ନଷ୍ଟ ହୋଇଯିବ କି କାଶୀ ? ଶିବଙ୍କ ବାସ୍ତୁ ଉପରେ ଖେଳ ଖେଳୁଛନ୍ତି ସରକାର,୫୦ ଟି ମନ୍ଦିରରେ ଚାଲିବ ବୁଲଡୋଜର ।
ପ୍ରଧାନମନ୍ତ୍ରୀ ମୋଦି ଯେତେବେଳେ ନିଜ ସଂସଦ କ୍ଷେତ୍ର କାଶୀକୁ ଜାପାନର ଏକ ସହର କ୍ୟୁଟୋ ଭଳି ପ୍ରସ୍ତୁତ କରିବାକୁ ଘୋଷଣା କଲେ , ସେତେବେଳେ ବିଜ୍ଞ ତଥା ପୁରୁଖା ଲୋକଙ୍କ ମନକୁ ଗୋଟିଏ କଥା ଆସିଥିଲା ଯେ ଇତିହାସରୁ ବି ପୁରୁଣା କାଶୀକୁ ୬୦୦ ବର୍ଷ ପୁରୁଣା କ୍ୟୁଟୋ ଭଳି କିଭଳି ଭାବେ ରୂପରେଖ ଦିଆଯିବ । ଆପଣଙ୍କ ଜ୍ଞାତ ସକାଶେ କହିରଖୁଛୁ କି, କ୍ୟୁଟୋକୁ “ଶାନ୍ତିର ନଗର” ମଧ୍ୟ କୁହାଯାଏ । ତେବେ ଲୋକଙ୍କ ମନରେ ଏବେ ପ୍ରଶ୍ନ ସୃଷ୍ଟି ହେଉଛି କି କ’ଣ ଏହି ଘୋଷଣା ପଛରେ କିଛି ଗଭୀର ଚିନ୍ତା ଥିଲା ବା କେବଳ ନାମକୁ ମାତ୍ର ଲୋକ ଦେଖାଣିଆ ଅବାନ୍ତର ଚିତ୍ର ଥିଲା ।
Kanak News is now on WhatsApp
Join and get latest news updates delivered to you via WhatsApp
ତେବେ କାଶୀକୁ କ୍ୟୁଟୋ ରୂପରେଖ ଦେବାପାଇଁ କାଶୀ ବିଶ୍ୱନାଥ ମନ୍ଦିରରୁ ବିସ୍ତାରୀକରଣ ପାଇଁ ବାରାଣାସୀର ଲଳିତ ଘାଟଠାରୁ ବିଶ୍ୱନାଥ ମନ୍ଦିର ପର୍ଯ୍ୟନ୍ତ ୨୦୦ ରୁ ଅଧିକ ଭବନ ଚିହ୍ନଟ କରାଯାଇ ଭଙ୍ଗା ଯାଉଛି । ଏଥିରେ ୫୦ ରୁ ଅଧିକ ସଂଖ୍ୟକ ପ୍ରାଚୀନ ମନ୍ଦିର ଏବଂ ମଠ ରହିଅଛି । ଏହାସବୁ କାଶୀ ବିଶ୍ୱନାଥ କରିଡରରେ ଆସୁଥିବା ମନ୍ଦିର ଅଟେ । ତେବେ ପ୍ରାଚୀନ ମନ୍ଦିର ଏବଂ ଦେବ ବିଗ୍ରହର ସୁରକ୍ଷା କରିବା ସକାଶେ ଆନ୍ଦୋଳନରତ ଶଙ୍କରାଚାର୍ଯ୍ୟଙ୍କ ଶିଷ୍ୟ ସ୍ୱାମୀ ଅବିମୁକ୍ତେଶ୍ୱରାନ୍ଦ ୧୨ ଦିନର ଉପବାସରେ ବସିରହିଛନ୍ତି । ସ୍ୱାମୀ ଅବିମୁକ୍ତେଶ୍ୱରାନ୍ଦଙ୍କ କହିବାନୁସାରେ, “କାଶୀର ପକ୍କା ମହାଲ ଅର୍ଥାତ୍ କୋରିଡରର ବାସ୍ତୁବିଧାନକୁ ସ୍ୱୟଂ ମହାଦେବ ମୂର୍ତ୍ତରୂପରେ ସ୍ଥାପିତ କରିଛନ୍ତି । ଯଦି ଏଭଳି କରିଡରର କିଛି ବି ଅଂଶରେ ଆଞ୍ଚ୍ ଆସେ ତେବେ ଅନର୍ଥ ହୋଇଯିବ । କାଶୀ ଧ୍ୱସଂ ପାଇବା ସୁନିଶ୍ଚିତ ।”
ନଷ୍ଟ ହୋଇଯିବ କି କାଶୀ ?
ସ୍ୱାମୀ ଅବିମୁକ୍ତେଶ୍ୱରାନ୍ଦଙ୍କ କହିବାନୁସାରେ, ପକ୍କା ମହାଲ ହିଁ କାଶୀର ମନ,ମସ୍ତିଷ୍କ ଏବଂ ହୃଦୟ ଅଟେ । ଏହା ସ୍ୱୟଂ ଭଗବାନ ଶିବଙ୍କ ଦ୍ୱାରା ମୂର୍ତ୍ତରୂପ ପ୍ରାପ୍ତ ଅଟେ । ଏମିତିରେ ଯଦି କରିଡରକୁ ନଷ୍ଟ କରାଯାଏ ତେବେ କାଶୀ ନଷ୍ଟ ହେବାର ବିପଦ ରହିଛି । ଏହା କେବଳ କାଶୀବାସୀ ଏବଂ ତାଙ୍କ ଆସ୍ଥା ନୁହଁ ବରଂ ସମ୍ପୁର୍ଣ୍ଣ ଦେଶବାସୀଙ୍କ ଆସ୍ଥା ଉପରେ ପ୍ରଶ୍ନ ଉଙ୍କି ମାରୁଛି । ଦେଶର କୋଣ ଅନୁକୋଣରୁ ଲକ୍ଷ ଲକ୍ଷ ଭକ୍ତ ଦେବଦେବୀଙ୍କ ପୂଜାର୍ଚ୍ଚନା ସକାଶେ କାଶୀ ଆସୁଛନ୍ତି ଯେତେବେଳେ ସେ କାଶୀ ଆସି ଏତାଦୃଶ ଦେଖିବେ ତେବେ ମର୍ମାହତ ହୋଇ ନିରାଶ ହୋଇ ଫେରିଯିବା ଛଡା ତାଙ୍କ ପାକରେ କୌଣସି ବାଟ ରହିବ ନାହିଁ । ତେବେ ସରକାରଙ୍କ ବିରୋଧ ନଥିବା କଥା ମଧ୍ୟ ମ୍ବାମୀଜୀ କହିଛନ୍ତି । ଯଦି ଦେବଦେବୀଙ୍କୁ ତାଙ୍କ ଉପଯୁକ୍ତ ସ୍ଥାନରୁ ନ ହଟାଇ ରୂପରେଖରେ ପରିବର୍ତ୍ତନ କରାଯାଏ ତେବେ ଏଥିରେ କାହାର ଆପତ୍ତି ନଥିବା କଥା ସେ କହିଥିଲେ । କେବଳ ପ୍ରାଚୀନ ମନ୍ଦିର ଏବଂ ବିଧାନ ଉପରେ ଯେମିତି ଆଞ୍ଚ୍ ନ ଆସେ ।
ପକ୍କା ମହାଲର ମହତ୍ତ୍ୱ କ’ଣ ଅଟେ ?
କୁହାଯାଏ ଯେ କାଶୀକୁ ଜାଣିବାକୁ ହେଲେ ପ୍ରଥମେ ପକ୍କା ମହାଲକୁ ଜାଣିବା ନିହାତି ଆବଶ୍ୟକ । ଏହାର ଅବଧାରଣା କାଶୀ ଗଙ୍ଗାତଟରୁ ଆରମ୍ଭ କରି ଅସ୍ତି ରାଜଘାଟ ପର୍ଯ୍ୟନ୍ତ ରହିଅଛି । ଏହି ଇଲାକା ନିଜ ମଧ୍ୟରେ ଏକ ସଂସ୍କୃତି ସ୍ଥାପନ କରିଛି । ତେତିଷ କୋଟି ଦେବଦେବୀଙ୍କ ବିଗ୍ରହର ଚିହ୍ନ ଏଠାରେ ଦେଖିବାକୁ ମିଳେ । ଯାହା ଲୋକଙ୍କୁ ନିଜ ଆରାଧ୍ୟଙ୍କ ପାଖରେ ସମର୍ପଣ ହେବାର ସୁଯୋଗ ପ୍ରଦାନ କରେ ।
କାଶୀରେ ବିକାଶର ବହୁ ଦୃଷ୍ଟାନ୍ତ ଦେଖିବାକୁ ମିଳିଛି କିନ୍ତୁ କେବେ ମଧ୍ୟ ଏଠାକାର ପୌରାଣିକ ମହତ୍ତ୍ୱ ରଖୁଥିବା ଶିଳ୍ପାନ୍ୟାଶକୁ ନଷ୍ଟ କରିବା ଭଳି ସାହସ କାହାର ହୋଇ ନାହିଁ । କିନ୍ତୁ ଆଜି କାଶୀର ଏହି ପକ୍କା ମହାଲ ବିକାଶ ନାମରେ ନଷ୍ଟ ହେବାକୁ ଯାଉଛି । ଯାହା ଦ୍ୱାରା ଲୋକଙ୍କ ମନରେ ଏହାକୁ ନେଇ ବିଭିନ୍ନ ପ୍ରକାର ପ୍ରଶ୍ନ ଏବଂ ସଂକଟର ଚିହ୍ନ ଦେଖିବାକୁ ମିଳୁଛି ।