ନାହିଁ ନାହିଁରେ ଚାଲିଛି ଜିଲ୍ଲାର ବିକାଶ । ମାଲକାନଗିରିକୁ କେନ୍ଦ୍ରର ପଛୁଆ ଜିଲ୍ଲା ଘୋଷଣାକୁ ନେଇ ବିଜେଡିର ପ୍ରଶ୍ନ ବେଳେ ସାମ୍ନାକୁ ଆସିଲାର ଅସଲ ଚିତ୍ର
କନକ ବ୍ୟୁରୋ: କେନ୍ଦ୍ର ସରକାରଙ୍କ ନ୍ୟୁ ଇଣ୍ଡିଆ ମିଶନ ୨୦୨୨ ରେ ଆଦିବାସୀଙ୍କ ବିକାଶକୁ ନେଇ ଏବେ ରାଜନୈତିକ ମହଲରେ ଛକାପଂଝା ଆରମ୍ଭ ହୋଇଯାଇଛି । ଏହି ମିଶନରେ ଦେଶର ୧୧୫ଟି ଅନୁନ୍ନତ ଜିଲ୍ଲାକୁ ଚୟନ କରିଛି କେନ୍ଦ୍ର ନିତି ଆୟୋଗ । ଏହାରି ଭିତରେ ଓଡିଶାର ମାଲକାନଗିରି ସମେତ ୮ ଟି ଜିଲ୍ଲାôକୁ ପଛୁଆ ଭାବେ ଦର୍ଶାଯାଇଛି । ଓଡିଶାର ମତାମତ ବିନା କେଉଁ ଆଧାରରେ ଏହି ସବୁ ଜିଲ୍ଲାକୁ ପଛୁଆ ତାଲିକାରେ ରଖାଗଲା, ତାକୁ ନେଇ ପ୍ରଶ୍ନ ଉଠାଇଛନ୍ତି ରାଜ୍ୟ ସରକାର । ନିତି ଆୟୋଗଙ୍କ ଏହି ତାଲିକା ପରେ ସାମ୍ନାକୁ ଆସିଛି ମାଲକାନଗିରି ଜିଲ୍ଲା ବିକାଶର ଅସଲ ଚିତ୍ର । ରାଜ୍ୟ ସରକାର ବିଭିନ୍ନ ସଚିବ ସ୍ତରର ଅଧିକାରୀଙ୍କୁ ନିଯୁକ୍ତି ଦେଇଥିବା ବେଳେ ସଚିବଙ୍କ ଅନୁଧ୍ୟାନ ରିପୋର୍ଟ ହିଁ ବୟାନ କରୁଛି କେତେ ବିକଶିତ ମାଲକାନଗିରି ।
Kanak News is now on WhatsApp
Join and get latest news updates delivered to you via WhatsApp
ମାଲାକନଗିରି ସମେତ ରାଜ୍ୟର କେ.ବି.କେ ଅନ୍ତର୍ଭୁକ୍ତ ଜିଲ୍ଲାର ବିକାଶ ପାଇଁ ନବୀନ ସରକାର ସଚିବ ପହ୍ୟାର ଅଧିକାରୀଙ୍କୁ ନୋଡାଲ ଅଫିସର ଭାବେ ନିଯୁକ୍ତି ଦେଇଛନ୍ତି । ପ୍ରଥମେ ସଚିବ ୟୁ. ଏନ. ବେହେରା, ପରେ ଆର୍. ବାଲକ୍ରିଷ୍ଣନ ଆଉ ଏବେ ମାଲକାନଗିରିର ଦାୟିତ୍ୱରେ ଅଛନ୍ତି ବିଶାଳ ଗଗନ । ୨ ବର୍ଷ ହେଲା ଗାଁ ଗାଁ ବୁଲି ଜିଲ୍ଲାର ସମସ୍ତ ଉନ୍ନୟନ ମୁଳକ କାର୍ଯ୍ୟକୁ ତଦାରଖ କରୁଛନ୍ତି ସରକାର । ତେବେ ସେହି ସଚିବମାନଙ୍କ ରିପୋର୍ଟ ହିଁ ପଛୁଆ ଜିଲ୍ଲାର ବିକାଶର ଅସଲ ଚିତ୍ରକୁ ସାମ୍ନାକୁ ଆଣିଛନ୍ତି । ଯାହାର ଏକ ରିପୋର୍ଟ ଆମ ହାତରେ ଲାଗିଛି ।
• ମାଲକାନଗିରିରେ ଖାଲି ପଡିଛି ସି.ଡି.ଏମ.ଓ ସମେତ ୨ଟି ଏଡି.ଏମ.ଓ ଏବଂ ମୋଟ ୫୬ଟି ଡାକ୍ତରୀ ପଦବୀ
• ସେହିପରି କୃଷି ଉପନିର୍ଦେଶକ, ଜିଲ୍ଲା କୃଷି ଅଧିକାରୀ, ଜିଲ୍ଲା ଶ୍ରମ ଅଧିକାରୀ, ସୂଚନା ଓ ଲୋକ ସମ୍ପର୍କ ଅଧିକାରୀ, ସଂସ୍କୃତି ଅଧିକାରୀ, ପର୍ଯ୍ୟଟନ ଅଧିକାରୀ, ଜିଲ୍ଲା ପଂଚାୟତ ଅଧିକାରୀ ପଦ ବି ଖାଲି ପଡିଛି ।
• ଅନେକ ସହକାରୀ ନିର୍ବାହୀ ଯନ୍ତ୍ରୀ, ୨ଟି ତହସିଲଦାର, ୭ ଟି ଜିଲ୍ଲା ମଙ୍ଗଳ ସମ୍ପ୍ରସାରଣ ଅଧିକାରୀ ସମେତ ଜିଲ୍ଲାରେ ୫୦ରୁ ଅଧିକ ପଦବୀରେ ନାହାନ୍ତି ଅଧିକାରୀ ।
ସେହିପରି ଜିଲ୍ଲାରେ ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନା ଧିମେଇ ଯାଇଥିବା ସରକାରଙ୍କୁ ଜଣାଇଛନ୍ତି ସଚିବ ।
• ଏଲ.ଡବ୍ଲୁ.ଇ ଅନ୍ତର୍ଗତ ଗୋବିନ୍ଦପାଲି–ମହୁପଦର, ଚିତ୍ରକୋଣ୍ଡା-ଯାନବାଇ ରାସ୍ତା କାମ ମନ୍ଥର ଗତିରେ ଚାଲିଛି ।
• ଶିଖପାଲି–ପୋଡିଆ, କାଲିମେଳା-ଭେଜାଙ୍ଗିଓାଡା-ବାଲିମେଳା, ଗୋବିନ୍ଦପାଲି–ବଡଡୁରାଲ ରାସ୍ତା କାମ ଆଦୌ ଆରମ୍ଭ ହୋଇନଥିବା ରାଜ୍ୟ ସରକାରଙ୍କୁ ଜଣାଇଛନ୍ତି ସଚିବ ଆର.ବାଲକ୍ରିଷ୍ଣନ ।
• ଜିଲ୍ଲାର ୮୦ ଭାଗ ଅଂଚଳରେ ମୋବାଇଲ ସେବା ନାହିଁ
• ୧୧୧ ପଂଚାୟତରୁ ୧୦୦ରୁ ଅଧିକ ପଂଚାୟତରେ ପହଁଚି ପାରିନି ବ୍ୟାଙ୍କ ସେବା ।
• ବିଦ୍ୟୁତିକରଣ କ୍ଷେତ୍ରରେ ଏବେ ବି ଅନ୍ଧାରରେ ରହିଛି ଅନେକ ଗାଁ ।
• ଅନେକ ପାୱାର ଗ୍ରୀଡ୍ କାମ ଅଟକି ରହିଥିବାରୁ ଉଦବେଗ ପ୍ରକାଶ କରିଛନ୍ତି ସଚିବ ।
ତେବେ ମାଓ ଅଧିଷୂତ ଜିଲ୍ଲାରେ ସଚିବଙ୍କ ଗସ୍ତର ବିଶେଷ କିଛି ପ୍ରଭାବ ପଡିନଥିବା କହିଛନ୍ତି ବୁଦ୍ଧିଜୀବୀ । ସେପଟେ ସଚିବଙ୍କ ଗସ୍ତ ପରେ ଜିଲ୍ଲାର ବିକାଶ ଧାରା ତ୍ୱରାନ୍ୱିତ ହୋଇଛି । ଗୁରୁପ୍ରୀୟା ସେତୁ ନିର୍ମାଣ କାମ ଶେଷ ପର୍ଯ୍ୟାୟରେ ପହଁଚି ଥିବା ବେଳେ ଜିଲ୍ଲାରେ ବ୍ୟାଙ୍କ ସଂଖ୍ୟା ୪୬କୁ ବୃଦ୍ଧି ପାଇଛି । ଏଲ.ଡବ୍ଲୁ.ଇ ଯୋଜନାରେ ୨୪ଟି ନୂତନ ଟେଲିଫୋନ ଟାୱାର ନିର୍ମାଣ ହୋଇଛି । ୯ଟି ବେଲି ବ୍ରିଜ ସମେତ ଗ୍ରାମାଂଚଳ ରାସ୍ତା ନେଟୱାର୍କିଂ ସଫଳ ହୋଇଥିବା କହିଛନ୍ତି ପ୍ରଶାସନିକ ଅଧିକାରୀ ।