ସରକାରୀ ଯୋଜନାକୁ ଉପହାସ ! କେନ୍ଦୁଝର ସରେଇ ଗାଁରେ ଭଙ୍ଗାଘରେ ରହୁଛନ୍ତି ହିତାଧିକାରୀ
କନକ ବ୍ୟୁରୋ : ଦେଶରୁ ଦାରିଦ୍ର୍ୟ ହଟିବ । ସମସ୍ତଙ୍କ ପେଟକୁ ଦାନ, ରହିବାକୁ ବାସ ଦେବା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଅନେକ ଯୋଜନା । ହେଲେ ଅନେକ କ୍ଷେତ୍ରରେ ଅନୁଭବ ହୁଏ ସରକାରଙ୍କ ସବୁ ଯୋଜନା କେବଳ ଘୋଷଣା ପାଇଁ । ଆଧିବାସୀ ଅଧ୍ୟୁଷିତ କେନ୍ଦୁଝର ଜିଲ୍ଲା ଘସିପୁରା ବ୍ଲକ ସରେଇ ଗାଁର ଦୁଇଟି ଦୃଶ୍ୟ, ସରକାରଙ୍କ ଯୋଜନା ଉପରେ ଅନେକ ପ୍ରଶ୍ନ ସୃଷ୍ଟି କରିଛି।
Kanak News is now on WhatsApp
Join and get latest news updates delivered to you via WhatsApp
କେନ୍ଦୁଝର ଜିଲ୍ଲା ଘସିପୁରା ବ୍ଲକ ସରେଇ ଗାଁର ଧନେଶ୍ୱର ସାହୁ । ଗରିବ ଦିନ ମଜୁଆ ହୋଇଥିବା ବେଳେ ମୁଣ୍ଡ ଗୁଂଜିବା ପାଇଁ ଏକ ମାତ୍ର ଭରସା ଖଣ୍ଡିକ ହଠାତ୍ ଭାଙ୍ଗି ପଡିଛି । ବାସ ଉଜୁଡି ଯିବା ପରେ ସରକାରୀ ଯୋଜନାରେ ଘର ଖଣ୍ଡେ ପାଇଁ ବ୍ଲକ ଅଫିସକୁ ଧାଇଁ ଧାଇଁ ନୟାନ୍ତ ହେଲେଣି ଧନେଶ୍ୱର । ହେଲେ ତାଙ୍କ ଗୁହାରି କେହି ଶୁଣୁନଥିବା ସେ ଅଭିଯୋଗ କରିଛନ୍ତି ।
ସରେଇ ଗାଁର ଆଉ ଏକ ଦୃଶ୍ୟ । ଚାଳ ଛପର ସାଙ୍ଗକୁ ଝାଟି କାଂଥର ଘର । ଏହାରି ଭିତରେ ଖରା, ବର୍ଷାରେ ଜୀବନ ବିତାଉଛନ୍ତି ମାୟାବତି ସାହୁଙ୍କ ପରିବାର । ଏ ପରିବାର ବିପିଏଲ ଅନ୍ତର୍ଭୁକ୍ତ ହୋଇ ବି ଘର ଟିଏ ପାଇଁ ନିବେଦନ କରି ନିରାସ ହୋଇଥିବା କହିଛନ୍ତି । ଏତେ ଦିନ ଧରି ପ୍ରଶାସନର ଆଢୁଆଳରେ ରହିଥିବା ଗରିବ ହିତାଧୀକାରୀଙ୍କ ସମସ୍ୟାର ତଦନ୍ତ କରି ସାହାଯ୍ୟ କରିବେ ବୋଲି କହିଛନ୍ତି ଘସିପୁରା ବିଡିଓ ।
ସରେଇ ଗାଁ ଦୁଇଟି ଦୃଶ୍ୟ ଅନେକ ପ୍ରଶ୍ନ ସୃଷ୍ଟି କରୁଛି । ପ୍ରଶ୍ନ ଉଠିଛି ଗରିବଙ୍କ ଜୀବନ ଯଦି ଭଙ୍ଗା ଚାଳ ଘରେ କଟିବ ତେବେ ସରକାରଙ୍କ ପ୍ରଧାନମନ୍ତ୍ରୀ ଆବସ ଯୋଜନା, ମୋ କୁଡିଆ ଯୋଜନା କାହା ହି ହିତରେ?