ମହାଠକଙ୍କୁ ରୋକିବା ପାଇଁ ସରକାରଙ୍କ ବଡ ନଷ୍ପତି ! ୫୦ କୋଟିରୁ ଅଧିକ ଅନାଦେୟ ଋଣ ଥିଲେ ସିବିଆଇକୁ ଡାକିବାକୁ ବ୍ୟାଙ୍କମାନଙ୍କୁ ନିର୍ଦ୍ଦେଶ ଦେଲେ ସରକାର
କନକ ବ୍ୟୁରୋ : ପିଏନବି ଓ ରୋଟମାକ କମ୍ପାନିର ବ୍ୟାଙ୍କରୁ କୋଟି କୋଟି ଠକେଇ ଘଟଣା ସାମ୍ନାକୁ ଆସିବା ପରେ ତତ୍ପର ହୋଇଛନ୍ତି ସରକାର । କିପରି ଏଭଳି ଠକେଇ ରୋକାଯାଇ ପାରିବ ସେ ନେଇ ସରକାରଙ୍କ ପକ୍ଷରୁ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛନ୍ତି । ଦେଶର ବ୍ୟାଙ୍କ ଗୁଡ଼ିକରେ ଠକେଇ ଓ ଅନାଦେୟ ଋଣ ପରିମାଣ ବଢିଚାଲିଥିବାରୁ ସରକାର ବ୍ୟାଙ୍କମାନଙ୍କ ଉପରେ କେତେକ କଟକଣା ଜାରି କରିବାକୁ ଯାଉଛନ୍ତି । ଏଣିକି ୫୦ କୋଟି ଟଙ୍କା ବା ଅଧିକ ପରିମାଣର ଅନାଦେୟ ଋଣ ଗୁଡ଼ିକ ସଂପର୍କରେ ତଦନ୍ତ କରିବାକୁ ଓ ଆବଶ୍ୟକ ସ୍ଥଳେ ସିବିଆଇକୁ ସୂଚୀତ କରିବାକୁ ବ୍ୟାଙ୍କମାନଙ୍କୁ ଅର୍ଥମନ୍ତ୍ରାଳୟ ନିର୍ଦ୍ଦେଶ ଦେଇଛି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ଅର୍ଥ ସଚିବ ରାଜୀବ କୁମାର ଟ୍ଵିଟ୍ କରି କହିଛନ୍ତି ଯେ ୫୦ କୋଟି ଟଙ୍କାରୁ ଅଧିକ ପରିମାଣର ଅନାଦେୟ ଋଣ, ଇଚ୍ଛାକୃତ ଋଣଖିଲାପ ମାମଲା ବାବଦରେ ତଦନ୍ତ କରି ସିବିଆଇକୁ ଜଣାଇବାକୁ ରାଷ୍ଟ୍ରାୟତ ବ୍ୟାଙ୍କଗୁଡ଼ିକର ପରିଚାଳନା ନିର୍ଦ୍ଦେଶକମାନଙ୍କୁ ନିର୍ଦ୍ଦେଶ ଦିଆଯାଇଛି । ଆବଶ୍ୟକସ୍ଥଳେ ଇଡି, ରାଜସ୍ୱ ଗୁଇନ୍ଦା ନିର୍ଦ୍ଦେଶାଳୟ ଓ ଆର୍ଥିକ ଗୁଇନ୍ଦା ସଂସ୍ଥାର ସାହାଯ୍ୟ ନେବାକୁ ମଧ୍ୟ ବ୍ୟାଙ୍କମାନଙ୍କୁ କୁହାଯାଇଛି । ବ୍ୟାଙ୍କମାନଙ୍କର ମୁଖ୍ୟ ସତର୍କତା ଅଧିକାରୀ ଏସବୁ ତଦନ୍ତରେ ସିବିଆଇକୁ ସହଯୋଗ କରିବେ ।
ସୂଚନାଯୋଗ୍ୟ ଯେ ପିଏନବି ଠକେଇ ପରିମାଣ ବଢିଯାଇଛି । ପୂର୍ବରୁ ଏହି ଠକେଇ ପରିମାଣ ୧୧,୪୦୦ କୋଟି ଟଙ୍କାର ଥିବାବେଳେ ପିଏନବି ସ୍ୱୀକାର କରିଛି ଯେ ଏବେ ଏହି ପରିମାଣ ପ୍ରାୟ ୧୨,୭୦୦ କୋଟି ଟଙ୍କା ଟପିଯାଇଛି । ଅନ୍ୟପକ୍ଷରେ ରାଷ୍ଟ୍ରାୟତ ବ୍ୟାଙ୍କମାନଙ୍କର ଅନାଦେୟ ଋଣ ପରିମାଣ ୮.୫ ଲକ୍ଷ କୋଟି ଟପିଯାଇଛି ବୋଲି ଗତ ବଜେଟ ଭାଷଣରେ କେନ୍ଦ୍ର ଅର୍ଥମନ୍ତ୍ରୀ ଅରୁଣ ଜେଟଲୀ କହିଥିଲେ ।