କନକ ବ୍ୟୁରୋ : ୨୦୧୭ର ସବୁଠାରୁ ବଡ ରାଜନୈତିକ ଲଢେଇର ଫଳାଫଳ ଆଜି ପ୍ରକାଶ ପାଇବ । ଜଣାପଡିଯିବ ଗୁଜରାଟ ବିଧାନସଭା ନିର୍ବାଚନରେ କାହା ସପକ୍ଷରେ ଯାଇଛି ଜନାଦେଶ । ନିଜ ମାଟିରେ ମହାପରୀକ୍ଷାର ସାମ୍ନା କରିବାକୁ ଯାଉଛନ୍ତି ପ୍ରଧାନମନ୍ତ୍ରୀ ମୋଦି । ଆଉ ନୂଆକରି କଂଗ୍ରେସ କମାଣ ଧରିଥିବା ରାହୁଲ ଗାନ୍ଧୀଙ୍କ ପାଇଁ ବି ହେବ ଏସିଡ ଟେଷ୍ଟ । ଯଦି ଏଗଜିଟ ପୋଲ ସର୍ଭେ ପୂର୍ବାନୁମାନ ସତ ହୁଏ ଓ ମୋଦି ହାୱା ସପକ୍ଷରେ ଜନାଦେଶ ଯାଏ ତାହାହେଲେ ଷଷ୍ଠଥର ପାଇଁ ଗୁଜରାଟରେ କ୍ଷମତା ବଜାୟ ରଖିବ ବିଜେପି । କୁହାଯାଉଛି ଏହି ଗୋଟିଏ ରାଜ୍ୟର ନିର୍ବାଚନ ଫଳାଫଳ ଆଗାମୀ ଦିନରେ ସାରାଦେଶର ରାଜନୀତିକୁ ବିଶେଷ ଭାବେ ପ୍ରଭାବିତ କରିବ ।
Kanak News is now on WhatsApp
Join and get latest news updates delivered to you via WhatsApp
କାରଣ ଗୁଜରାଟ ବିକାଶ ମଡେଲକୁ ଆଧାର କରି ୨୦୧୪ରେ ଜାତୀୟ ରାଜନୀତିକୁ ପ୍ରବେଶ କରିଥିବା ପ୍ରଧାନମନ୍ତ୍ରୀ ମୋଦିଙ୍କ ପାଇଁ ୨୦୧୯ ସଂସଦୀୟ ନିର୍ବାଚନରେ ଏହା ନିର୍ଣ୍ଣାୟକ ହେବ । ସେହିପରି ସାରା ଦେଶରେ ସତା ହରାଉଥିବା କଂଗ୍ରେସ ଓ ନୂଆକରି ନେତୃତ୍ୱ ନେଇଥିବା ରାହୁଲଙ୍କ ରାଜନୈତିକ ଭବିଷ୍ୟତ ସ୍ଥିର କରିବ ଗୁଜରାଟ ଫଳାଫଳ । ଗୁଜରାଟର ୩୩ ଜିଲ୍ଲାର ୩୭ଟି କେନ୍ଦ୍ରରେ ସକାଳ ୮ଟାରୁ ଆରମ୍ଭ ହେବ ମତଗଣନା । ଏକଜିଟ୍ ପୋଲ୍ ବା ବୁଥ୍ ବାହୁଡା ମତ, ସ୍ପଷ୍ଟ ଭାବରେ ବିଜେପି ସପକ୍ଷରେ ଜନମତ ଯାଉଛି ବୋଲି ସୂଚନା ଦେଉଥିଲେ ମଧ୍ୟ, ସମସ୍ତଙ୍କ ନଜର ରହିଛି ପ୍ରକୃତ ଫଳାଫଳ ଉପରେ ।
ଅପରପକ୍ଷେ, ସାରା ଦେଶବାସୀଙ୍କ ନଜର ଗୁଜରାଟ ଉପରେ ରହିଛି । ଗତ ୯ ଏବଂ ୧୪ ତାରିଖ ଦୁଇଟି ପର୍ୟ୍ୟାୟରେ ମୋଟ ୧୮୨ଟି ଅସନ ପାଇଁ ୫୦,୧୨୮ଟି ମତଦାନ କେନ୍ଦ୍ରରେ ଭୋଟରମାନେ ୧,୮୨୮ଜଣ ଆଶାୟୀଙ୍କୁ ସେମାନଙ୍କ ମତ ସାବ୍ୟସ୍ତ କରି ସାରିଛନ୍ତି । ଇଭିଏମ୍ ମେସିନରେ ସିଲ ହୋଇ ରହିଥିବା ପ୍ରାର୍ଥୀଙ୍କ ଭାଗ୍ୟ ୩୭ଟି ଭୋଟଗଣନା କେନ୍ଦ୍ରରେ ନିର୍ଦ୍ଧାରିତ ହେବ । ଲଗାତର ଷଷ୍ଠ ଥର ପାଇଁ ବିଜେପି ସେଠାରେ ଶାସନ କଳ ସମ୍ଭାଳିବ ବୋଲି ଦୃଢ଼ ନିଶ୍ଚିତ ହୋଇଥିବା ବେଳେ ଦୀର୍ଘ ଦୁଇ ଦଶନ୍ଧି ଧରି କ୍ଷମତାରୁ ଦୂରେଇ ରହିଥିବା କଂଗ୍ରେସ ଦଳ ଏଥର ଶାସନକୁ ଫେରିବ ବୋଲି ଆଶା ବାନ୍ଧି ବସିଛି ।
ତେବେ ରାଜନୀତି ବିଶାରଦମାନେ ଗୁଜରାଟ ଲଢ଼େଇକୁ ବିଜେପି କି କଂଗ୍ରେସ ମଧ୍ୟରେ ହେଉଥିବା ବିବେଚନା ନକରି ତାହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ପାଇଁ ସମ୍ମାନର ପ୍ରଶ୍ନ ବୋଲି ରଙ୍ଗ ଦେଇ ଚାଲିଛନ୍ତି । ଉଭୟ ହିଁ ନିଜ ନିଜ ଦଳର ନିର୍ବାଚନ ପ୍ରଚାର ମଙ୍ଗ ସମ୍ଭାଳିଥିଲେ । ସେହିପରି ‘ଗୁଜରାଟ ବିକାଶ’ ମଡେଲ ଆଧାରରେ ୨୦୧୪ ସାଧାରଣ ନିର୍ବାଚନ ଜିତିଥିବା ପ୍ରଧାନମନ୍ତ୍ରୀ ମୋଦି ତାଙ୍କ ନିଜ ରାଜ୍ୟରେ ହିଁ ଶାସନ କ୍ଷମତା ବଜାୟ ରଖିବେ ବୋଲି ସମସ୍ତେ ଆଶା କରିବା ସ୍ୱାଭାବିକ । ଅପରପକ୍ଷେ, ଆଗାମୀ ଲୋକସଭା ନିର୍ବାଚନ ପାଇଁ ଭିତ୍ତିଭୂମି ପ୍ରସ୍ତୁତି ପୂର୍ବକ ଗୁଜରାଟକୁ ହାତେଇବା ଉଦ୍ଦେଶ୍ୟରେ ରାହୁଲ୍ ଏହି ନିର୍ବାଚନରେ ଅକ୍ଳାନ୍ତ ପରିଶ୍ରମ କରିବା ସହ ଯାବତୀୟ କୌଶଳ ଆପଣେଇଛନ୍ତି ।