ଆଜି ଗୋଟିଏ ପଟେ ଗୁଜରାଟରେ ଚାଲିଥିଲା ଶେଷ ପର୍ଯ୍ୟାୟ ନିର୍ବାଚନ : ଅନ୍ୟପଟେ ଆରମ୍ଭ ହୋଇଯାଇଥିଲା ବିବାଦ
କନକ ବ୍ୟୁରୋ : ସାବରମତୀର ରାଣିପ ମତଦାନ କେନ୍ଦ୍ରରେ ଭୋଟ ଦେବା ପରେ ବୁଥରୁ ବାହାରିଥିଲେ ପ୍ରଧାନମନ୍ତ୍ରୀ । ତାଙ୍କ ଆଙ୍ଗୁଳିରେ ଲାଗିଥିବା କାଳି ଚିହ୍ନକୁ ଦେଖାଇ କିଛି ବାଟ ଚାଲିବା ପରେ ଗାଡ଼ିର ବିଶାଳ ପଟୁଆରରେ ସେ ଫେରିଥିଲେ । ଖୋଲା ଗାଡ଼ିରେ ହାତ ହଲାଇ ଯାଉଥାନ୍ତି ମୋଦି । ପଛରେ ଚାଲିଥାନ୍ତି ତାଙ୍କର ହଜାର ହଜାର ସମର୍ଥକ । ରାସ୍ତାର ଦୁଇ ପାଶ୍ୱର୍ରେ ଲାଗିଥାଏ ଲୋକଙ୍କ ଗହଳି । ମୋଦି ମୋଦି ନାରାରେ କମ୍ପୁଥାଏ ପରିବେଶ । ହେଲେ ଏହାକୁ ହଜମ କରିପାରିନାହିଁ କଂଗ୍ରେସ । ନିର୍ବାଚନ ଦିନ ମୋଦି ରୋଡ୍ ସୋ’ କରିଥିବା ଅଭିଯୋଗ ଉଠାଇଛି କଂଗ୍ରେସ । କଂଗ୍ରେସ ଅଭିଯୋଗ କରିଛି, ଭୋଟ ଦାନର ୪୮ ଘଂଟା ପୂର୍ବରୁ ପ୍ରଚାର ଉପରେ ନିଷେଧାଦେଶ ଥିବା ବେଳେ ଆଚରଣ ବିଧିର ଖୋଲା ଉଲଂଘନ କରିଛନ୍ତି ପ୍ରଧାନମନ୍ତ୍ରୀ । ନିର୍ବାଚନ କମିସନଙ୍କ ଆଭିମୁଖ୍ୟ ଉପରେ ମଧ୍ୟ ପ୍ରଶ୍ନ ଉଠାଇଛି କଂଗ୍ରେସ ।
Kanak News is now on WhatsApp
Join and get latest news updates delivered to you via WhatsApp
ଭୋଟ ଦେବା ପରେ ମୋଦି ରୋଡ ସୋ’ କରିଥିବା ଅଭିଯୋଗରେ ବିବାଦ ହୋଇଥିବା ବେଳେ ବୁଧବାର ଦିନ ଏକ ଘରୋଇ ଟେଲିଭିଜନ ଚ୍ୟାନେଲରେ ପ୍ରସାରଣ ହୋଇଥିବା ରାହୁଲ ଗାନ୍ଧିଙ୍କ ଇଂଟରଭ୍ୟୁକୁ ନେଇ ଚର୍ଚ୍ଚା ଜୋରଦାର ହୋଇଥିଲା । ଏହାକୁ ନେଇ କଂଗ୍ରେସର ନିର୍ବାଚିତ ଅଧ୍ୟକ୍ଷ ରାହୁଲ ଗାନ୍ଧିଙ୍କୁ ନୋଟିସ୍ ଜାରି କରିଥିଲେ ନିର୍ବାଚନ କମିସନ୍ । ସଂପୃକ୍ତ ଚ୍ୟାନେଲ୍ ବିରୋଧରେ ଏଫଆଇଆର ଦାୟର କରିବାକୁ ମଧ୍ୟ ରାଜ୍ୟ ନିର୍ବାଚନ ଅଧିକାରୀଙ୍କୁ ଇସି ଦେଇଛନ୍ତି ନିର୍ଦ୍ଦେଶ ।
ଗୁଜରାଟର ହାଇଭୋଲଟେଜ୍ ନିର୍ବାଚନ ଶେଷ ହୋଇଛି । ହେଲେ ଶେଷ ହୋଇନାହିଁ କଂଗ୍ରେସ ଓ ବିଜେପି ମଧ୍ୟରେ ଆରୋପ-ପ୍ରତ୍ୟାରୋପର ରାଜନୀତି ।