ଆଜି ଜିଏସଟିକୁ ପୂରିବ ମାସେ !
ଚଳିତ ମାସ ପହିଲାରୁ ଦେଶରେ ନୂଆ ପରୋକ୍ଷ ଟିକସ ବ୍ୟବସ୍ଥା ଜିଏସଟି କାର୍ଯ୍ୟକାରୀ ହୋଇଥିଲା । ଆଜି ଜିଏସଟିକୁ ପୂରିବ ମାସେ । ଜିଏସଟିକୁ ସମ୍ପୂର୍ଣ୍ଣ ଭାବେ ବୁଝିବା ଲାଗି ଏବେ ବି ସବୁ ବ୍ୟବସାୟୀ ସମର୍ଥ ହୋଇନାହାନ୍ତି । ସାଧାରଣ ଜନତାଙ୍କ ପାଖରେ ମଧ୍ୟ ଜିଏସଟିର ଲାଗି ଠିକ୍ ଭାବେ ପହଞ୍ଚି ପାରିନାହିଁ।
Kanak News is now on WhatsApp
Join and get latest news updates delivered to you via WhatsApp
୧୦ ଲକ୍ଷ ନୂଆ ଟିକସଦାତା ସାମିଲ
ସାମଗ୍ରୀ ଏବଂ ସେବା ଟିକସ (ଜିଏସଟି) ପରିସରକୁ ୧୦ ଲକ୍ଷରୁ ଅଧିକ ନୂଆ ଟିକସଦାତା ଆସିଛନ୍ତି । ପ୍ରାୟ ୨ ଲକ୍ଷ ଆବେଦନ ଏବେ ବି ମଞ୍ଜୁରି ପାଇଁ ପଡ଼ି ରହିଛି ବୋଲି ରାଜସ୍ୱ ସଚିବ ହସ୍ମୁଖ ଅଧିଆ କହିଛନ୍ତି । ଦେଶରେ ଟିକସଦାତାଙ୍କ ସଂଖ୍ୟା ବୃଦ୍ଧି ଜିଏସଟିର ଏକ ପ୍ରମୁଖ ବିଷୟ ରହିଥିଲା ବୋଲି ଶ୍ରୀ ଅଧିଆ ଏକ ଟ୍ଵିଟ୍ ବାର୍ତ୍ତାରେ କହିଛନ୍ତି ।
ପଞ୍ଜୀକରଣ ହୋଇଥିବା ୧୦ରୁ ୧୨ ଲକ୍ଷ ମଧ୍ୟରୁ ଯଦି ୮ରୁ ୯ ଲକ୍ଷ ଲୋକ ରିଟର୍ଣ୍ଣ ଫାଇଲ କରନ୍ତି ତାହେଲେ ଦେଶରେ ରାଜସ୍ୱ ପରିମାଣ ଉଲ୍ଲେଖନୀୟ ଭାବେ ବୃଦ୍ଧି ଘଟିବ । ଏଥସହିତ ଟିକସ ଫାଙ୍କିକୁ ରୋକିବାରେ ମଧ୍ୟ ଏହା କାମରେ ଆସିବ ବୋଲି ନ୍ୟାସନାଲ ଇନ୍ଷ୍ଟିଚ୍ୟୁଟ୍ ଅଫ୍ ପବ୍ଲିକ୍ ଫାଇନାନ୍ସ ଆଣ୍ଡ ପଲିସି (ଏନ୍ଆଇପିଏଫ୍ପି)ର ପ୍ରଫେସର ଏନ୍. ଆର୍. ଭାନୁମୂର୍ତ୍ତି କହିଛନ୍ତି ।
ଜିଏସଟିର ଆଇଟି ଭିତ୍ତିଭୂମି ସମ୍ଭାଳୁଥିବା କମ୍ପାନି ଜିଏସଟିଏନର ସିଇଓ ପ୍ରକାଶ କୁମାର କହିଛନ୍ତି ଯେ, ନୂଆ ଟିକସ ବ୍ୟବସ୍ଥାକୁ ୮୬ ଲକ୍ଷ ବ୍ୟବସାୟୀ ଏବଂ ସେବା ପ୍ରଦାନକାରୀ ଆସି ସାରିଲେଣି । ଏମାନଙ୍କ ମଧ୍ୟରୁ ୭୧ ଲକ୍ଷ ବ୍ୟବସାୟୀ ଓ ସେବାପ୍ରଦାନକାରୀଙ୍କୁ ଜିଏସଟି ପରିଚୟପତ୍ର ନମ୍ବର ଦିଆଯାଇ ସାରିଲାଣି । ବାର୍ଷିକ ୨୦ ଲକ୍ଷ ଟଙ୍କାରୁ କମ୍ କାରବାର କରୁଥିବା ଅନେକ ବ୍ୟବସାୟୀ ମଧ୍ୟ ଜିଏସଟିରେ ପଞ୍ଜୀକରଣ କରୁଛନ୍ତି ।
କମ୍ପୋଜିସନ ସ୍କିମ୍ର ଅଗ୍ରଗତି ଧିମା
ଜିଏସଟି ବ୍ୟବସ୍ଥାରେ ଥିବା କମ୍ପୋଜିସନ୍ ସ୍କିମ୍ ପ୍ରତି ବ୍ୟବସାୟୀ ଏବଂ ସେବା ପ୍ରଦାନକାରୀମାନେ ସେତେଟା ଆଗ୍ରହ ପ୍ରଦାନ କରୁନାହାନ୍ତି । ଉତ୍ପାଦନ ଶୁଳ୍କ, ସେବା ଟିକସ ଏବଂ ଭାଟ୍ ପ୍ରଦାନ କରୁଥିବା ୭୦ ଲକ୍ଷ ବ୍ୟବସାୟୀଙ୍କ ମଧ୍ୟରୁ ମାତ୍ର ୧ ଲକ୍ଷ ବ୍ୟବସାୟୀ କମ୍ପୋଜିସନ୍ ସ୍କିମ୍ ପରିସରକୁ ଆସିଛନ୍ତି । ଟିକସ ନିୟମ ପାଳନ ଜନିତ ବୋଝକୁ ହ୍ରାସ କରିବା ପାଇଁ ଛୋଟ ବ୍ୟବସାୟୀଙ୍କୁ କମ୍ପୋଜିସନ୍ ସ୍କିମ୍ର ସୁଯୋଗ ପ୍ରଦାନ କରାଯାଇଛି ।
କେଉଁ କାରଣ ପାଇଁ କମ୍ପୋଜିସନ୍ ସ୍କିମ୍କୁ ବ୍ୟବସାୟୀମାନେ ଆସୁନାହାନ୍ତି ତାହାର କାରଣ ଖୋଜିବାକୁ ସିବିଇସିକୁ କୁହାଯାଇଛି ବୋଲି ଜଣେ ବରିଷ୍ଠ ସରକାରୀ ଅଧିକାରୀ କହିଛନ୍ତି । ୮ଟି ଉତ୍ତର ପୂର୍ବାଞ୍ଚଳ ରାଜ୍ୟ ସମେତ ହିମାଚଳ ପ୍ରଦେଶକୁ ଛାଡ଼ିଦେଲେ ବର୍ଷକୁ ୭୫ ଲକ୍ଷ ଟଙ୍କା ପର୍ଯ୍ୟନ୍ତ କାରବାର କରୁଥିବା ବ୍ୟବସାୟୀମାନେ ଏହି ସ୍କିମ୍ରେ ସାମିଲ ହୋଇପାରିବେ ।
ଟ୍ରକ୍ ପରିବହନ ସମୟ ୨୦ ପ୍ରତିଶତ ହ୍ରାସ
ଜିଏସଟି ପରେ ଦେଶରେ ଟ୍ରକ୍ ପରିବହନ ସମୟରେ ଉନ୍ନତି ଘଟିଛି । ପୂର୍ବରୁ ଟ୍ରକକୁ ଗୋଟିଏ ସ୍ଥାନରୁ ଅନ୍ୟ ଏକ ସ୍ଥାନକୁ ଯିବା ଲାଗି ଯେତିକି ସମୟ ଲାଗୁଥିଲା ଏବେ ପ୍ରାୟ ଏକ ପଞ୍ଚମାଂଶ ବା ୨୦ ପ୍ରତିଶତ କମ୍ ସମୟ ଲାଗୁଛି ବୋଲି ସଡ଼କ ପରିବହନ ଓ ଜାତୀୟ ରାଜପଥ ମନ୍ତ୍ରାଳୟ ପକ୍ଷରୁ କୁହାଯାଇଛି ।