ଭୁବନେଶ୍ୱର ବ୍ୟୁରୋ, କନକ ନ୍ୟୁଜ୍ : ଓଡିଶା ବିଧାନସଭାର ଆଜି ଥିଲା ଏକ ଐତିହାସିକ ମୁହୂର୍ତ୍ତ । କାରଣ ଜିଏସଟି ଲାଗୁ ପାଇଁ ଅତିକମରେ ଆବଶ୍ୟକ ହେଉଥିବା ୧୬ଟି ରାଜ୍ୟର ବିଧାନସଭାର ସ୍ୱୀକୃତି ଆଜି ଓଡିଶା ସହ ପୁରଣ ହୋଇଛି । ୧୬ତମ ରାଜ୍ୟ ଭାବରେ ଆଜି ଓଡିଶା ବିଧାନସଭା ଗୁଡସ୍ ଆଣ୍ଡ୍ ସର୍ଭିସେସ୍ ଟାକ୍ସ ସମ୍ବିଧାନ ସଂଶୋଧନ ସଂକଳ୍ପକୁ ସର୍ବସମ୍ମତିକ୍ରମେ ପାରିତ କରିଛି।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବଡ କର ସଂସ୍କାର ପଦକ୍ଷେପରେ ସାରା ଦେଶରେ ଏକକ ଟିକସ ବ୍ୟବସ୍ଥା – ଜିଏସଟି ଲାଗୁ ହେବାକୁ ଯାଉଛି । ଏହା ଦ୍ୱାରା ଆଉ ବିଭିନ୍ନ ସ୍ତରରେ ଟିକସ ଦେବାକୁ ପଡିବ ନାହିଁ । ପ୍ରାୟ ୧୭ଟି ପରୋକ୍ଷ ଟିକସ ଉଚ୍ଛେଦ ହୋଇଯିବ । ଆଜି ବିଧାନସଭାରେ ତର୍ଜମା ବେଳେ ବିରୋଧୀ ଜାଣିବାକୁ ଚାହିଁଥିଲେ, ଏହା ଦ୍ୱାରା ଓଡିଶାର ଲାଭ କଣ ହେବ । ସରକାରଙ୍କ ପକ୍ଷରୁ ଦର୍ଶାଯାଇଥିଲା, ରାଜ୍ୟ ସରକାର ଗ୍ରୀନ ଟାକ୍ସ ଲାଗୁ କରିବା ଓ ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ଚଳିତ କର ବ୍ୟବସ୍ଥ ବାବଦରେ ହେବାକୁ ଥିବା କ୍ଷତିର ଭରଣା ପାଇଁ କେନ୍ଦ୍ରକୁ ଅନୁରୋଧ କରାଯିବ।
ପୂର୍ବରୁ ଗୋଆ, ଗୁଜୁରାଟ, ମହାରାଷ୍ଟ୍ର ଓ ବିହାର ଭଳି ୧୫ଟି ରାଜ୍ୟ ଜିଏସଟି ପାଇଁ ସମ୍ବିଧାନ ସଂଶୋଧନ ସଂକଳ୍ପକୁ ପାରିତ କରିଛନ୍ତି । ଆଜି ଓଡିଶା ବିଧାନସଭାରେ ଏହା ପାରିତ ହେବା ପରେ ରାଷ୍ଟ୍ରପତି ଜିଏସଟି କାଉନସିଲ ଗଠନ ପାଇଁ ବିଜ୍ଞପ୍ତି ଜାରି କରିପାରିବେ । ଏହା ପରେ ସାରା ଦେଶରେ ଏକକ ଟିକସ ବ୍ୟବସ୍ଥା ଲାଗୁ ହେବ।