରୁପ୍ରିୟା ସେତୁ ପରେ ଏବେ ଅପହଁଚ ଇଲାକାରେ ପହଁଚି ପାରିବ ପ୍ରଶାସନ । ଲାଲବାହିନୀ ବନ୍ଧୁକ ମୁନରେ ଚଳାଇଥିବା ଅନ୍ଧାରୀ ଶାସନର ଅନ୍ତ ଘଟିବ । ବିକାଶର ମୁଖ୍ୟ ସ୍ରୋତରେ ସାମିଲ ହୋଇପାରିବେ ଅଂଚଳବାସୀ । ସେପଟେ ଗୁରୁପ୍ରିୟା ସେତୁ ଉଦଘାଟନ ନେଇ ନବୀନ ଟୁଇଟ କରିବା ପରେ ଗୁରୁପ୍ରିୟା ସଂକ୍ରାନ୍ତରେ ପ୍ରାୟ ୧୩ ହଜାର ଟୁଇଟ୍ ହୋଇଥିଲା । ସେହିପରି ଆଜି ମାଲକାନଗିରିରେ ୩୦୦ ଶଯ୍ୟାବିଶିଷ୍ଟ ସୁପରସ୍ପେଶାଲିଟି ହସପିଟାଲ ସହ ୪୧ଟି ପ୍ରକଳ୍ପରୁ ଶୁଭାରମ୍ଭ କରିଛନ୍ତି ନବୀନ ।